BELIEVE

Chapter 2

PART #2 :

We took a chance , god knows we'll try:

كل القصة بلشت بمسابقة ما كنت مقتنعة فيها أصلاً ..
كنت بالمطبخ عم اعمل فنجانين قهوة إلي و ل ميرا لأني بعرف انو دقيقتين و بترجع عالبيت .. سمعت صوت الباب انفتح و ركدت ميرا دغري عالمطبخ
ميرا : ناتالي ناتالي خلصي اللي بإيدك و خلينا نحكي
ناتالي : لك سلمي بالأول .. شبك بتضلك هبلة .. اركزي شوي .. عيب صار عمرك 18سنة.. يلي اكبر منك بشوي عندن ولاد
ميرا : ههههه خلص بحاول بس لاقيتلك فرصة عمرك يلي بتحلمي فيها ..
ناتالي : فرصة شو ؟؟ امشي نشرب القهوة بغرفتنا و نحكي .. هلآ بتجينا الست **** (يلي كنا مستأجرين عندا الغرفة) و بتبلش اسئلتا كالعادة على شو عم تعملو ؟؟ و عن مين عم تحكو ؟ و ....
ميرا : امشي يلا
رحنا لنشرب القهوة .. غرفتنا كانت عبارة عن تختين ، طاولة حواليها كم كرسي ، خزانة صغيرة ومراية عالحيط و جنبها كان في شي تلاتين صورة ل ليام و زين و هاري و نايل ولوي .. طبعاً كنا كل ما نحط وحدة ناكل بهدلة من الست **** لانو حضرتا بتخاف عالدهان 😅 بس نحنا منطنش كلاما و منخليون ..
ميرا : اليوم اجا لعندي واحد و كان بدو يشتري وردة .. صار يتطلع بالوردات وحدة وحدة و يفحصون .. استغربت كتير ليش هيك كان عم يعمل فسألتو ..
ناتالي : اي و بعدين ..
ميرا : قلي انو هو بدو وردة حلوة كتير مشان تمسكا حبييتو هو و عم يرسمها ولازم يكون كلشي بالرسمة حلو و متناسق لانو بدو يشارك فيها بمسابقة عالتويتر
ناتالي : و انتي دغري فكرتي انو ...
ميرا : فكرت انو انتي كمان لازم تشاركي و اخدتلك اسم الموقع و الشروط و كلشي ..
ناتالي : شكراً على تعبك .. بس ما لح قدم عليها
ميرا : ليش لك دبة ؟؟ صدقيني ما بتندمي
ناتالي : ميرا حظي و بعرفو . اكيد في الاف لح يقدمو. و اغلبون بيرسمو احسن مني
ميرا : يييييي مانك خسرانة شي .. حاولي
و بعد شي نص ساعة من المحاولات قدرت ميرا تقنعني و عملتني من هلأ اني فزت بالجائزة و صرت متل ليوناردو دافنشي..😅
ميرا : و هلأ شو بدك ترسمي ؟؟!!😎
ناتالي : اكيد ما لح ارسمك .. هههه
و مشيت خطوتين لعند وحدة من صور زين يلي حاطتا عالحيط
ناتالي : بتسمحلي ارسمك ؟؟
ميرا : اي ناتالي .. ارسمي زين .. ليش مين في اكتر من زين ممكن ترسميه بحب ..
ناتالي: اممم لح ارسم زين و ابعتا ... ييييبي بس كيف بدي ابعتا و ما عندي صفحة عالتويتر و لا حتى WiFi ؟؟
ميرا : لك باخدك دقيقتين عالكافيه نت و بتنحل القصة بس انتي ابدعي حياتي
ناتالي : اوك لح بلش من بكرة ..
تاني يوم قمت الصبح بكير و جهزت كل الغراض و بلشت ارسم .. رسمت عيونو .. رموشو .. انفو و شوي من التم ..😍😍 كنت عم ارسمو بحب كتير كبير .. زين بيعنيلي كتير .. هو شي روحي اكتر من انو فنان .. صح ما بيعرفني بس بحس اني بفهمو كتير ..
بالعادة لما ارسم حدا بالطريق برسم بسرعة كبيرة و ما بدقق عالتفاصيل المهم صاحب الرسمة يحبا بس لما كنت عم ارسم هي الرسمة بالتحديد كنت عم حس في شي ماسكلي ايدي و كنت عم اشرد كتير بالصورة الاصلية ..
رجعت ميرا الضهر عالبيت .. لاقتني قاعدة عالكرسي و حاطة صورة زين عالطاولة و عم اتأملا
ميرا : ناتالي خلصتي الرسمة ؟؟
ناتالي : ...
ميرا : ناتالي هيه بشو عم تفكري ؟؟
ناتالي : بحبو
ميرا : بعرف
ناتالي : بس ما لح اوصلو
ميرا : خلي عندك أمل ..
ناتالي : بتحسي انو ممكن تشوفيه لليام شي يوم ؟؟
ميرا : بتعرفي شو ؟؟ بالاول كنت كتير اتمنى اوصلو و كنت اتخيل حالي حبييتو بس هلأ فهمت شو يعني " ليام" عنجد .. كلشي بتمناه انو يكون مبسوط و مرتاح و ما بدي شي تاني ... بعرف انو اذا شافني و حكيتلو يلي بقلبي عنجد و عرف وضعي لح يكون عالقليلة فخور فيني .. و نفس الشي لح يصير معك انتي وزين .، انا متأكدة
ناتالي : اقنعتيني .. خلص لح قوم كمل الرسمة .. ادعيلي ..
ميرا : عم ادعيلك من كل قلبي حبيبتي .. انت بتستاهلي كلشي منيح ..
ناتالي : و انتي كمان😢
رجعت ارسم .. كنت مركزة كتير .. شغلت المسجلة جنبي و حطيت كل اغاني ون دي .. بصراحة كنت عم حس حالي بعالم تاني .. نسيت كلشي .. نسيت الماضي كلو ...
بعد يومين خلصتا للرسمة .. ميرا عجبتا كتير و يا حرام بطلت تعرف تحكي لما شافتا
ميرا : لك ناتالي .. حاسستو لزين بدو ينطلنا من الرسمة .. ولي ولي .. بعديا عني .. ارتعبت
ناتالي : فائلتيني ..يعني زابطة .. 😍😍
ميرا : زابطة زيادة عن اللزوم
عنجد ارتحت كتير .. كنت خايفة تطلع مو زابطة او فيها شي غلط ..
ناتالي : هلأ بدنا نصورا
ميرا : اكيد مو بموبايلي او موبايلك
ناتالي : لكن ؟؟!!😲
ميرا : تعي ناخود كاميرا الست *** منصورا و بعدين منبعتا على موبايلك
ناتالي : بس ..
ميرا : ناتالي اسكتي ... الرسمة بتجنن و اكيد ما لح تنزعيها مشان شئفة كاميرا
ناتالي : متل ما بدك .. بس انتي بتجيبيها
استنينا لحتى نامت الست*** و اخدنا الكاميرا من خزانتها .. صورنا الرسمة بعتناها على موبايلي و رجعنا كلشي لمحلو .
ميرا : ارتاح ضميرك هلأ؟؟
ناتالي : اي كتير .. الله يخليلي ياكي 😍
تاني يوم رحنا عالكافيه نت عملنا صفحة عالتويتر و بعتنالون الرسمة عالموقع الرسمي .. النتائج بتطلع بعد اسبوع .. مشان هيك قررنا نرجع بعد اسبوع ....
_________________