ليل وكوخ وشتاء

نهاية البداية

رجعنا مشينا للسيارة ... .. وبعد ساعة وقفتلنا سيارة كان معها كابلات وشحنا البطارية ... ... ورحنا عالإستراحة الفندقية ... تحممنا وغيرنا اواعينا ... وضلينا فيها ليلة... بهالليلة ... حكينا كتير ... وتعرفنا جد على بعض ... ويا بيّ شو ضحكنا  ... سألت عبير : كيف استحملتيني فترة الخطبة جد كنت لا أطاق ....
عبير: بتعرف اول مرة شفتك فيها ...قلبي رج ... حسيته بده يطلع من مكانه ... نفسي داق ... واعرقت ... واخجلت منك كتير ....
انا : هههههه كل هاظ صار فيكي ...
عبير :اه حبيتك من أول نظرة ...
انا: انا بصراحة ما شفتك ... بس اكيد لو شفتك كان متت فيكي ....
عبير : مهو اصلاً اللي عجبني فيك انك راكز ...
انا: بس بعدين ما اندمتي...
عبير: بصراحة ... قضيت نص الخطبة عياط ... ليش انت هيك معي ... وليش ما حبيتني ...
مسكت ايدها وبستها وقلت : انا اسف عنجد .... بوعدك رح اعوضك عن كلشي ... عفكرة بحبك ...
( وخجلت واحمروا خدودها  وحطت راسها بالأرض) كملت : يسعدلي الخجلان ...
ضليناا نحكي لقبل الفجر بساعة ... وغفينا واحنا بنحكي ...
... كانت ليلة من اجمل ليالي حياتي.... اصحينا الفجر وصلينا واتسهلنا ...

ووصلنا عمان عال السبعة بليل ... دقينا الباب .... و فتحت امي : يخرب بيتكم ولكو ما تحكو انكو جايين ... (واخذتنا  امي بالحضن ...) دخلنا وسلمنا عابوي واخواني ... واختي ...

قعدنا اسبوع بالزبط بعمان ... وفرصة نشوف الحبايب  ... ولما ارجعنا عقطر قررنا انه انبلش  صفحة جديدة ... وسبحان الله يمكن اشي بسيط يهدم علاقة ... وموقف تاني صغير يبنيها .... مشان هيك ما نستصغر اي اشي منواجهو بالعلاقة... الكلمة الحلوة مهمة ... واللمسةالحنونة  مهمة ... والروح المرحة مهمة ... والحنية مهمة ...

اتعلمت انه المرأة بدها حنان ... وبدها حب ... وبدك اتدير بالك عليها متل الطفل الصغير .... لازم تراعيها وما تعتبر انه زواجك منها بس للخدمة ... المرأة بتخدمك من عيونها ... اذا اشبعتها عاطفياً ... لازم تحسسها انها اول اولوياتك ... مو مهم شو اتطعميها وشو اتلبسها المهم كيف تعاملها ....
" المرأة بطبيعتها تحب ان تقدم لها  الكلمة اللينة والطعام الخشن ... اكثر من ان تقدم لها الطعام اللين والكلمة الخشنة "
تمت~