حلم

Chapter Three

*فتحت عنيها*
ملك (بتقول بصوت واطي و ابتسامة) : يااااااه مالك .. اسمك حلو اووووي ...
(حضنت المخدة) : انا ايه اللي صحاني بس .. مانا كنت معاه .. (بصت علي الحمام) ايه ده ! ده النور مفتوح .. حاااازم .. انت جيت ؟
حازم : اه باخد شاور .. قومي اجهزي عشان نازلين
ملك (قامت قدام المراية و بتسرح شعرها .. و بتبتسم)
*بعد عشر دقايق*
حازم : انتي لسة ملبستيش ..
ملك (واقفة قدام المراية و سرحانة)
حازم : يا ملك !
ملك : هه .. ايه يا حازم
حازم : البسي يا ماما
ملك(فتحت الدولاب) : ايه رأيك البس البلوزة البيضة الشيفون دي؟
حازم : ماشي حلوة
ملك (افتكرت مالك) .. بس دي شفافة
حازم : عادية يعني
ملك : هلبس حاجة تانية
_______________________________________

*في بيت اهل ملك بعد العشا في المطبخ*

ملك : و الله وحشتيني يا ماما
الام : و انتي كمان يا حبيبتي طمنيني عاملة ايه مع جوزك ؟
ملك : حازم طيب و كويس
الام : ربنا يهدي سركوا يابنتي
ملك : امال مازن اخويا فين ؟
الام : (سكتت)
ملك : في ايه يا مامااا
الام : مازن سقط تاني
ملك : تاني ؟ قولي عاشر بقي .. الواد ده مش ناوي يتخرج بقي
الام : اسكتي يا ملك ده احنا في نكد من ساعتها و ابوكي اتخانق معاه
ملك : و هو فين طيب ؟
الام : متلقح في الاوضة مكسوف يوريكوا وشه
ملك : يا ماما مازن مكنش ليه هندسة و الله .. الحاجة اللي بتبقي بالعافية دي عمرها مبتمشي
الام : و انتي عايزة ابني يبقي اقل من ولاد ذكري ؟ ده ما شاء الله عليهم دكاترة و مهندسين .. محدش خاب خبيتكم
ملك : ياا ماما و احنا مالنا بعمي ذكري .. مازن كان جايب ٨٠٪ .. تدخلوه هندسة برده و هو مش عايز و لا قادر يمشي فيها .. طب اهو بقاله تمن سنين في هندسة .. بقي احسن من ولاد عمي ذكري ؟
الام : بقي انا اللي كنت هقولك خشي عقليه .. و خليه يذاكر عشان يتخرج .. الاقيكي بتقولي كده
ملك : انا داخلاله يا ماما
الام : متنسيش تملي دماغ الواد بكلامك ده
ملك : هي دماغه مليانة بالكلام ده من زمان .. (و مشيت)
*بتخبط علي باب اوضة مازن*
مازن : مش طافح
ملك : انا ملك
مازن (فتح)
ملك(حضنته) وحشتني
مازن : و انتي كمان
ملك : كده متخرجش تسلم عليا
مازن (دور ضهره و وقف في الشباك)
ملك (قفلت الباب و قعدت علي الكنبة) تعالي اقعد جنبي
مازن : ابسطتي بقي في Maldives؟
ملك : الحمد لله
مازن : كويس
ملك (سكتت) .. مازن
مازن : انا عارف ان امك بعتاكي تتكلمي معايا في حوار الجامعة
ملك : لا مش كده
مازن (وقف) يبقي طبعا جاية تقطميني بكلمتين ..وفري كلامك لنفسك
ملك (وقفت) : انا جاية انصحك يا مازن .. انا اختك مش عدوتك
مازن : مش محتاج نصيحة حد
ملك : انت بتعاقب مين ؟ انت بتضيع عمرك ..
مازن : بقولك ايه (بيزعق) انتوا متغصبوش عليا ادرس حاجة مش عايزها و كمان انجح فيها .. انا من الاول قايل عايز ادخل computer science فاكرة ابوكي عمل ايه ؟ فاكرة لما قالي يا هدنسة يا هقعدك من التعليم و اشغلك بواب ملكش قيمة ..
ملك : (بتزعق) علي الاقل البواب مسئول و بيشتغل و وراه بيت و عيال .. مش صايع زيك
مازن : طب قومي من وشي بقي يا ملك الله يرضي عليكي
ملك : انت بتكلم اختك الكبيرة كده ازاي ؟
مازن : انا مش عاوز اسمع كلام من حد .. و المواعظ دي متهمنيش و لا هتاثر معايا و لا كلامك ده هيدخل دماغي بتلاتة مليم ..
ملك : ماااازن !! انا بنصحك لنفسك مش ليا
مازن : تنصحيني اه .. انتي تروحي تنصحي نفسك ! ماشي ؟ انتي فاشلة يا ملك .. و زيك زيي .. انا فاشل في تعليمي عشان اتغصبت عليه .. و انتي فاشلة في حياتك عشان اتجوزتي بالغصب برده
ملك : (بتعيط) انت بتقول ايه ..
مازن : بس علي الاقل انا اتغصبت بالعافية .. لكن انتي اللي غصبتي نفسك علي الجوازة دي !
ملك (بتعيط) اسكت
مازن : و لا انتي مش فاكراني فاهم انتي اتجوزتي حازم ليه .. اجري شوفي نفسك و فشلك في حياتك اللي هي اصلا لسة مبتدتش ! و انصحي نفسك قبل متنصحيني .. علي الاقل انا عمري مهتجوز واحدة لمجرد اني عايز ..
ملك : (قاطعته) كفاية يا مازن ( و مشيت)
(خرجت ملك بتعيط و جريت علي البلكونة )
ملك : حازم يلا نروح دلوقتي
الاب : مالك يا ملك !
حازم : في ايييه ؟؟
ملك : مفيش مصدعة و عايزة اروح انام لوسمحت يلا يا حازم
حازم : لو تعبانة انا ممكن اسيبك تباتي هنا
الاب : فكرة حلوة و الله
ملك : لا احنا ورانا سفر بكرة ..
الاب : قوم شوف مراتك يا حازم و طمني لما تروحوا
حازم : يلا يا ملك
_______________________________________