" කඩේ "
" තනියෙන් ද ? "
" ඕ "
" ඔහොම ඉන්න මාත් එනකම් "
" එපා අයියේ.ඩිලාන් අයිය කිව්වා ඔයා එක්ක කේක් එක ගෙන්න යන්න තියෙනවා කියලා " කටට එන බොරුවක් කිව්වේ මට තනියෙන් යන්න ඕන කියලා හිතුන නිසා. එහෙම යද්දී පාඩුවෙ යන්න පුළුවන්.ගිවන්ත අයිය උනත් සැරින් සැරේ මම ගැන හොයන එක හරි කරදරයක්, එයාටත් ඕන නෑ නේ. ආපු විදියට ඉන්නේ නැතිව මගෙ පස්සෙන් ඇවිද ඇවිද ඉන්නේ. මම එහෙම කියාගෙන පහළ පාර දිගෙ තනියෙන් ආවා. මම කියපු දේ අහලා ගිවන්ත අයිය නම් පේරා ගෙඩියක් හප හප එහෙම ම ගේ ඇතුලට ගියේ මුකුත් නොකියා.
අද දවස ගෙවෙන්නේ නෑ කියලා හිතෙනවා වෙලාවකට, මාත් හිමීට Factory එකට යන්න තියෙන පොඩි පාරෙන් පහළට බැස්සේ බාලේ මාම හදලා තිබ්බ පොඩි මල් පැල දිහා බල බල. ඔක්කොම පැල එකම ගානට හොඳ ට හැදිලා තිබ්බැ. තව යන්න තියෙනවා ඉස්සරත් මේ වගේම තමයි වෙනසක් නෑ ... මම තනියෙන් ගෙදර ඉදන් ඔය හංදියේ කඩේට යනවා. එන්න යන්න ම මට පැයක් දෙකක් විතර යනවා. ඒ දවස් වලත් ඔය කඩේ ගිහින් ලොකු බඩු මල්ලකුත් උස්සගෙන තැනින් තැන නැවතී නැවතී එනවා. ඒ දවස් වල නම් අනිවාර්යයෙන්ම මොනා හරි දෙයක් අමතක කරලා ඇවිත් ආත්තම්මගෙන් බැනුම් අහනවා. හිතලා අමතක කරලා එනවා නෙවෙයි ඒ කඩේ සීයා තැනින් තැන තමයි ඉල්ලන බඩු තියෙන්නේ එතකොට සමහර වෙලාවට මට දාගන්න අමතක වෙනවා. එහෙම අමතක නොවුණු දවසට කුඩේ හරි අමතක වෙනවා. අද නම් කුඩයක් තියා බෑග් එකක්වත් ගත්තේ නෑ . දාලා දෙන දේක අරන් එනවා. ඩිලාන් අයියට තිබ්බා ඕන්නම් බයික් එකේ ගිහින් බඩු ටික අරන් එන්න.
එහෙම උනා නම් මාත් එනවා බඩු ටික අල්ලාගෙන පිටිපස්සෙන් හරි , අවුලක් නෑ .. එ ගෙදර ළමයි කඩේ යවන්නේ නෑ ... මම ඒ ගෙදර නෙවෙයි නිසා, හැමදාම මම කඩේ යනවා . පොඩි දුකක් තියෙනවා මොකද මම අව්වෙ පිච්චි පිච්චි කඩේ යද්දී ගෙදර ඉන්න අය ටීවී බල බල හොඳ ට ඉන්න කොට මටත් ඉන්න තිබ්බ නම්,
නිවාඩු කාලේ නිසා සිරසේ උදේට දවල්ට දෙකටම films යනවා. Factory එකත් පහු කරන් ඉස්සරහට ඇවිත් වංගු වලින් යන්නේ නැති පොඩි shortcut පාරවල් හදන් ඉක්මනට කඩේට ආවේ පුළුවන් ඉක්මනට ආයෙත් ගෙදර යන්න ඕන නිසා. ගිවන්ත අයිය හරි ආව නම් කතා කර කර හරි යන්න තිබ්බා. ඒත් මාත් බකපණ්ඩිතයිනෙ, එන්න හදපු මනුස්සයට එපා කියලා දැන් ආවා නම් හොදයි කියලා කල්පනා කරන්නෙ.
