حينما تكسُرنا القوة
حينما يجِبر كسرنآ الضعف
حينما نعكس كُل شي
ندرك حينها ان حياتنا مجرد
مزاد لـ ارواحنآ
ندرك حينهآ أننا لُعبة للحياة
تتسلى بنا كيفمآ تريد
تفعل بنا تارة كذا ، وتارة كذا
ونحن فقط ننكسر ، لا جديد
في الحياة ...
حامد : ابيك تخلي عندك امانه , لمدة اربع شهور
خالد بعدم فهم : اخليها عندي , امانة وش ..
حامد بـ اسلوب اغراء : المليون و الميتين بتجيك , و زيادة على كذا , لك منصب في الشركة , و بيتك بيبقى عندك , اللي ابيه منك شغله بسيطه , بعطيك امانه , خلها عندك اربع شهوور بس , اقطع اخبارها عن العالم , ما ابي احد يعرف انها عندك , ولا قدرت تذبحها أذبحها
وقف خالد وهو يقول : دقايق و راجع عن أذنك
طلع خالد من الغرفة , وهو متوتر , أذبحها , من هذي اللي يهون عليه ذبحها , طلّع جواله من جيبه , شغل التسجيل , ما يدري ليه طرت في باله هذي الفكرة , ولا يدري وش خر في باله هذا الوقت , رجع دخل لـ الغرفة
جلس مقابل لـ حامد : وش المطلوب ؟
حامد بدأ محاولة الاغراء مره ثانية : ميلون و ميتين الف بتجيك زي السلام عليكم.. بترتاح في حياتك راحة ما تتـ......
خالد بدأ يعصب ما يحب اسلوب اللف والدوران : خلك واضح و قلي وش هالأمانه ..
حامد وهو يناظر في عيون خالد : الامانه مافيه ابسط منها , بنت
خالد: بنت ؟
حامد هز راسه : بنت , تاخذها وتخليها عندك اربع شهور , بعدها الوجه من الوجهه ابيض
خالد وهو يناظر في حامد , الموضوع مريب , كيف يخلي عنده بنت , وبعيداً عن كل شي , كيف خالد يسوي هالشي , وقف خالد وهو يقول : يا توضح لي سالفة هالبنت ولا الوجهه من الوجهه ابيض على قولتك
حامد : ترى موب انا اللي محتاجك يا خالد , انت اللي محتاجني اكثر , ما قدامك وقت , كلها ست ايام و بيتك ينوخذ منك .. فكر زين واعرف مصلحتك , وخل مبادئك وقتها تنفعك
شد على يدينه خالد , وكأنه مسكه مع اليد اللي تعوره , قال وهو يحاول يهدي نفسه : طيب وش سالفتها , ليه تبي تخفيها ..
حامد بـ كذب : مريضة نفسياً , ماهيب صاحيه , وحنا خايفين من الفضيحه من وراها , ابعدها هالفتره بس لين امها تصدق انني دخلتها مستشفى الامراض النفسيه , وتقتنع انها ما تقدر تزورها , فهمتني
خالد : وبعد هالاربع شهور ؟
حامد رفع يده في وجهه خالد : مالك خص ...
خالد بتردد : بس ..صعب الموضوع يا حامد .. وانا ..انا عزوبي .
حامد بفرحه ماهي مبينه , حس انه قدر يقنع خالد : ما عليك , الموضوع هذا حله بسيط , تزوجها , خلها عندك اسم انها محلله لك , و وظيفتك موجوده وراتبك بيمشي طول هالاربع شهور .. واذا احد سألني عنك , لا تخاف بـ اقول لهم اني راسلك لـ برا البلاد , وش رايك ؟
جلس خالد على الكرسي , الشي اللي بيسويه يخالف كل شي فيه , أولها مبدأه اللي يعيش عليه , لكنه اضطر : متى بتعطيني الفلوس ؟
حامد : لو بغيت ألحين أحول لك في حسابك
خالد بهدوء : تم ..
حامد بفرح : وانا ..بحول لك المبلغ الحين .. بس لا تحاول تلعب معي يا خالد
خالد رفع راسه لـ حامد بعصبيه : عطيتك كلمة ..
حامد : بحول لك الفلوس , بعد بكره تاخذها
خالد وقف وهو يشوف حامد , لف بظهره وهو يطلع , يفكر وين يوديها ..
كيف يقدر يخفيها , وهل الكلام اللي يقوله حامد صحيح , لكن ما يهم , اهم شي ان بيته وريحة امه للحين موجوده ..
طلع لـ البيت وهو يفكر وين ممكن يقدر يخفيها ..
ــــــــــــــــــــــــــــــــــــــــــــــــــ ـــــ
جالسة في اللوبي , تنتظر ابوها و قوت ..
بيروحون يشوفون سكن قوت , وش ينقصه ..
رفعت راسها وهي تشوف ابوها مقبل , لكنها استغربت لا اندهشت وهي تشوف الرجال اللي امس , يسلم على ابوها
