صدك تفاجات من رجعته الي . ... وجانت ريحه الاكل واضحه مخلوط وياه عطره الي جان يميزه وماانسى هاي الريحه طول عمري كتله احمد .. صدك شلون رجعت كال الوقت متاخر مستحيل احد يجي بعد للمستشفى كلت ابقى وياج للصبح ..
احمد صدك تحجي روح للبيت ارجوك وخاف امي تكعد كال امج تكعد الصبح واني وياج حنبقى سهرانين للصبح هنا نتعشى وجبت وياي كرزات نتعلل سوة .. ضليت مستغربه كلش بين الفرحانه والخايفه اقترب عليه وصارت عيوني بعيونه ونفسه حار بوجهي وكال احبج وفاء وابقى للموت احبج ..
كلبي كام يدك سريع ونبضي صار براسي وحسيت بنفسي اريد انام بحظنه للصبح ..
كتله احمد شجبت اكل جوعانه ودافتح علاكه الاكل لزم ايدي وكال كلشي متلزمين اني اوكلج بايدي اليوم ..
كتله احمد .. الناس تباوع عليه استحي ..
كاال هاي الايد الحلوة مااريدها تلزم اي شي ... وبهاي اللحظه دك تلفونه وهو ديباوع على المتصل كال هاي امي تقلق عليه من اتاخر خطيه .. كتله جاوبها ..
ها يوم شلونج .. اني يم ولد صديقي خطيه اخوه بالانفجار .. وفجاه تغير صوته كال اشبيها وكام ابتعد عني واني بدون شعور كمت وراه اريد اعرف شنو الي كالتله وابتعد عني .. جان اسمعه يكوللها اجيج الصبح حبيبتي ..
اني كلش انصدمت ولزمته من جتفه وهو التفت عليه واشر بايدة الي وسمعني صوت سارة وهي تبجي .. وبعدها كام يحجي وياها واني ارتحت ورجعت لمكاني وكلت خلي اشوف ماما وارجع هم شفتها نايمه على وضعها مااتغير شي وسالت الطبيب المقيم كال .. تصحى الصبح مازال تحركت لاتخافين .. رجعت اله وهو كاعد جان مرتب الاكل ودينتظرني انتبهت عليه مرتب وكلشي جايب عبالك كاعدين بمطعم مو بمستشفى ضحكت عليه وعلى واهسه بالاكل .. وكعدت اكل وياه طبعا هاي احنا كعدنا بغرفه وحدنا وكعدنا ناكل على طبله صغيرة ..واني اضحك عليه وعلى سوالفه وفجاه سالته شبيها سارة ..
كال .... مابيها شي بس هي هوايتها الرسم واحنا عائله تحب الرسم وراسمه لوحه صغيرة وتريد تاخذ رايي بيها تعرفين محد اكو بالبيت بس اني وامي وابويه خواتي متزوجات اثنين منهم عايشين برة ومتزوجات إخوة والثالثه كاعدة قريب على اهلي اكدر من اطلع اعتمد عليها وعلى رجلها بالبيت من اني ماموجود .. سارة يرادلها عنايه خاصه صدمه امها أثرت بيها واني ماريدها تحس بفراغ ..
كتله هيه تذكر والدها ...
كال يمكن تذكره ..
المهم عوفينا من هالموضوع انتي مرتاحه هسه . ..
كتله لا والله خايفه كال من شنو كتله خاف احد يجي . كال خابري واتاكدي منهم اكيد مراح يجون ملتهين وي علاوي .. كتله حاخابر اطمان افضل ..
خابرت بعد ماكملت اكلي جان خالو يم علي بالمستشفى.. وبابا راجع للبيت لان ضغطه مرتفع بعد ماانصدم بموضوع علي .. ومحمد بالبيت خاف يتخربط بابا لاسامح الله... وعمتي متعوف بتها وحدها لان خالي ميقبل بطبع أهل امي كلش يخافون على بناتهم وحريصين عليهم اكثر من اللازم فامي مثل اهلها متحفظه ومتقبل على هواي امور اسويها اني مرات .. مع العلم ابويه كلش سهل ومتحرر وماعندة هاي الامور وحتى عمتي صارت مثل خالي وتركت اطباع اهلها المتحررة ..
بهاي الأثناء ضلينا اني واحمد نحجي الليل كله تالي اني نعست ونمت بدون ماادري وهو جان مدد على سرير ثاني لان جانت المستشفى خاص واخذنا غرفه انام بيها .. وبعدها حسيت واني نايمه اكو نفس قريب عليه وديشمشم بيه وانفاسه حارة فتحت عيني بين الصاحيه والنايمه لكيته هو نايم بصفي وخال ايدة جوة راسي وجرني اله وحضني بقوة ونسيت نفسي وياه جنت اتصورة حلم بس من بدا يتقرب هواي حسيت النار بجسمي .. ودفعته بس مو بقوة دفعته بخجل على حب .. كتله احمد ارجوك .. هاي شنوووو كال مااسويلج شي صدكي كتله ميصير ورجع يريد يقترب واني خايفه لكن مااريد أقاوم اني ضعيفه كدامه وبعدين انتبهت وخفت لايصير بينا شي
صحت بيه احمد لا ارجوك .. كال لا مااسويلج شي اني اسيطر لاتخافين مستحيل اذيج و لحد ماصار الصبح وهو على نفس الحال .. تالي كتله احمد كافي اريد اشوف امي حتصير بالخمسه ..
كام من يمي ولملمت روحي ورجع يحضن بيه كأنه هاي اول مرة .. كتله احمد كافي وسحبت نفسي منه كوة.. وكمت اشوف امي .. لكيتها نايمه بعدها مصاحيه .. رجعت عليه كتله احمد روح للبيت خاف احد يجي واني اكمل نومتي رجع يحضن بيه ويكولي احبج مااعوفج ابد .. كتله احمد ليش هيج صار بينا الحب مو هيج ... وحط ايدة عليه وكال .. شوفي وفاء اني احبك واريدج الي زوجه وماتحملت أقاوم جمالج وحبج وغير شي يخطر بالج لاتخليه يخطر وبعد الي صار اليوم مستحيل اعوفج وانتي جنتي يمي جنت اكدر اخذج وتصيرين الي بكل الاحوال واخلي الكل امام الامر الواقع .. بس لا مااخذج الا وانتي مرتي كدام الله والناس كلها تدري.... سمعتيني لو لا .. وباسني من راسي وايدي وراح .. التفتت لكيته مخلي فلوس على الميز .. وكاتب اجور المستشفى ...
رجعت على الفراش وريحته ماليه المكان .. معقوله وفاء الي سويتيه انتي البارحه عرفتيه وتغديتي وياه وبالليل نمتي بحظنه والحمدلله ماصار شي وعذريتج ما فقدتيها هيج سلمتي نفسج اله ليش وفاء انتي بنت الاستاذ الجامعي هيج تسوين بقيت الوم بروحي واتذكر الي صار واني ابجي على الي سويته بروحي ..
وكلت اروح على امي واشوف شلون صارت ورحت كعدت يمها مرت ساعه وجان تبدي تهذي وبدت تصحصح شويه شويه .. والدكتور اجا شافها و سمحلها بالخروجيه وطلعتها من المستشفى العصر بعد مااستقر وضعها ومن سمعت صوت علي بالتلفون ياله صدكتني ... وصلنا للبيت واني جنت كلش تعبانه وعمتي ورشا ممقصرين مسوين كل شغل البيت ومرتبين وعرفت أنه علاوي حيطلع من المستشفى بعد ماجنت اريد اروح عليه اشوفه خالي كال لا لتجين احنا طالعين ... صعدت لغرفتي سبحت ونمت وكعدت على صوت الموبايل. مسج من زينب وبعدها احمد .. لكيته كاتب بالمسج احبج للموت .. كمت من فراشي غسلت وجهي ونزلت لكيت علاوي جاي ... بوسته وحظنته وجان متاثر على اصدقاءة اللي ماتوا بالانفجار وتعذرت منه لان مازرته بسبب امي .. باوعت على امي جانت شاحبه وتعبانه وبس تبجي وكل وقت تكوم تصلي صلاه الشكر على سلامه علاوي .. حمودي جان يباوع على علاوي ويبجي وخدودة حمر حظنته وبوسته وكتله الحمدلله حبيبي من صار زين .. كمت سويت العشاء ويه رشا واحنا نضحك ونسولف وي عمتي الي تشتغل وتكول سالفتي محد يكدر يحلها ولا احد يكولي هاي منو الي تزوجها رجلي عليه .. اجا خالي محمد بعد ماراح لبيته سبح و غير ملابسه واجا متعطر ... كتله هلو خالو وبوسته واشتميت عطرة كلش جان طيب كتله خالو شنو هالعطر الطيب .. كال طبعا اني مو عريس جديد غير لازم اتعطر وكلنا ضحكنا على عمتي شلون باوعت عليه وكامت تلطم وكلنا الها عمه ديشاقه كالت اعترف متزوج عليه .. وحتى ابويه وعلي يضحكون على سوالفها واتعشينا ولملمت المطبخ واجا المضمد بالليل يداوي جروح علاوي بايدة وبوجهه وبظهرة حبيبي اخويه .. وخالو صالحها لعمتي وأخذها وياه واحنا طلبنا من خالو يعوف رشا يمنا لان اني دوام وامي تعبانه ورشا عدها ثاني يوم دوام ظهري بالمدرسه لان هما قريبين علينا كاعدين ومدرسه رشا اقرب الها علينا من بيتهم وأحاول اجي اني من وكت علمود اكون بمكان امي ....
وكلمن راح لغرفته وعلاوي نام من وكت ورشا نامت وي امي بالغرفه وبابا نام يم علاوي ومحمد واني صعدت لغرفتي ومن دخلت الغرفه رن تلفوني لكيته احمد اول ماكلت الو كالي احبج للموت .. كتله اني هم احبك
ضلينا نحجي ساعتين ونمت على صوته ... وكعدت الصبح لكيت ماما تعبانه مكاعدة مثل كل يوم سويت جاي على السريع وحظرت الريوك واكلت زين وطلعت للدوام اتمشى شفت بالطريق سيارة احمد وهو يوصل سارة للمدرسه وجان ياشرلي تعاي اوصلج .. خابرت على زينب كتلها لاتجون عليه اني اجي بعدين افهمج .. واتمشيت حتى ابتعد من بيتنا وصعدت وياه اول ماصعدت جرني من ايدي وبوسها وكالي احبج كتله احمد خاف احد ينتبه .. كال خلي كل الناس تدري اني احبج وانتي مرتي غصبن ماعلى الكل ..طبعا مايرضى يوديني للكليه كال تتريكين وياي وانتظرج بالوحده تتغدين وياي ياله اعوفج اليوم .. كتله صار كال وعد كتله وعد تريكنا بمكان عام وحجينا بكلشي ورجعت للكليه واخذت محاضراتي ورجعت اله بالوحدة تغديت وكوه تركني ارجع للبيت لان امي وحدها ورشا عدها ظهري .. ورجعت للبيت فرحانه ماكو احد بسعادتي .. مرت الايام واني وياه نلتقي باليوم مرتين وقربت امتحاناتي وعلاوي صارت صحته زينه وبدا يداوم .. وكل هذا اني ماكتله بموضوع خطوبه ابن صديق بابا جنت ابعد نفسي ومااريد افكر ولا اهتم لهذا الموضوع مع العلم هذا الموضوع جان جدي والمفر منه صعب كلش... وبيوم طلعت الصبح داامشي لكيت الخط ماجاي بعدة وهم لكيت سيارته واكفه ونزلت سارة وياه تمشي وتبجي وتلكيتها اني وبوستها كتلها اشبيج حبيبتي جانت نعسانه ومتريد تداوم وذبت جنطتها بالكاع او وكعت الكتب من الجنطه ومن دالملم بيها جانت اكو صورة مرسومه لشابه حلوة حسيت بداخلي هاي امها وهي دتشتاق الها وترسمها حبيبتي رغم الرسم مجان واضح بس جان الشعر اصفر والعيون واسعه وجانت المفاجاه اسفل الورقه الي كل رسام يسويها من يكمل رسمه ... اسمه وتوقيعه ... لا مامعقوله وفاء هذا اسم سارة ...
سارة احمد '''''''''''''''
