الطفوله المذبوحه(مكتملة) (سلسلة كوارث وخبائث المجتمع)

البارت الخامس

ومرت الأيام واليالي والسنين وانا كاتمه هالسر بكلبي محد يعرف بي ولاتجرأت اسولفه لشخص صرت طفله انطوائيه وعدوانيه نوعا ما

دوم كاعده بغرفتي ومنعزله عن الكل ماحب احد يسبحني أو احد يغير ملابسي  حتى ماما كنت امنعها تتقرب مني

ماجان اكو حضن يحميني ويحمي الباقي من طفولتي الي انتهكت

اهلي مثل أغلب الأهالي  جانو يفسرون تصرفاتي على انو اني كبرت بوقت مبكر ويتفاخرون بيه كدام اقاربنه

كرهت العب وكرهت الاطفال وكرهت السطوح وكرهت اهلي وكرهت حتى نفسي ومستواي بالدراسه أتراجع وكمت اكره المدرسه والبنات وكلشي بيها أريد بس اكعد بغرفتي ومحد يشوفني ولااخالط شخص

اهلي ضغطو عليه بموضوع الدراسه هواي حتى ماما كامت تهددني بأن تزوجني اذا ماريد الدراسه هنا تهسترت وموضوع الزواج سجين وانغرست بكلبي

ذبيت كل قهري وحيلي وضيمي بالدراسه وصارت الوسيله الي تبعدني عن الناس واهرب من الماضي وانساه

وصرت اسهر ليالي طويله مو ابجي وإنما اقره واكتب وأحضر واجبات بعدنا مواصليلها

وصار ينضرب بيه المثل بالمدرسة واطلع الاول بكل سنه

من دخلت الإعدادية صار عمري ١٦ سنه ورحت علمي وهنا تعرفت على شلة بنات صادقتهن وانا بعمري ماصادقت بنات بس جمعتنا الدراسه وشويه شويه تقربنا على بعض (حنان ومنى وليان وريم)

وصرنه نروح سوه ونرجع سوه للمدرسه

إلى أن بيوم جنه رايحين للمدرسه واستوقفنه صوت اميزه من بين كل الأصوات ومستحيل انساه لو مهما عشت وشفت

التفتت وشفته هوه نفسه التوقعته (عمار)

صعدت النار الراسي واستعجلت صديقاتي
-يلا امشن بسرعه المن واكفات

وعمار يصيح وراي
_ساره ساره

حنان:لج ساره هذا الولد جاركم يصيحج دوكفي خل نشوفه شيريد

وكفت وانا الشرار يتطاير من عيوني ووصل يمنه وهوه يلهث

-ساره شلونج
مارديت علي
وصديقاتي علامات الاستغراب على وجوهن

-ممكن احجي وياج بموضوع
-تفضل كول

-لا مو هنا ممكن بسيارتي لو ماتصير زحمه

هنا انفجرت بوجهه

-لك انته شنوووو ماتستحي اجي وياك بسيارتك عرفه ولفه امشي ولي عني

-ساره على كيفج بس اسمعيني مو قصدي بس أريد احجي وياج بموضوع صدكيني متتندمين

درت وجهي للبنات بنفاذ صبر وكلتلهن يسبقني وانا الحكهن

-تفضل البنات وراحن

-لا مو بنص الطريق ممكن للكافتيريا لو سمحتي هنا قريبه بعد شارع رجاءا

احس بروحي راح اطك بس أريد اعرف شيريد مشيت وياه بسرعه وكعدت وضربت الطاوله

-ماريد اشرب اي شي يلا بسرعه احجي

وهنا جانت الصدمه من طلب مني الطلب احس ابروحي أريد اتفل بوجه على هالطلب الرخيص