قصص علمتني الحياة

اين تعيش السعادة؟

#أين_تعيش_السعادة
#مال_الشام

-1-

ملاك: انا بدي اتطلق...هاد اخر قرار عندي

علي: طلاق!! لك بدك تطلقي يا اختي لهون وصلت معك؟؟ 

رنا: صلي عالنبي ملاك ما بتوصل الامور لهون هلا بيجي جوزك و بتتصالحو

ملاك: ايه بعرف انو هلا بيجي و منتصالح و منرجع لذات الحياة بس انا مليييت انا مليت عم تفهمو
انا ماني حيط
ماني حيوان بدو ياكل و يشرب و ينام.... انا تعبت منو
انسان بارد... بارد و ناشف...  لك شو شايف حالو رئيس وزراء،  ليك اخي ازا ما بتتحملني ببيتك عادي بستأجر بيت لحالي والاولاد رح خليهن عندو

علي: رنا انا اعصابي تلفت منها انتي احكي معها انا طالع اخد نفس لان اختتتنقت
وطلع و طرق الباب وراه بقوة
ملاك ضلت تبكي و رنا حست الوضع ما بطمن مسكت الاستغفار و صارت تدعي ما ينخرب بيت اخت جوزها

ملاك: رنا... انتي ست متلي عم تفهمي علي مو؟  انا مو مبسوطة بحياتي حاسه حالي متل اللآلة بفيق اطبخ و نظف البيت و اركض ورا الاولاد و حل مشاكلهن... بكون بحاجتو يرجع يحسسني انو مقدر تعبي... بكون بحاجتو يفوت و بأيدو كيس صغير و يقلي تعي هاد الك..  ممكن يتزكر يجيب شي للاولاد او يجيب شي ضروري للبيت بس ما بتزكر شي بخصني.. 
يكون ناطرة يفوت يبوسني ع جبيني يقلي اشتقتلك
بشتهي  يقلي كيف كان نهارك حبيبتي؟ 
يحكيلي لا تطبخي اليوم بدي ياكي بس تدللي و ترتاحي
طيب ع الاقل ياخدني مشوار كل فترة لغير نفسيتي،  يعتم بالاولاد عني
الوحده منا ازا جوزها ما حس فيها شو بدا تعمل بحياتها شووو شووو فهميني مشان الله

رنا: لا حول ولا قوة الا بالله،  لك طيب انتي قليلو بحب الورد...  بحب الدلال بدي هيك وهيك... اعملي جو رومنسي و هالقصص

ملاك: والله  بعمل هيك اوقات بيطنش و اوقات لما كبر الموضوع بوعدني يتغير الوضع... هيك بعيش يومين حلوين و منرجع لحالتنا،  انا خلص تعبت

رنا: لك يا اختي هاد الرجال المشورب هو ذاتو و نفسو الطفل الصغير الي بضل يحلم بلعبه،  بضل ييكي لتجبلو ياها امو
و هو ذاتو الي بتشوفيه ماسك هاللعبه و عم يقطعها و يزتها عالدرج بعد فترة و يدير ضهرو و يمشي... ليش متأملة فيه كتير

ملاك: هي اللعبه ما فيها تعمل شي بس انا فيني اعمل و كتير كمان و ما رح اقبل بهل حالة ليكك انتي و اخي ما بكن شي و مرتاحين  ليش مكتوب علي الشقا لييييش 

رنا: هههههههه

ملاك: ليش عم تضحكي!! 

رنا: يا ملاك يا حبيبتي انتي متل اختي الصغيرة... انا كم سنه اكبر منك؟ 

ملاك: 9 سنين

رنا: ياعمري انا مرق علي قد شعر راسي و تعزبت متلك و مرقت علي اوقات صعيه،  استعنت بالله و كملت حياتي... 
انا بعد 10 سنوات من زواجي عرفت وفهمت  ان الزوج الحنون مو اللي بيجيب دباديب لا الي بجيب كيلو بندورة وهو راجع ههههه  و تعزبت كتير لفهمت  ان الست الشاطرة مو هي اللي بتعرف تطبخ و تغسل و توفر مصروف البيت، هي اللي بتعرف تخلي بيتها سعيد علي قد ما تقدر و بتعرف تكسب جوزها بزكائها
ااااخ و شو انصدمت لاتقبل واقع انو  الحب فعلا مو كل شي كنا صغار و نتخيل انو رح نتجوز و نضل عايشين بعسل و حب ..بس لا المودة والاحترام  هن احلى شي  . و ازا بدك اهم من الحب بكتير
الايام عودتني ان كلمة يسلمو  مهمة كتير و كلمة تصبح على خير حبيبي اهم من كل كلام الغزل،  و ازا هو قلي ياها كلمة و انت من اهلي بتختصر كتير حكي.. 
ههههههه واهم شي تعودت  ما اغسل الغامق  مع الابيض . بلحظات حنونه اتطلعت بعيون جوزي و فهمت انو كاسة الشاي وهو بيحكيلي عن يومو احلي شي  بالدنيا
كتير عانيت بس ربك فرجها علي.... الزواج اصعب تحدي
الست الي بتنجح فيه هي ست شاطرة و بتستاهل نجاحها.. 
غالبا فهمت ان الخناقة ممكن تخلص لو سكتي وعاتبتي بعدين ووفرتي ع حالك عياط و حكي عالفاضي. 
وانو اللي بيصالح التاني مو هو الضعيف،  لا هو الحنون
يا ملاك لزواج حلو لو نحنا بدنا يكون حلو،  فهمتيني؟  #مال_الشام