مهمة مش ساهلة ، انك تنقذ انسان !
وياسلام لو انت الى وليت نفسك المهمة دى من غير م حد يكلفك، كل وقت بيمر فى خطر ع حياة حسن
مبقتش تنام وتفكيرها بقى اكتر
بذكائها اتوصلت ان اول خطوة تعملها ...توصل للدكتور المختص لحالة حسن
وبعدها تتوالى الخطوات
جهزت فطار بذكاء ،ونزلت وكأن تعزمه عالفطار وتبتدى اول جولة
حسن: ايوة ..
(ابتسم) تكتك حبيبى
تقى: انا عملت حجات كتير كده للفطار مع نفسي وانا سهرانة وقولت لازم تدوقها
حسن: مستعجل ياروحى خليها مرة تانية
تقى: لالالا مش هسيبك هتاكل منها ودلوقت حالا وهتقولى رأيك
حسن: ممممم طيب اعملى ٢كابوتشينو لحد م اغير هدومى
تقى انتهزت ان فونه عالشاحن برة ،جريت مسكته
دورت لاقت الاف الاسماء الدكتور فلان والدكتور علان
هتعمل ايييه؟
اكيد كل اصدقائه او معظمهم دكاترة زيه ،هتعرفه مين فيهم
الوقت بيعدى
ولازم تتصرف بسرعه قبل م يطلع ويشوفها ، بعتت بسرعه كل ارقام الدكاترة لفونها
وخلصت وبتقفل وبتحطه عالشاحن
طلع حسن من جوه !
♦♦♦♦♦♦♦♦♦♦♦♦♦♦♦♦♦♦
"هو عمو حسن بطل ليه يوديكى للدار يا جميلة"
جميلة :(بتلف طرحتها) عشان بقيت اعرف اروح لوحدى
(مسكت دماغها)
اختها: مالك!
جميلة: دماغى وجعانى اوى ، انتى مش بتعرفى تقرى
اختها: اه
جميلة: شوفى اى دوا فالدرج مكتوب عليه بتاع صداع وهاتيلى حباية
♦♦♦♦♦♦♦♦♦♦♦♦♦♦♦♦♦♦
حسن: (شافها ومعدى وقرصها من خدها) بتعملى ايه فالموبايل ياقردة
تقى: ابدا بشوف مسحت اسماء البنات ولا لا ياخويا
حسن: اكيد لأ
تقى: يارخم، انا اديتلك فرصة تنتر كل واحدة كده برة حياتك بالذوق ومن غير م اعرف
وانجز ها
حسن: انتر ! دى لهجة بنت كيوت ولا سواق ميكروباص
عملتى الكابوتشينو ؟
تقى: هاه!
نسيت هاعملك حالا
حسن: خلاص اتأخرت والله ، خليها مرة تانيه
