My Love For You Will Never Die (COMPLETED)

CHAPTER SEVEN

Dalawang linggo bago ang kasal ng magkasintahang Jiro at Nikki, naisipan nilang magset ng date kasama ang bestfriend nila. Napagtripan kasi nila na i-build up ang dalawang taong malapit sa kanila. At walang kamalay-malay ang mga ito sa kanilang mga plano.

“There he is,” wika ni Jiro nang makitang papasok mula sa entrance door ng restaurant ang kaibigan.

“Hi guys! Sorry I’m late traffic kasi,” paliwanag ng bagong dating.

“Hindi ka naman late, actually napaaga lang talaga kami ng labing limang minuto sa napag-usapang oras,” biro pa ni Nikki.

Napakamot na lamang ito sa batok dahil sa tinuran ng fiancée ng kaibigan.

“Hi, Xandra,”

Noon lang natauhan si Xandra dahil sa labis na pagkabigla, she wasn’t even expecting na ito pala ang tinutukoy ng kaibigan niya na bestfriend ng fiancé nito.

“Magkakilala kayo?” halos magkapanabayang wika ni Jiro at Nikki.

“She’s my long lost friend,” nakangiting wika niya habang papa-upo sa nakalaang silya para sa kanya.

“May long lost friend ka pa d’yang nalalaman, hindi naman tayo friends. Sa totoo lang naging magkaklase kame sa P.E. noong college.” That was Xandra.

“So, you’re not considering me as one of your friend, saklap naman,” nawala ang ngiti sa mga labi ni Marco.

“You’re acting like a kid Marco, hindi bagay sa 'yo” naiiling na wika ni Jiro.

“So, hindi na pala namin kayo kailangang ipakilala pa sa isa’t isa,” wika naman ni Nikki sabay tingin nito nang makahulugan sa kaibigan, habang ang huli ay matalim na tingin naman ang ipinukol sa una. Na para bang nagbabanta at nagsasabing h’wag kang magkakamaling magsalita.

Masaya ang naging takbo ng k’wentuhan nila over dinner, doon nalaman ni Marco na si Xandra pala at ang composer ng dalawang paborito niyang kanta ay iisa. Kaya naman hindi na siya nagpatumpik-tumpik pa at humingi siya ng autograph mula sa dalaga.

“Ikaw Marco, kailan mo balak sundan ang yapak ni Jiro sa paglagay sa tahimik,” seryosong tanong ni Nikki sa binata.

 “Wala pa sa plano ko ang bagay na iyan. Isa pa masyado pang maaga para magsalita, idagdag pa na hindi ganoong kadali ang magpakasal lalo na kung wala ka namang papakasalan,” paliwanag nito.

“Sabagay, mahirap nga naman 'yong magpapakasal ka, tapos wala ka namang papakasalan, ano 'yon parang tanga lang?” natatawang sagot ni Nikki sa tinuran ni Marco.

“So, look for the one na lang,” dagdag pa ni Nikki.

“Alam mo Nikki, hindi naman natin kailangan pang hanapin ang taong ating mamahalin, ang taong gusto nating pakasalan at makasama habang buhay, sapagkat sila ay kusang darating sa buhay natin, sa mga panahong hindi natin inaasahan.” Seryoso pa nitong wika, nang mga sandaling iyon gusto niyang lingunin ang kinaroroonan ni Xandra.