فى الصباح الباكر كان هناك طرقات متواصلة على باب منزل علي
*أشرف بصوت عالى وهو يتجه نحو الباب: أيوه يا سيدى ياللى بتخبط أنا جاى أهو.
*وما أن فتح أشرف الباب حتى استند إلى الدرفة المغلقة وهو يقول بابتسامة واسعة: أهلا أهلا ده إيه النور ده على الصبح؟!
*سنية بحدة:إيه ياخويا ساعة عشان تفتح الباب؟؟
أشرف بهدوء:معلش يا جميل أصلى كنت بفطر أنا و علوة ماتتفضلى معانا.
*سنية و قد تهللت أساريرها فجأة: والله؟هو سي علي لسه منزلش؟ طب كويس ده أنا كنت عايزاه فى موضوع مهم.
وبدون كلمة إضافية أزاحت أشرف و دخلت......
*سنية بدلع: إزيك يا سي علي.
*على بابتسامة هادئة و هو جالس على مائدة الطعام: إزيك أنتى يا سنية.
*سنية بابتسامة واسعة: تسلم يا غالى أنا بخير بس أنا كنت عايزاك كده فى موضوع مهم.
*على بجدية: موضوع إيه؟؟
*سنية: بص يا سي علي أنا هخش فى الموضوع علطول أنا بشتغل عند ناس أمرا ولاد أصول وطيبين وكنت سمعت كده طراطيش كلام منهم إن العمال فى مصنعهم عاملين مظاهرة بابين و لا معرفش إيه لأ استنى هى كلمة كده كنت سمعتها فى التلافازيون قبل كده معناها إنهم يعنى مش عايزين يشتغلوا.
على: إضطراب عن العمل؟؟
*سنية: أيييييييوة عليك نور ياخويا صدق إللى قال العلم نور يا ولاد.
*أشرف: هو إللى قال العلم نور قال بعدها (يا ولاد) ؟؟
*التفتت سنية إلى أشرف و قالت بعصبية: ياخويا أنا مش عارفة أنت واقفلى على الساقطة واللاقطة كده ليه ماتهمد شوية
*هم أشرف بقول شئ إلا أن علي قاطعه وهو يقول بنفاذ صبر: ياستى كملى كلامك...بعد ما العمال عملوا إضطراب إيه إللى حصل؟؟
*سنية: أه العمال عملوا اسمه إيه ده أوم إيه بقى سيدى هيمشيهم و يجيب عمال غيرهم ها قلت إيه؟؟
*على بحدة: قلت إيه فى إيه؟؟ مايمشيهم دخلى أنا إيه؟؟
*سنية: يوه يقطعنى أنا نسيت أقولك إن مصنعهم بتاع عربيات هو مش أنت برضه بتاع عربيات يا سي علي؟
*علي بغيظ: إيه بتاع عربيات دى؟؟ ما تقولى أسطى أحسن
*سنية ببراءة: والله ما أعرف إنك كنت أسطى يا سي علي...مش أنت كنت بتشتغل فى ورشة؟؟
