إيـقَاعْ

شُّعُورْ

‏طهور ياحظّي والف لا بأس

..

‏دام الخطا في هقوتي واختياري

ـ

حالياً گاعد على چربايتي وافكر ، اني شگلت مو گلت مراح اروح اليوم للمدرسه ؟ زين ليش گاعد لا ومتكشخ بعد حتى اروح؟ لا واضح انسحرت لو تخبلت لأن اني انسان غريب! بس يالله عادي ميهم الصراحه لأن مزاجي مُتقلب ساعه يريدني اروح وبربع الساعه اغير هذا الشيء يعني مراح استغرب الصراحه!

ردت اگوم حتى خلص اخذ جنطتي واطلع اروح للمدرسه بس رنت التليفون وگفتني! استغربت يعني منو يتصل عليه لا وبهيج وقت بعد؟

مديت ايدي لتليفوني ورفعته وشفت المتصل رقم غريب اول مره اشوفه! عقدت حاجبي بأستغراب منو هذا وشعنده متصل عليه؟ اتوقع إيهاب؟ لا بس إيهاب مراح يتصل عليه لأن يعرفني عرفته ومتحلف بيه بعد!

عجل منو هذا؟ مدري وما فكرت حتى رفضت مكالمته لأن مالي خلگ اخرب مزاجي اللي اتحسن وحده الحمدلله ورجعته حاطه بجيب الدشداشه مالتي اي هالمره لبستها ومدري احسها حلوه بس ما اعرف ما عجبتني يمكن لأن مو متعود عليها؟ مدري بس يالله لازم حتى ما تعرض للتنمر من المدير!

ياربي عند شكوك ناحيته وعندي هواي ملاحظات عليه بس بنفس الوقت ما شايف شي يخلي شكي بمحله! ما اعرف بس اتمنى يطلع تفكيري لاشيء ومايكون عنده شي ومجرد مدير نذل مثل كل مدير على هاي الكره الارضيه!

وبين تفكيري واني اللبس حذائي سمعت صوت تليفوني رن مره ثانيه! شعنده هذا لازگ يتصل عليه؟ تنهدت ومارديت اتجاهلته الا ان وگف اتصاله وبعدين فكرت اخذ التليفون وياي! بس خاف مياقبلون! ما اعرف راح اخليه بوضع الصامت واحطه بجيبي محد راح يكتشف اكيد اذا هيج!

وبالفعل سويت هذا الشي وبين ما اني جاي اسويه رجع اتصل نفس الرقم! الله ياخذك شنو ماتمل؟؟

"اكل خره كل ساعه متصل .. مو مشهور اني!!"

فتحته ونطقت هذا الكلام ومباشرةً سديته بوحهه بدون ما اسمع صوته او شنو يگول او حتى من هوه!
والله بقت بس هذا! ناس غريبه اعوذ بالله منها! ومني هم ،لعد منو اني مو بشر شگلولكم فضائي؟
الله تخيل اصير فضائي! وربي فكره حلوه اخلص من المجرمين اللي جنت وياهم ومن البشر اللي دا اعيش وياهم هم! بس دقيقه الفضائيين هم عدهم مشاكل؟

يعني هم مثلنا مشاعر وتعب وحزن وينقهرون وهم عدهم ناس عزيزه عليهم تموت ويبچون عليهم مثلنا؟ وهم عدهم واحد يزعل ويعوفهم ويشرد؟ يعني مثلاً يشرد لكوكب زمرده مثلي من شردت للسعوديه؟ لا ما اتوقع اكو واحد غريب مثلي الصراحه حتى الفضائيين راح يشفقون على حالي لو شافوني! ياريتكم تجون وتاخذوني وياكم والله لو عامل نظافة عدكم هم اصير ماعندي مشكله!