استيقظت شمس من نوم متقطع.....وما إن استيقظت حتى نزلت إلى الأسفل لترى والدتها وقد جلست تتصفح بعض الجرائد.... شمس بصوت عالى وهى تتجه نحو والدتها: صباح الخير يا مامى
أجفلت سوسن فقالت بفزع: يابت خضتينى...صباح النور
شمس وهى تدير رأسها فى أرجاء المنزل: هو بابا مشى؟؟
سوسن وهى مازالت تنظر إلى الصحيفة: أه مشى
وهنا جاءت فتحية تحمل كوب من القهوة لتضعه أمام سوسن.... سوسن: شكرا يا فتحية
شمس: اعمليلى كوباية قهوة أنا كمان يا فتحية...بس عايزاها سادة
أومأت فتحية برأسها وهى تقول: حاضر يا ست شمس
جلست شمس على مقعد الأنتريه الوثير....وهى تقول: شايفاكى مهتمة أوى بالجرايد يا مامى....إيه فى حاجة جديدة؟؟
سوسن وهى تطوى الجريدة: ابدا.... أخبار النهاردة زى أخبار كل يوم مافيش جديد أومأت شمس برأسها...أما سوسن فتابعت:شمس...أنا عايزة أسألك سؤال
شمس بترجى: بس والنبى يا مامى مايبقاش ليه علاقة بالمحاضرات إياها... علشان أنا حاسة انى دمغى هتتفرتك...
سوسن بابتسامة صفراء: لا يا شمس...ماتقلقيش الموضوع مالوش علاقة بأى محاضرات...أنا بس كنت عايزة أسألك عن رأيك فى حسام أخو طنطك عبير
شمس بلامبالاة: من ناحية إيه يعنى؟؟
سوسن: من كل النواحى يا شمس...يعنى شكله...طريقة كلامه....شخصيته؟؟
شمس بخبث: فى إيه يا مامى بالظبط؟؟....قوليلى بتسألى ليه وأنا أجاوبك
سوسن بنفس الخبث: بت يا شمس....ماتقعديش تلفى وتدورى....أنتى وقفتى مع حسام إمبارح طول الحفلة...ماحستيش فى كلامه بأى تلميحات كده ولا كده؟؟
شمس بابتسامة ماكرة:أكيد كان فيه تلميحات....بس ده يفرق فى إيه؟؟.....أنا مش حاسة بأى حاجة ناحيته...يعنى حاساه عادى أوى
سوسن:خالص خالص؟؟
شمس: يا مامى انا لسه صغيرة....ولسه بدرى اوى على ما افكر فى حاجة زى كده....يعنى ماتحطيش فى دماغك اى حاجة علاقة بالعرسان والجواز والحاجات دى...إ لا بعد ما اخلص دراسة
سوسن:طيب يا ست العاقلة....بس يارب تفلحى فى دراستك
شمس محاولة إغلاق أى باب للمناقشة فى الدراسة: إن شاء الله
وهنا جاءت فتحية تحمل كوب القهوة لتضعه على المائدة و....
شمس بعصبية: إيه اللى أنتى هببتيه ده؟؟
فتحية بلهجة أقرب إلى البكاء: أنا أسفة خالص يا ست شمس....والله وقع غصب عنى
سوسن: مالك يا فتحية...أنا حاسة أنك مش مركزة خالص الأيام دى....هو لسه الصداع بتاع كل فترة ده بيجيلك ولا إيه؟؟
فتحية بأسف وهى تطأطأ برأسها: أه يا ستى....كل شوية أحس أن الدنيا بتدور بيا كده...ومابعرفش أتلم على نفسى
سوسن بهدوء: طب ماتروحى تكشفى يا فتحية
فتحية: لا يا ستى أنا هبقى كويسة
شمس بضيق: يا ستى ماتروحى تكشفى بدل ماتفضلى تكسريلنا وتوقعيلنا فى الحاجة
رمت سوسن شمس بنظرة نارية تحمل معنى(عيب كده)
أشاحت شمس بيدها وقامت من فوق مقعدها واتجهت إلى غرفتها.....
سوسن بهدوء: لازم تروحى تكشفى يا فتحية...وأنا هديلك أجازة علشان ترتاحى شوية....أنتى بقالك كتير ماخديش أجازات
فتحية: إزاى أجازة بس يا ستى؟؟ومين هيشوف طلبات البيت؟؟
سوسن وكأنها تذكرت شيئا للتو: أنتى مش كان ليكى أخت؟؟
فتحية بتوتر: أختى مين؟؟...سنية؟؟
سوسن: أيوة سنية...زمانها كبرت دلوقتى...قوليلها تيجى تشتغل مكانك وأنتى فى فترة الأجازة
فتحية بتردد: بس يا ستى سنية مش بتاعة شغل خالص...وأنا عارفة أنها مش هتريحك
سوسن: قوليلها بس وخليها تبجى تقابلنى بكرة
فتحية: تحت أمرك يا ستى...زى ماتحبى
سوسن: يالا بقى أنتى يا فتحية روحى دلوقتى....وما تنسيش تبعتيلى سنية بكرة
فتحية: ربنا يخليكى ويعمر بيتك يا ست هانم
وانصرفت فتحية لتجمع أغراضها وتهم بمغادرة القصر
*****************
رأيكوا
