وفاء#
دخلت للكليه واني مرتبكه وحايرة بتصرفاته الغريبه وشلون يجرا يمشي ورايه معقوله اني هلكد شاغله باله..
اسئله زينب متخلص شلون اجيتي وشبيج تعبانه كتلها زينب كافي تسالين اني تعبانه من اسئله امي جنت اقدر حرصها عليه بس مرات احس الحرص انقلب الى تدخل بحياتي اكثر من اللازم واني بطبعي ماعندي صديقات قليل جدا وهي صديقتي الوحيده بس صارت مو صديقه صارت تسال وتلح واحس مرات تنطي اخباري لخالد ومن واجهتها بالموضوع ارتبكت وكتلها اذا تنقهرين عليه هذا من طيبتج بس من تنقلين اخباري اله هذا الشي مااسمح بيه ابدا واذا تاكدت منه صدكيني مراح اسامحج طول عمري ..
بدت بعدها تغير من طباعها وياي وكامت متلح بالاسئله مثل قبل رغم فضولها .. كملت الدوام وطلعت بدون مااكول لزينب اني طالعه ومشيت وحدي باب الكليه وجان عاجبني اتمشى للبيت صح مسافه هواي مشي بس كلت من اتعب اصعد سيارة لان جنت اتحذر من التكسي ومااصعد بيه الا وقت الضرورة واني امشي حسيت سيارة وكفت بصفي باوعت لكيته نزل من السيارة وأتوجه عليه واني تجمدت بمكاني رجعت امشي جان أسمعه يكولي وفاء بس اسمحيلي .. التفت عليه وكتله شلون عرفت اسمي كالي اعرف كلشي عنج ..
رجعت امشي وهو كام يمشي وياي ..
وفاء .. أرجوج اريد احجي وياج
.. ارجوك هسه الي يشوفنا شيكول ..
كال الي يشوفنا يقرأ الي بعيوني ويعذرني التفتت عليه بقوة ..
شنو هالجراءة هي يومين صارت عيون وأسئلة ..
كال هاي بالنسبه الج ..
.. كتله شتقصد بالنسبه الي ...
كال .. اني من زمان متابعج ويوم الي انصدمتي بسارة جنت اني داباوع عليج ومن شفتج الطختي بيها اتعمدت اجي على سارة واني اصلا جنت موصلها بس سبحان الله القدر خلاج تتعثرين وياها وجانت احلى صدفه ..
كتله ... سارة شتصير منك
كال .. سارة بت اخويه الشهيد وامها عافتها وتزوجت واحنا اخذناها لان زوج امها ميريدها ولا احنا نقبل بت اخونا تبقى يم الغريب ..
المهم هاي الورقه اقريها واني رايح فكري بيها وفاء.. وصدكي اني نيتي وياج سليمه ورايدج على حب الله .. وراح وعافني حسيت كلامه بيه معاني هواي وارتاحيت كلش رغم ماجنت مهمومه ... مافكرت اقرا الي بالرسالة بلحظتها خفت من ضعفي كدامه وصلت البيت ولكيت امي بالمطبخ كالت .. همزين اجيتي غداج حاضر صعدي غيري ملابسج وغسلي وتعاي تغدي لان اني حاطلع اروح لام حسين جيرانه عمتها توفت ورايحه اخذ من خاطرها ..
صعدت غيرت ملابسي وغسلت وجهي باوعت على روحي بالمرايا لكيت خدودي صايره حمرة من البرد لان اخذتها مشي من الكليه للبيت .. عيوني عسليه و رغم اني مو طويله وجسمي ضعيف بس صاحبه وجه عريض وخدود او بياضي ناصع وشعري لجتفي كستنائي ..
وفاء ... امي باعلى صوتها صاحت .. كتلها نعم ماما ..
كالت من تتغدين روحي على بابا بغرفته يريدج ..
نزلت وتغديت واني متشوقه اشوف ابويه الي مااشوفه الا قليل بسبب انشغاله ومن يجي للبيت أصدقاءه يجون عليه ويكعدون وياه اكثر من عدنا ..اخذت كوب الجاي ودكيت باب غرفته ولكيته يبتسم الي بابتسامته المعتادة وكالي وفاء حبيبتي تعالي يم بابا .. حضنته وبوسته وكعدت يمه ..
كالي بابا وفاء .. اني كلش احبج واعتبرج البنت الجبيرة العاقله الي ماتعبتني بيوم ولا طلبت مني يوم شي اني ماارضى عليه ريحتيني بكلشي حتى الكليه الي جنت اتمناها لاخوج انتي جبتي معدل ودخلتي بيها وحتتخرجين احسن مهندسه معماريه استغربت من كلام بابا .. بس ضليت استمع اله بكل خوف وحذر ..
كتله بابا اني ممنونتلك بس اريد تحجيلي وتدخل بالموضوع ..
كال .. بابا البارحه اجوي اصدقاء الي يهموني ..
تذكرت اني من طبيت وسالت ماما كالتلي جماعه على ابوج علمود ابنهم والكليه ..
كال بابا .. ابنهم دكتور يريد يتقدملج ..
كتله بابا وين شايفني..
كال .. مشايفج لان هو مو هنا ديدرس بالخارج بعدله شهرين ويجي وتلتقون ...
كتله بابا... يصير هيج الزواج واحد برةويخطب غير يشوف البنيه ويختارها .. كال بابا .. بس اكيد حتعجبيه ..
كتله بابا .. هاي هو زين واني ماالي راي ..
كال بابا.. الوحده شتريد الشهادة مهمه والشكل مو أساس ثانيا انتي حتتخرجين شتنتضرين تعيين وتفترين بين العمال والسكلات ..
عرفت من هالكلمات الاخيره بابا ديحجي بلسان امي .. هاي كلماتها واستهانتها بالناس لان امي تحب المظاهر وتحب تناسب الشخصيات الثكيله والي مستواهم توب ..
اسمعي بابا .. بين مايجي بعد شهرين وتلتقون فكري بالموضوع ورجع بابا يكلب بالجريدة الي بايدة يعني باختصار روحي لغرفتج ..
طلعت من الغرفه سمعت صوت باب المطبخ انفتح .. دخلت امي وعلاوي ومحمد ..
باوعتلها بنضرة حزن حسستها أنه اني اعرف هي ورة هذا الموضوع وهي ولااهتمت بس باوعت على الاكل وكالت شو مماكله زين .. كتلها اكلت زين خاصه كلام بابا كلش شبعت منه ..
علاوي ... شبيح وفاء ..
ومحمد .. يباوعلي باستغراب ها شلونج فوفايتي .. جان يبوسني وابوسه ..
امي ... بنتي شتريدين لعد ماكو هيج قسمه تجيج بعد لصدكين ..
كتلها ماما اني ماطبيت بالعمرين حتى ماتجي هالقسمه ..
كالت .. انتي وابوج تفاهمي اني ماالي دخل ..
صح امي جانت تحبنا وتخاف علينا بس من تقتنع بشي متتنازل عنه ابد راسها ناشف وتتعامل ويانا بشدة بحجه مصلحتنا والظروف والوكت مو خوش وكت ..
صعدت لغرفتي ورحت اركض على الرساله .. فتحتها بلهفه وقلق ..
الى تلك العينين اكتب ..
انتظرك غدا في الساعه الحاديه عشر في باب الكليه .. وان لم تاتي سانتضرك بعد غدا وان لم تاتي سانتظرك بعد غد الغد ..
والى ان يحين اللقاء ...
وجان توقيعه اسفل الورقه مكتوب اسمه احمد ..
كلامه اثر بيه وهو اصلا من البدايه جان تأثيره واضح عليه رغم اني دخلت الكليه وراح اتخرج منها ماتاثرت بأي شاب ولا جان اي احد محط اهتمام بالنسبه الي .. وحتى خالد جان كلش يحبني فكرت مرة أن ابادله نفس المشاعر حتى احس بروحي بنيه مثل باقي البنات بس مكدرت ومن جنت اشوفه اتعصب وخاصه من فتح موضوع الزواج وياي .. لا مستحيل مو هو الي ابالي وبصراحة جنت دائما اتخيله يتزوج زينب لان ثنينهم نفس الافكار ويلتقون بنقطه وحدة هي الالحاح ..
نمت واني افكر بكلام احمد وموضوع الخطوبه وحسيت الدنيا ظلمه والغرفه باردة مجنت مشغله التدفئة ولا مغطيه روحي من نايمه .. كمت غسلت وجهي ونزلت ادور شي اكله لان جعت من صدك لكيت ماما وبابا ديتفرجون على التلفزيون وعلي ديكلب بتلفونه ومحمد ديقرا مثل كل يوم ميترك كتابه وطموحه عالي عكس علي الي جان كلش ذكي بس ميقرا وكوة طلع من السادس وجاب معدل يدخله كليه مجان بابا يريدها بس هو اصر أنه يدخل كليه القانون ..
كعدت اكلت وعلاوي اكل وياي وهو يباوع عليه بدون مايحجي افتهمت معنى نظراته الي كانه ديكلي لاتخافين اني وياج ..
كملت الاكل وعزلت المطبخ وغسلت المواعين .. وسويت جاي والكل طلب جاي وياي على الواهس وفجاه كطع هالصمت صوت تلفوني من رن..
زينب .. هلو وفاء شلونج اليوم طلعتي بسرعه ماشفتج...
كملت كلامي وياها وكالتلي باجر اكو خط ونجيج بثمانيه ونهيت المكالمه وبعدها رن جرس الباب .. باوعت من الشباك بعد ما علي كام فتح الباب .. واسمعه يضحك ويكول شكو شبيج تبجين وصوت عمتي لمياء تبجي وتشكي على حظها مثل كل مرة زعلانه وي خالي زوجها يصير بسبب غيرتها عليه وشكوكها الي متنتهي جان خالي محمد شكله جميل وهي شكلها مو كلش حلو بس متتعيب وشيقنعها لعمتي بهالكلام .. جان بابا كلش يحب خواته ويتاثر على زعل اي وحدة بيهم وهلكد مايحبهم سماني على اسم وحده من عماتي توفت قبل لا اجي اني للدنيا واجيت على سنويتها جانت شابه حلوة فجاه تمرضت وبدت تضعف وتذبل وسلمتها لله خلال شهرين من المرض ومن اجيت اني وطلعت بالصدفه اشبهها كلش ...حسب كلام بيبي وبابا ..
بابا ... لج لمياء ماتعودتي عليه كافي غيرة وشك ..
عمتي .. لك عيني ابو علاوي أحسه متزوج صارله يومين مو طبيعي بس يصفن ويخابر بتلفونه .. معقوله مايتزوج عليه اكو رجال خالي وميفكر بغير مرة ..
امي ... اي اكو طبعا بس عوفي الغيرة والشك انتي حتتخبلين اخويه واعرفه ميسويها انتي شوكت تصدكين مو حيمل منج صدك ويتزوج ..
اترخصت وصعدت لغرفتي وفتحت حاسبتي وكعدت اكلب بالفيس لكيت نفسي اخذني الواهس بالفيس لحد ماصارت ساعه فوك الوحدة بالليل وطفيته ونمت ..وكعدت الصبح غيرت ملابسي واني بين حيره ان التقي باحمد اليوم او لا.. لو اترك الظروف هي الي تحكم شكد جنت متشوقه أنه اعرف احمد والتقي بيه بس موضوع الخطوبه الي حجى بيه ابويه خلاني اتردد خاصه وان امي عاجبها الولد وقالبه عليه ونظراتها إليه بشدة .. جانت هي معلمه ومحسستنا احنا طلاب عدها بس جان خوفها علينا وحبها مينوصف رغم عصبيتها وقوتها لكن تنهار لو تسمع بينا احد بيه شي او ميتغذى زين او ضعف شويه جانت غريبه نوعا ما ...
نزلت من غرفتي وصبحت على امي وبابا كالي صباح الورد وينها بوسه بابا بوسته واكلت شي بسيط وشربت الجاي وطلعت اتمشى بدون مااباوع على طالبات المدرسه مثل كل يوم ولكيت الخط موجود وصعدت بالخط وعيون زينب تباوع عليه وخالد كاعد بالمقعد الي ورة زينب مثل ماجان قبل ومايتغير ولا يمل وهو ميدري بتصرفاته هذه يخسرني اكثر .. وصلنا للكليه ودخلنا محاظرات وامتحنت وجاوبت الحمدلله اني جنت اعتمد على الشرح اليومي للاستاذ والمحاضرة الي مااحضرها ماافهمها بعد حتى لو قريتها الا يشرحها الاستاذ بغير شعبه واروح ادخل شعبه ثانيه حتى لايروح عليه شي .. وفجاءة دكت الساعه ١١ وبدا كلبي يدك وخلصت المحاضرة وماحسيت الا رجلي اخذتني لباب الكليه ولكيته واكف يباوع على الباب يتأمل جيتي .. وبدون شعور اتجهت اله و من وصلت إله وكالي صح الساعه عبرت ال ١١ بس جنت متاكد انه هالعيون مراح تخذلني بيوم .. كلامه دخل كلبي وخلاني اروح بعالم ثاني وتهت بنضراات عيونه وحسيت بروحي ولاول مرة اني من صدك احب واخذني الشوك لعيونه .. وتمشينا وهو يحجي عن نفسه وأنه إحساسه ماخاب من اجيته وجان متاكد من اني راح اجيه .. كعدنا بمطعم وطلب اكل لان جان جوعان وهو مماكل من البارحه من لاكاني امشي وجان خايف سالته ليش هالخوف ..كال ماعرف سبب خوفي بس يمكن أنه هو كلشي حلو بحياته يفقدة وفرحته مو دائما تكمل .. حجالي عن وضعه هو واخوه الشهيد وعندة بعد خوات ٣ وهو يشتغل بشركه اهليه قريبه على بيته وهو خريج كليه ادارة واقتصاد قسم محاسبه .. يحجي وياكل وافتهمت منه هو بالاكل مثل اخويه علاوي يحب ياكل بس ميسمن .. ويحب الاكل الصحي يعني الطازج والمشويات . وفجاه دك تلفونه وارتبك ورفض المكالمه وغلق تلفوني .. كتلتي الفضول بداخلي بس مااكدر اسأله حتى مو لائق سؤالي ... بس اني كتله حجايه حس بيها اني اريد اعرف منو الي اتصل ..
لازم هذا التلفون من الشغل وانت مارديت ... وكالي صحيح ماشاءالله ذكيه وحلوة .. كتله مو مسأله ذكاء بس اني مااعرف انطي رفض المكالمه ...احسها ثكليه على المقابل ... جاوب وهو مبتسم ... مازال كاعد اني وياج مااريد شي يشغلني عنج وليش تجاوب واضيع لحظات وياج ...
لملمت نفسي كوة وخجلت وبديت اكل لان معرفت شاجاوب كلامه حلو ... وجماله جان مو طبيعي وهو يوصف حبه الي ...
