بقيت الليل كله غركانه بهمومي وحسرتي وتفكيري بكلام امي وابويه تعبني وايقنت أنه مو كل شي كامل بحياتنا .. جانت زينب محرومه من الاب وعايشه وي امها وزوج امها بس عمرها ماشكت من حياتها .. واني الي بين امي وابويه الي هما سندي بالحياه واني بتهم الوحيدة يردوني اتزوج من شخص حتى يحققون بزواجي صفقه تجاريه .. ابويه اهم شي خواته وإخوته .. وامي اهم شي ناكل ونشرب ونفذ أوامرها وتحرك بينا مثل الدمى .. وعلاوي مابيدة شي بس شايل همي وميكدر يوكف بوجه امي وابويه .. وحمودي حبيبي صغير ميعرف شي بالدنيا غير واجباته وشلون يطلع معدل حتى ماما تكوله عفيه ابني .. ضليت افكر بكلامهم وجنت محتارة اواجهم او اتركهم مجنت اعرف شاسوي ..والاهم من هذا كله لازم احمد ميعرف بهالكلام لان شمهما يكون هما اهلي وماانطي بيهم ...
نمت واني بحيره والدنيا كلها سودة بعيوني وغفيت وشفت بمنامي ...
اني صاعدة على بلم صغير والبحر جبير ماله قرار واجاني ألمي بكل قوه روج ورة روج رفعني اني والبلم ورجعني بالمي وجان اوكع بنص البحر وكدرت اسبح وتيار ألمي عكسي واسمع صوت من بعيد بس مااكدر ارد او اباوع عليه بس الصوت صوت احمد وسبحت بقوة ولزمت البلم وصعدت بأعجوبة وباوعت على مكان الصوت احمد او وياه سارة ولكيت بالبلم مجداف وضليت ادفع بالمجداف حتى اوصل لاحمد جانت المسافه حيل بعيدة بس صوته جان قريب عليه إلى أن وصلت يمه وجان افز من نومي على دكه الباب بقوة ...
لج وفاءكومي هاي لسه نايمه ... صوت عمتي لمياء كمت من فراشي وغسلت وجهي بعد ماسلمت عليها وغيرت ملابسي ...
عمتي كالتلي حبيبتي ليش هيج وجهج مورم شنو هم باجيه الليل كله والله يابنتي الي ميسمع كلام امه وابوه يخسر ..
وفاء .. عمه ارتاحي لا احمد ولا عادل ومااتزوج كل احد ابقى اكمل الماستر والدكتوراه وكلشي انتهى بعد ..
عمتي .. لا ماما ميصير بعدج صغيرة والعمر كله كدامج تحبين وتنسين وترجعين هم تحبين وهم تنسينا وتالي تاخذين واحد لا بحالج ولا بالج وبعدين يتآمر عليج ..
المهم انزلي عمتج سناء اجتي وياي تريد تشوفج..
طبعا عمتي سناء متشبه عمتي لمياء بس بالشكل او الدم بس التصرفات لا ماكو اي تقارب .. هي تزوجت عن حب والي تزوجته ماخلفت منه وجان السبب منه بس هي بقت وياه وعمرها ماحجت بموضوع الاطفال ..
هلو عمتي شلونج ..
حبيبتي انتي شلونج ..
اسم الله ليش هيج وجهج اصفر ..
امي ... طبعا الحب كلشي يسوي ..
وفاء .. ماما ماكو داعي لهالكلام الموضوع انتهى وخلص هااا وحتى موضوع عادل هم انتهى ومااقبل اي احد يجيب سيرته ..
امي ... اسمعي هذا الشي اني اقرره وخلي بحساباتج جان قبل رايج مطلوب هسه لا اني الي اقرر واحنا اليوم نرد خبر لاهل احمد ماعدهم نصيب يمنا .. وبعد كم يوم يجي عادل ويتم كلشي .. والموافقه موجودة من البدايه واحنا منطين خبر للعالم .. وهاي عماتج اجوي يشوفون صرفة وياج لان اني مليت منج ..
عيني سناء ولمياء اني طالعه للسوك البيت بيتكم احجوا وياها وكولوها خلي توعى على نفسها ترى احمد لاعب بعقلها ..
شفت امي بحال ماشايفته قبل كلها قسوة وصادتني لان مرة بحياتي اني حبيت وطلبت عمري ماكتلها لا ولا زعلتها ولا وكفت بوجهها رايها جان الاول بكل شئ حتى الكليه الي هي مستقبلي وتوجه حياتي جان اختيارها واني جنت اتمنى ادخل كليه العلوم قسم /بايو ...بس أصرت هي على الهندسه ولبيت نداءها بدون لا او ليش .. يعني جانت طاعتي الها يمكن خطأ ولو بيوم وكفت بوجهها ماكانت بالقسوة هذي لان هي واثقه من استجابتي الها ورضوخي واتزوج من شخص مجرد اعرف انه هو اسمه عادل وطبيب اسنان ..
