إيـقَاعْ

جُروحّ

لا تشّك في غلاك اللي يشيله صدري
…

والله إن لك فالحنايه شيء ماتتخيله!..

-

دخلت الشقة واني اتنهد براحه لأن گدرت اشرد من المدرسه! اول ما خلصت من المدير النذل طلعت منه ومباشرةً رحت للصف وحضي فديته أشتغل هنا ومچان اكو احد بيه، گدرت اخذ جنطتي واشرد منه واروح لباب المدرسه ومالگيت احد ،لا جذب چان اكو رجال چبير يحرس المكان

واول ما شفته قررت اشوفلي فد عذر اله حتى يروح من الباب واشرد وحرفياً خليت جنطتي ع صفحه ورحتله امثل الخوف وگلتله المدير طاح واغمى عليه! وهو انصدم من اللي سمعه ومباشرةً عاف الباب وراح يركض خايف ع مديره عبالك محور الكون!

واني بكل برود ابتسمت ورجعت اخذت جنطتي ولبستها وطلعت من الباب وصرت اركض بأقوة ماعندي راجع لشقتي! ادري فعلتي نذله وراح يشوفني الحارس باچر ويعصب عليه بس عادي اهم شيء ما اشوف خالد وإيهاب وفيصل الغثيثين!

هو انتَ حظ ماعندك ياليث لو عندك حظ چان ماصار بيك هيج من اول يوم! يالله اهم شيء شردت ومنا الباجر الله كريم عود ادورلي فد شي اخليهم ميتقربون مني!

هسه يمكن حتى المدير وسعود والبقية ينصدمون من مراح يلگوني بالمدرسه بس يالله شدخلني بيهم حياتي وبكيفي! دخلت غرفتي واني اشمر الجنطه بأهمال بالأرض كلش تعبان احس راسي يريد ينفجر! حرفياً وجسمي كله يعورني!

رحت لكنتور الملابس واخذتلي اي شي عيني اجت عليه وجان تيشيرت ابيض فضفاض وبيجاما سوداء رحت للحمام بعدها وسبحت وبدلت ملابسي بعدم إهتمام بدون ما انشف شعري هالمره وقبل لا اطلع ناظرت وجهي بالمرايه وابتسمت ارسلت لنفسي بوسه بالهواء وطلعت

رحت لجرار الچربايه وفتحته واخذت نفس من شفته! لا ليث عوف هذا الشي! انتَ تركتهم وخلصت ليش جايب هذي الأشياء وياك؟ ما اعرف والله بس اتعب حيل اذا مسويت هذا الشي اموت من الوسواس والتفكير اللي ياكل عقلي حرفياً!

تنهدت خلص الشيء هذا راح يجيبلي افكار واذى بس لازم اعوفه! رجعت سديت الجرار الإحباط والبرود الل يجيلي يخليني افكر بأشياء مالها داعي حتى! حتى مالي خلق اكل شيء، لهذا انسدحت على الجربايه بعدم إهتمام وحاولت انام جانت الساعه بالعشره الصبح بعده اذان الضهر فخليني اخذلي غفوة بلكي ارتاح من هذا التفكير اللي ميرضى يعوفني ومن اگعد اشوف شسوي بعدها

غمضت عيوني وحاولت ما افكر بأي شي وبين لحظة الغفوة مالتي حسيت نفسي جاي اسبح بماي مكان غريب كله اسود !! وبين ما اني هيج حسيت نفسي جاي اغرق! ماجاي اتنفس وكأن اذا فتحت حلكي او شميت بالغلط يدخل مي عبالك صدك ببحر او بشي ما اعرف ! يعني المكان غريب اسود ما اشوف شي غير السواد بس شلون جاي اغرق اني بهذا السواد! حاولت احرك واطلع اسبح اي شي! بس جاي ادخل اكثر من مجاي اطلع! خفت ورجفت اني جنت نايم شجابني هنا! بديت اختنق وما كدرت اتحمل عدم استشاقي للهواء!