ما يدفيني بغيابك , أي شي ..
لو أشب النار .. بضلوعي شتا ..
ألمس بصدري وأردد ما عليَ
لكن الذكرى تجيبك لي متى ؟
في الصالة ..
جالسة فيها , أول ما صحت من الـنوم طلعت من الغرفة .. ماتبي تشوف صقر في الوضع الحالي لين ترتب أفكارها اللي تبعثرت في خطأ صغير ..
تسترجع أول لقاء بينها وبين صقر , وتستدرج بعدها كل اللحظات .. لحد ما تغير الحال معها ومعه , لحد ما حبّته , لحد أخر لحظة بينها وبينه اللي هي أمس .. حسّت بغمته في قلبها .. ليه كل هالندم ؟! وش السبب اللي ورث لها الندم ؟ دخّلت يدها في شعرها ..
أخذت كوب الشاهي شربت منه شوي .. بعدها رجّعته ورجعت لـ دوّامت الأفكار ..
في غرفة ليال ..
جالسة على الـكرسي بكل ذبول , من يصدق أن هذا حال عروس يومها الرابع توه يبدأ ! .. رفعت يدها مسحت دموعها بـكل حزن , أمس تركها بلحالها وراح لـ زوجته الأولى , راحت لـهم , تبغى تكلّم صقر بعد ما فتح معاها موضوع وراح بدون ما يسمعها , سمعت كل كلامهم .. يحبّها أكثر من كل شي , حياتها كلّها جالسه تنتهي , وهي لسى ما بدت ..حقدت على موضي , كلّه بسببها , هي السبب هي اللي كذّبت عليها .. هي اللي أوهمتها لـ واقع كذّاب , واقع كانت تتوقعه لكنه صار من الخيال ..
أمس قبل لا يروح لـ شيهانة ..
كان عندها في الـغرفة ..
ليال ناظرت فيه و بـ أسلوب يميل الى الأستعطاف : ليه أحس في معاملتك تفرقه بيني وبين شيهانة
جلس على الـكرسي وهو يقول : أحساسك هذا ..
ليال ناظرت فيه : لا موب بس مجرد أحساس .. هو أحساس أكيد
صقر ناظر فيها , قال بـ صدق : لان مكانتها تفرق عندي ..
ليال ناظرت فيه , كيف يقول في وجهه عروس هذا الكلام , ناظرت فيه وهي تقول بكل حرقه واضحه : وليه .. ليه تفرق عني وش الفرق بيني وبينها وش .. جاوبني وش
صقر ناظر فيها وبكل صراحة : الفرق أني أحبها ..
ليال وقّفت تناظر فيه , يحبها .. لا .. موضي كانت تقول أنه .. انه ما يحبها .. أنه مابينها وبينه شي , شلون صار يحبها : أنت .. ليه تزوجتني و أنت تحبها
صقر وقّف وهو يقول بـ حزم : أنتي اللي وافقتي .. الموضوع هذا قفّليه عشان يبقى بيني وبينك هدوء .. أنتهى الموضوع وتقفّل ..
لف بظهره متوجهه لـ خارج الـغرفة ..
ومن وقتها وليال تفكّر بكل اللي صار لها من البداية لـحد النهاية ..
رفعت جوالها , تتصل على موضي .. ما ردّت ..
أرسلت لها رساله , تبين فيها قهرها من كذب موضي , و أنه طلع يحب زوجته ..
جاها الرد من موضي , قرته أكثر من مره .. ونفس ما تكون أنسان آلي تحوّل بسرعه لـ الأنصات لـ كلام موضي .. الكاذب كلّه توهمات , وبناء مستقبل ماله بالواقع صله .
وقّفت , وهي تتوجهه لـ تسريحتها , رفعت شعرها الأشقر .. وتعطّرت وطلعت من الـغرفة ..
وقّفت عند الـصالة , وهي تسمع كلام شيهانة مع أحد على الجوال
شيهانة : ... خايفه يا قوت ... أمس مدري كيف صار كذا بيني وبينه .. خايفه من الأيام .. و ندمانه .. ندمت على كل شي سويته .. أحس أن الأمان معدوم بيني وبينه في أي لحظة ممكن يصير أي شي ....... أحبه لكن خايفه ....... مدري ليه ...... يمكن أبالغ بس وش أسوي .. هذا اللي أحس فيه ..... أمس ماكنت مرتاحه ... حتى هو أتوقع أنه حاس علي ..... وش أسوي ......... أول مره ما أعرف أخذ قرار ...أول مره أحس أن الموضوع صعب علي .. ...... بفكر باللي قلتيه ...الله يساعدني ويفكني من التفكير .... لا .... بتجينني ؟ لا أنا بجيك .... ديييم ... يالله من زمااان ... خلاص أوكي ... فمان الله ..
نزّلت الجوال وهي تحس أنها أرتاحت بعد ما تكلمت مع قوت ..
ناظرت أتجاه الباب , ليال واقفه عنده , دخل في قلبها الخوف , لايكون سمعتها وهي تتكلم ..
ليال دخلت وهي تقول : الـسلام ..
شيهانة عدّلت جلستها : وعليكم الـسلام ..
ليال جلست وحطّت رجل على رجل , ناظرت في شيهانة وهي تبتسم : من كنتي تحكين ؟
شيهانة ناظرت فيها , من متى وهي جريئة في السوالف كذا , تجاوبت معها بهدوء : بنت أخوي الله يرحمه ..
ليال هزّت راسها , بعدها قالت : واللي كنتي تقولينه لها شكوى ؟ ولا فضفضه ؟
شيهانة ناظرت فيها , رفعت حاجبها وهي تقول : وأنتي سمعتي شي ؟
ليال تكتّفت وهي تقول : بعض ..
شيهانة بـ نرفزة : في البيت هذا ما عندنا حركات التنصّت ..
ليال ناظرت فيها : ليه ما تحسين بالأمان مع صقر ؟ اذا انتي ما تحسين بالأمان أنا وش أقول
شيهانة بصوت شبه عالي : موب من حقّك تتكلمين في المواضيع هذي
ليال بـ صوت هادي : هدي نفسك .. أنا ما أقول الا اللي سمعتك تقولينه .. أستغرب منك مع أنه يحبك .. لكن أنتي ندمانه على كل شي سويتيه مع صقر ليه ؟ تخافين منه ليه ؟ و ما أنتي مرتاحه معه ليه ..
شيهانة بغضب واضح : شي مالك خص فيه لا تحكين فيه
ليال ناظرت فيها وبـ أسلوب تحسس فيه شيهانة بالندم : أمس .. واقف قدامي بكل طوله يقول لي أنه يحبك انتي , وأنتي ما تأمنين له , وتخافين منه , لا وتحسين الأمان معدوم بينك وبينه .. أحمدي ربّك أن فيه واحد يقول قدّام زوجته الجديده أنه يحب زوجته الأولى ...
شيهانة بغضب واضح : ليال .. أسكتي أفضل لك ..
ليال ناظرت فيها و بصدق : ليه ما ترتحين معه ؟ وليه ما تأمين لهه ؟ وليه ندمانه ؟ ابي أعرف تكفين ... أحس فيني فضول لـ نوعك
شيهانة بـ غضب : مــــالـــك دخل .. تفهمين ولا لا .. شي بيني وبينه أنتي مالك دخل ..
ليال أبتسمت وهي تقول : مسكينه أنتي .. ما أنتي قادرة تتهنين معه , وهو مسكين عايش الدور أنه مكمّلك بكل شي , ما يدري يا عيني عليه أنك من وراه طالع لك مشاعر غير
وقّفت شيهانة بنرفزة واضحه : أقسـم بالله كلمة زايدة مايصير لك خير
وقّفت ليال وهي تقول : بسكت .. لكن كلامك هذا بوصّله لـ صقر .. ونشوف ردّه فعل صقر .. كيف بيكون .. الطير اللي ما يقدر يفارق عشّه ولا بيكون له ردّه فعل ثانية
شيهانة ناظرت فيها وبثقه خالصه : لا .. الطير اللي ما يفارق عشّه , يدور يدور ويرجع لي في النهاية , حتى لو قلتي له هالكلام موب مصدقك .. لانه زي ما قلتي يحبني أنا ..
ليال أبتسمت في وجهه شيهانة : واضح أنك ما تحبينه زي الأول ..
شيهانة قرّبت من ليال مسكتها مع بلوزتها وهي تقول : وش قصدك
ليال ناظرت فيها : قصدي مثل سعد .. ما تحبينه زي سعد .. فكيني ..
شيهانة دفّتها بقوة على الـكرسي وهي تقول : تجاوزتي حدودك كثير .. كثير .. صديقني ماراح أعدّيها لك بالساهل ..
واقف يسمع كل كلمة منها ومن ليال , يحس أنه في جالسة في خدع كبيرة
وش صار عشان تقولين هالكلام يا شيهانة , صعب على الواحد أنه يحسه زيه زي , الكورة تنشات وترجع لـ صاحبها من جديد ..
كيف تقول أنها ندمانه على كل شي بينها وبينه , كيف تقول أنها ما تحسه أمان , هذا وين يعني ؟ كيف تأكد على كلام ليال .. كيف ما ترتاح معه .. وقّف يحاول يضبط نفسه بعد اللي سمعه , جرح كبير سبّبت له , حس بـنزيف الجرح يوجع , واللي يوجع أكثر أنها ما نفت موضوع سعد , مشّته كأنه موضوع عادي ..
طلعت ليال من الـصاله , وقّفت وهي تشوف وجهه صقر كيف متغيّر , حست بـ نوع من الـخوف , وش فيه متغيّر .. سمع اللي دار بينها وبين شيهانة ..
قربت منه وهي تقول : صقر ..
ناظر فيها , بعدها ناظر في شيهانة اللي طلعت من الصاله تناظر فيه
ناظر فيها و وجهه يبان على كلام كثير
أول ما شافت وجهه تأكدت من قبل ما تتوقع أنه سمع الـكلام , لا يا صقر وجهك لا يصير كذا تكفى .. شبّكت يدينها في بعض , ما تدري وش بتقول لـه , وش بتبرر له كلامها , هي عارفة ان كلامها قوي في حق رجّال يحبها , والأهم لو كان هذا زوجها .. و معترف لها أنه يحبها , وهي تحبه ..
ناظرت فيه , قالت بـهدوء : صقر ..
صقر بـسرعه و وجهه محتقن : أوص .. أسكتي ..
نزّلت راسها , عرفت أنه شايل عليها كثير .. عرفت أنه سمعها و ما تلومه لو زعل الكلام يوجع كثير في حقّه ..
ناظرت فيه بعدها قالت : أهدى .. عشان أقـ...
صقر بصوت عالي وبنفس الوجهه المحتقن : قلـــت لك أووص
ناظرت شيهانة في ليال , اللي باين على وجهها الخوف ...
بعدها رجعت ناظرت فيه , قالت بـ أسلوب هادي راجي : لو سمحت .. خلني أبرر لك
صقر بلعق ريقه وهو يقول : وش بتفسّرين أكثر من اللي فسّرتيه ..كلامك مفسّر وخالص ..
شيهانة دخّلت يدها في شعرها , ما تدري كيف تتصرف , وش ممكن تقول له بعد الكلام اللي قالته ..
صقر ناظر فيها وهو يقول : دامك ندمانة يا شيهانة على اللي صار بيني وبينك .. دامك ما أنتي بـ مرتاحة معي , دامني قدّامك ما تشوفين فيني الامان , دامني أخوّفك .. وش لزمة جلستك معي أكثر ؟
شيهانة ناظرت فيه وبسرعه : صقر لحظة .. لا خلني أتكلم .. والله العظيم الكلام صعب .. ما ادري كيف أفسّر لك اللي داخلي .. أشياء غريبة والله العظيم .. لكن أنا اسفه حقّك علي ..
شيهانة قرّبت من عنده وهي تقول بصوت واطي : أهدى تكفى .. مليون مشكله صارت بيني وبينك .. لكن .. لكن أنا ما تصرفت زي ما تصرفت الحين
صقر ناظر فيها وبغضب واضح : مـــــاكـــــنـــت أحبك .. ما كــــنـــت أكذب عليك ...
صقر لف بظهره وهو يقول بـ وجهه مخنوق : روحي بيت أهلك .. فكّري باللي سويتيه .. وبعدها بتشوفين أن مالي لزمة بعد كل هالكلام اللي قلتيه
