خالد : السلام عليكم
(......) : يااا خالد الحقني!
خالد : امي?
الام : ألحقني يااا خالد ...ألحقني سريع
خالد : في شنو يا امي ماالك!
الام : اخوك محمد ...
طبعاً انا اتهجمت وراسي ودا وجاااب بعد كلاام امي وبكاها دا, ركبت وجريت جري علي البيـت
اخوي محمد , من الصباح مفترض يكون في المدرسة وبالكتير جيتو الساعه تلاته كدا, اها الليلة اتاخر وامي طوول اليوم قلقانه عليـو وابوي طلع يفتش عليو بعد المغربية في الشارع بجاي وبجاي
وقت ضربو لي دا يا داب لمو فيهو
محمد جاات عربية وجدعـتو قداام البيت وجرت
عربية لا لوحات ولا قزاز ظااهر اسود في اسود كلها ,ومحمد حاالتو صعبة
انضرب ضرب شديد, طبعاً انا وقت شفت محمد ماا قدرت اقيف علي حيلي من المنظر ودموعي ديـل نزلن برااهن
امي قلبها اتقطع, وابوي داا ما قدر يعبـر زااتو لمن شاف ولدو مجدوع في الارض كدا
استجمعت نفسي كدا وشلتو واجرّنا امجاد وعلى اقرب مستشفى
وصـلنا و اول ما دخلنا طبعاً قالوا ما بعملو ليـو اي شيء إلا نمش نجيب اورنيـك 8 ولا اسمو شنو, قدر ما حاولنا نقنعهم انو الزول دا ما عمل حادث ولا في شيء بس ضرب عااادي رفضو كلو كلو غايتو يخلو الزول بموت قدااام عيونهم ولا بشتغلو بيو اهم شيء تجيب ليهم الحاجات دي
اها انا اديتهم قروش كدا كاانت معاي وقت لابوي بدخلوهو ليـكم وانا بمش اطلع الاورنيك دا...
مشيـت وطلعت الاورنيك ومحمد كان دخلوهو الحمدلله ,
الدكتور قال حالتو كويسة ومااف كسر بس "ردخ" سااي بسبب الضرب وطلب مننا صور للراس عشاان ما يكون في نزيف ولا حاجه
غااايـتو لحظات ما بتقدر تستحملها, وامي دي الدمعه فوق وشيها ما جفت كلو كلو, بقت تبكي بدون صوت
وابوي دا بس خاتي ايديو فوق راسو وشغال " إنا لله وإنا إليه راجعون"
كانت سهرة للصبــاح في المستشفى ومحمد قرروا ليـو يرقد يوميـن تانيات في المستشفى, عشان يااخد رااحه والجسـم يرتاح
مشينا عملنا ليـو الصورة لكن طلعت نضيفه والدكتور طمنا قال بس فترة الراحه ويطلع طواالي ان شاءالله
انا بعد كلام الدكتور طواالي رجعت البيـت خليت امي وابوي في المستشفى مع محمد,
وصلت الحلة لاقتني خالتي ومعاها بتها "هدى" امي كان كلمتهم الوقت صبااح بدري
