فنزلت ليلى لمعرفة هذا الشخص المجهول ، وبمجرد ان رات هذا الشخص حتى احتضنته بفرحة عارمة قائلة بسعادة : مروان
فقال لها مروان بسعادة : وحشتينى يا ليلى
ليلى : وانت اكتر يا مروان ، ثم صاحت بصوت عالى : يا ماما يا ماما
مروان وهو يضع يده فوق فمها : اهدى يا مجنونة انا جيت علشان اسلم عليكى انتى لان لو ماما شفتنى مش هتسيبنى امشى وانا لازم اروح الشركة تانى ، ثم قال بمكر : وبعدين من امتى وانتى بتقولى لها يا ماما
ليلى : هبقى احكيلك بعدين
مروان : انا ماشى سلام
ليلى وهى تلوح له بيدها : سلام
فلاش باك لما حدث قبل قليل :
استقبل احمد مروان بسعادة شديدة الذى يعتبره ولده فلقد توفى والد مروان عندما كان فى الثالثة من عمره ، كما اعتبر مروان ايضا احمد والده فهو من رباه بعد وفاة ابيه ، مروان بسعادة : ازيك يا بابا عامل ايه
احمد : الحمد لله انت ايه اخبارك
مروان : الحمد لله ، ليلى فين
احمد : فى البيت عندها واحدة صاحبتها
مروان بتهكم : اكيد سالى
احمد : لا مش سالى عائشة تقريبا هى متخانقة مع سالى
مروان : انا هروح اسلم عليها وبعدين ارجع الشركة ومش هعرف ماما سمية علشان انت عارفها
ضحك احمد قائلا : ماشى
عودة للوقت الحالى :
وفى نفس الوقت جاءت عائشة وهى تنظر للشاب الذى خرج باستغراب كبير لكنها لم تهتم وسلمت على ليلى بابتسامة :ازيك ياليلى
ليلى : ازيك يا حبيبتى عاملة ايه
عائشة : تمام الحمد لله
شدتها ليلى من يدها : تعالى اعرفك على ماما
عائشة : استنى بس ماما مين
ليلى : ماما سمية
عائشة : اه
ليلى : يلا بقى
سلمت سمية على عائشة وبعد التعارف والسلام اخذت ليلى عائشة من يدها ليذاكروا قليلا فى غرفتها وبعد ان انهوا المذاكرة ، قالت عاشة بتردد : ليلى انا كنت عيزاكى فى موضوع
ليلى : خير يا عائشة
عائشة بتردد : يعنى...اا انا..... ااااااا...
ليلى بقلق : قلقتينى فى ايه
عائشة : خلاص مش دلوقتى
ليلى : قولى بقى
عائشة : ايه رايك تتحجبى
ليلى باستغراب : انا محجبة على فكرة
عائشة بهدوء : طيب لما انتى محجبة بتبينى جزء من شعرك ليه
ليلى : علشان دى الموضة
عائشة ضاحكة : يعنى لو عملوا موضة شوال بطاطس هتلبسيه
ضحكت ليلى بشدة وقالت : اكيد لا
عائشة : يبقى مش اى حاجة تبقى موضة اعملها لان الموضة دى ممكن تكون مخالفة لشرع ربنا زى ان انتى تطلعى شعرك برة الطرحة ده كدة حرام لانه مخالف لشروط الحجاب
ليلى بفضول : هو الحجاب ليه شروط
عائشة : اه تحبى اقولهالك
هزت ليلى راسها بمعنى نعم ، فاكملت قائلة بهدوء : اول حاجة ان يكون ساترا لجميع البدن يعنى مش تكونى لبسه بلوزة قصيرة ومبينة نص ايدك وطرحة مبينة شعرك و تقولى انا كدة محجبة لا لازم يكون مغطى جسمك كله وشعرك كله ماعدا الكفين و الوجه
ليلى : يعنى انا كدة غلط خالص على العموم كملى
عائشة مكملة : تانى حاجة ان لا يكون زينة فى نفسه يعنى ميكونش فيه حاجات لافته للنظر او لونه فاقع اوى او حاطة مكياج لان ده كدة لافت للنظر، تالت حاجة ان لا يكون خفيفا يصف ما تحته بمعنى متكونيش لابسه طرحة شفافة او بلوزه شفافة وتقولى انا كدة محجبة لان هو طويل او واسع لكن شفاف علشان كدة ده مينفعش يبقى حجاب رابع حاجة ان لا يكون مبخرا او معطرا يعنى متبقيش منفذه كل شروط الحجاب وتحطى برفان يبقى انتى كدة ضيعتى الدنيا خالص لان فى حديث عن الرسول ( صلى الله عليه وسلم ) بيقول : ""أيما امرأة استعطرت فمرت على قوم ليجدوا ريحها فهي زانية، وكل عين زانية ".خامس حاجة ان يكون فضفاضا غير ضيق يعنى ميبقاش ضيق يبقى واسع وفضفاض سادس حاجة ان لا يكون لباس شهرة يعنى متكونيش لبساه علشان هو غالى او بالمبلغ الفلانى او لبساه علشان الناس يقولوا دى محترمة لا احنا بنعمل كدة علشان ربنا سابع واخر حاجة ان لا يشبه لباس الرجال او الكافرات بمعنى متلبسيش حاجة انتى عارفة انها للرجال زى القمصان والبناطيل وما شبه لقوله صلى الله عليه وسلم": ليس منا من تشبه بالرجال من النساء، ولا من تشبه بالنساء من الرجال". رواه أحمد. او حاجة انتى عارفة ان الكافرات بيلبسوها زى الممثلين او كدة لان قال صلى الله عليه وسلم: "ومن تشبه بقوم فهو منهم." رواه أحمد وأبو داود. بس يا ستى هما دول شروط الحجاب
ليلى : اه يعنى انا كدة لا امت بصلة للحجاب
عائشة بابتسامة : " بسم الله الرحمن الرحيم" (وَقُل لِّلْمُؤْمِنَـاتِ يَغْضُضْنَ مِنْ أَبْصَـارِهِنَّ وَيَحْفَظْنَ فُرُوجَهُنَّ وَلاَ يُبْدِينَ زِينَتَهُنَّ إِلاَّ مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ ) صدق الله العظيم
