Түүнтэй учирсан өөр өөр учирлууд (Дууссан)

Дэргэдээс нь холдох мөч ба ахин учрал, бас хагацал

Хэн нэгний майхан дотор сэрэв. Дэргэд хэн ч алга. Нар майханг халуу дүйгүүлж бороо аль хэдийн зогссон ч үнэр нь анх орж байсан шигээ үнэртсээр л. Бүсгүй хаашаа явсныг мэдэхгүй юм. Ганц санаж буй зүйл минь гэвэл голын дэргэд түүнтэй хамт нэг шүхэрний дор сууж байсан. Хэсэг сууж байх зуураа хацар дээр нь үнссэн. Тэгээд мэдэхгүй ээ, санахгүй байна. 

Майхангаас гарч хэсэг алхалаа. Намайг энэ газарт хөл тавьсан үе шиг эл хуль болжээ. Бодлын мухлагийн зүг алхасаар хаалгыг нь онгойлгов. Өчигдөр таарсан бүсгүйтэй таарах болов уу гэсэн хүсэл агуулсан хэдий ч байсангүй. Онцын зүйлгүй эл хуль өдөр өнгөрч наадмын сүүлчийн өдрийн өглөө тэнгэрт үүл хуралдана. Хааяа нэгхэн хацар нүүр эсгэх бороон дуслууд хагас цаг орчмын дараа үүлтэйгээ хамт сарнив. Бүсгүйгээс сураг алга, тайзны зүгээс шинэ залуу хамтлагийн аяс чихэнд хүрэх нь бүсгүйг санагалзуулна. Бүсгүй тайзны урд байгаа мэт сэтгэгдэл хүчтэй мэдрэгдэх авч салхиний энэ эсгэрээнд сатааран бүсгүйд хүрч очихийг үл хүснэ.

Үд өнгөрч хаалтыг НИСВАНИС хийх улмаас тайзны урд гэлтгүй саравчинд хүмүүс ихээр цугларч тэр дундаас бүсгүйг эрэх явцаа шамдуулав. Залуугийн алхаа хүний хөлд дарагдаж нөгөө л байдаг үсний засалт хувцаслалт нүд нүүргүй балбах газарт яг л мянган хонины дундаас би хармагц танидаг шиг мянган бүсгүйн дундаас би олж таних тэр үнэгэн харцыг хайсаар удав.

Өнгө алагласан хувцас эргэн тойронд үзэгдэж эрээн даавуу нь салхи даган намирна. Зарим нэг нь нүднийхээ урд дугуй хар шил зүүснээс болоод танигдах шинж үгүй аж. Хүмүүсийн чиглэл талбайг зорив. Саравчны орчимд зогсох зуур тайз руу хартал "FoX eYe" гэх хамтлаг бөмбөрөө нүдэж гитараа уянгалуулж дуучин нь хоолойныхоо цар хүрээг шалгах нь үзэгдэнэ. Уг хамлагийн нэр хайж буй бүсгүйн шинж тэмдэгтэй аил тул ойроос сонсохыг хүсэв бололтой залуу тайзны зүг яарлаа. Бүсгүйн хоолойноос гарах дууны үг хэмнэлээ даган хөвнө.

Үүрээр жиргэсэн шувуунд чи
Үнэн сэтгэлээ орхиж дээ

Үнэгэн харцтай бүсгүйг чи
Үлгэр хэмээн итгэж дээ

Яагаад ч юм уг хамтлаг урьд өмнө энэ дуугаа сонсогчиддоо түгээж байгаагүй. Анхны цомог нь хэвлэгдээд хагас жил болчихож, Удахгүй удаах цомгоо хэвлүүлэх бололтой. Тэр бүсгүйн тухай дууг дуулсан гэхээр холбоотой эсвэл хэдэн мянгад нэг тохиох хувь төөрөг биз. Шилнийхээ цаанаас танигдахгүй юм.  Хоолой нь уг бүсгүйтэй төстэй авч яг тэр гээд хэлчих шинж төрх алга. Дуугаа дуусгаад баярлалаа, та бүхэндээ гэхэд нь л сая нэг анзаарав. Тэр байж. Миний хайж буй үнэгэн харцтай бүсгүй.