بعد مرور ٣ ايام وام سيف ما حجت لاحد انو سيف عايش وجابولها خبر عنه رادت تتأكد اول هذا سيف لو لا مارادت تفرح احد....
بيت ابو ضياء...
زهراء:.يله مريم حبيبتي هاج هذا العصير وفوتي قدمي للخطار وباعي من تفوتين كولي (وجعلنا من بين ايديهم سدا ومن خلفهم سدا فأغشيناهم فهم لا يبصرون)
حتى الله يعميه وما يشوفج زين وما يوافق بيج يارب
مريم:.اووف زهراء شتحجين انتي اني انتهت حياتي هنا يارب اخذني وخلصني😞
زهراء:.ياروحي (عسى ان تكرهوا شيئا وهو خير لكم) جوز ترتاحين وياه وتخلصين من بلقيس وابوج ياعمري كولي يا الله ويطلع خوش رجال
مريم:.خوش واذا مو خوش مالي نفس احد صدكيني مااتخيل احد غير سيف يلمسني والله
زهراء:.عمت عيني عليك خويه رحت بعز شبابك😢
دخلت مريم وقدمت العصير والولد شافها وما نزل عينه منها عجبته وقبل وهي ماتكدر ترفض بعد حكم ابوها الظالم..قرو الفاتحه وحددو بعد يومين عقد القرأن وتلبيس الحلقات...
بمكان اخر....
مروان:.الو ها حبيبي سيوفي شلونك
سيف:.بعد كلبي مروان طمني شنو صار
مروان:.اهلك دزو اوراقك للسفاره روح راجع السفاره العراقيه اليمكم حتلكه عدهم خبر عنك وعن معلوماتك وينطوك شي يأيد انت منو ويرجعوك للعراق
سيف:.حبيبي ماانسالك هاي الخدمه تفرح بشبابك ان شالله
مروان:.عيب لا تحجي هيج احنه خوان وولد منطقه وحده وربينه سوه هذا واجبي
وراح سيف للسفاره واخذ معلومات واوراق تثبت نسبه للعراق ولاهله وحجز باول طياره راجعه للعراق وكله امل وتفأول راجع لأرضه وراجع لاهله من بعد غياب ٣ سنين ..
موظف المطار:.تفضل اخي هيدي جوازك انختم اقعد هون لحد ما بينادو ع رحلتك
سيف:.اوك شكرا
موظف المطار:. العفو
وصل سيف لأرض العراق...شم هوا العراق حس بامان وانتماء لارض انولد وعاش بيها لارض اله مو مثل احساسه بالغربه بسوريا..
استقبله مروان بالمطار واخذه لبيت اهله.
وصل سيف لباب بيتهم شاف الباب بقه صافن رجعت ذكرياته
سيف:.هذا الباب اتذكره اي اي اتذكره هذا بابنه
عوده الى الطفوله...
ام سيف:.لك سيييف وينك
سيف:.ها يمه
ام سيف:.تعال فوت دنيا غروب وابوك ع جيه اذا شافك يكتلك والله
سيف:.اهوو يمه بعد وكت بس هذا الداس بس خلي اغلبه واطب
ام سيف:.ولك يمه يكتلك اني معليه
سيف:.وجاان جقيته يله لك زوع الدعبله اريدها مال طنب مو تنطيني مطعجه
...
