مر الوكت وياه بدون مااحس بيه وجان تركيزي وياه اكثر شي واني اباوع على ملامحه اكثر من مااسمع كلامه وكل كلامه ويايه أنه اهم شي الحب بين كل اثنين مو المهم الظروف ولا مهم حتى الشكل مع العلم هو شكله ماقاصر وكل الجمال بيه .. سالته ..
شمعنى انا اخترتني
وجاوبني .. وشمعنى اني اختاريتيني .. تفاجات من كلامه الجرىء .. كتله بس اني مابدر مني شي ..
وكال .. قريت عيونج من اجيت على سارة جان بيها هواي حجي وهاي العيون مستحيل تكذب ..
جنت استغرب منه يحجي وياي وكأنه بينا علاقه حب من زمان ولا كانه هاي المرة الأولى الي نلتقي بيها سوة ..
وعرفت أنه هو من جان يوصل سارة كان يوميه يشوفني ويراقبني واني ممركزة عليه جنت اسمع اله وحسيت بيه انسان واعي واذا ارتبطت بيه بيوم مراح اختلف وياه لقربه لافكاري وهدوءه وثقته الزائدة بنفسه وطيبه كلبه هو يكبرني بثلاث سنوات مواليد١٩٨٤ واتضح من كلامه اموره الماديه جيدة جدا وسألني على اهلي هواي ومن عرف وضعي او وضع اهلي كالي باستغراب يعني انتو دخلكم الوحيد من راتب والدج الجامعي كتله اي .. سكت بعدها واجا البوي نطاه الفاتورة وراح ... واني بيني وبين نفسي سالت روحي صح كلامه امي تلبس الذهب وتشتري اليعجبها وبيتنا بارقى مكان معقوله هذا واردنا بس .. وصحيت من افكاري على صوته ..
وفاء وين رحتي ..
كتله .. لا مابيه شي
كال .. عاجبج جاي لو كهوة
كتله ... جاي ..
بعد ما طلعنا من المطعم هم تمشينا وضل يحجي على وضعه وطلب مني بعد موافقتي انه بعد فترة يتقدملي لان حاليا عندة سفر ويرجع حتى يرتب موضوع متعلق بشغله .. ماسالته شنو الموضوع لان هذا اول لقاء واني اصلا شفت هالكلام بعد وقته لكن هو بصالحي ولصالح كل بنيه تتمنى تتزوج من شخص يحبها وخاصه هو كامل من كلشي .. وتهت بافكاري بموضوع ابن صديق بابا وشلون راح يعدي هذا الأمر كله على سلام ..
كال وفاء .. انتي بيج شي لو اني بدر مني شي ضوجج ..
كتله.. لا بالعكس بس شويه مرتبكه تدري هذا اول لقاء وانت فاتحتني بموضوع الارتباط ..
كال .. لازم أبين الج نيتي اني رايدج بالحلال وصدكي اني رغم كلشي بس اني خايف من أنه تعوفيني ..
جاوبته بخجل .. الانسان الصادق واليحب من كلبه ليش اعوفه ..
كال ...وفاء مثل ماكتلج اني رايدج وعندي سفر بعد اقل الشهر اصفي اموري بالشغل وراجع وان شاءالله اني واهلي عدكم ..
كتله اوك .. اني هنا لازم اروح حتى لا احد يشوفني بعد ..
وفاء .. اوكفي هذا رقمي سجلي يمج وانتظر منج تلفون اليوم بس اسمع صوتج قبل ماانام ..
كتله .. صار
من ردت اروح .. لزم ايدي بقوة جانت ايده دافيه ونفسه صار قريب عليه وكال وفاء احبج ..
ماعرفت شاكول اله بس كتله مع السلامه واتصل بيك بالليل ...رحت اتمشى واني بدوامه التفكير بين فرح وخوف وبين اكول وي نفسي هذا الي دااسوي صح او غلط .. ماحسيت الا وصلت البيت والوقت مر واني ماحاسه بيه ..
دخلت للبيت وجانت ماما دتحجي بالتلفون وي خالي محمد علمود عمه لمياء وهي تضحك وعمتي لمياء تبجي وتعيط وتصيح ميحبني عندة غيري مكتفي .. واني لا اراديا كمت اضحك وحتى بتها هم كانت تضحك وياي .. بتها جانت حلوة ومرتبه كلش بالبيت لازمه البيت منظفته وغاسله حتى السطح بهالبرد ومنظفه غرفتي وجانت امي تتمنى تاخذها لعلاوي بس علاوي اني اعرفه مو هذا طموحه..
والبنيه بعدها صف خامس علمي .. صعدت غرفتي بعد ماكلت لبت عمتي رشا .. اني اكلت بالكليه وراح انام خاف ماما تسال واريد اكعد اقرا عندي امتحان مهم باجر ..
جان الشي الي مريحني بامي أنه هي ماتصعد لغرفتي توجعها مفاصلها ..
مرت الساعات واني نايمه كعدت على صوت باذني كال احبج .. فزيت من نومي على دكه الباب وصوت رشا وهي تكول وفاء .. كتلها تفضلي
كالت ..لسه نايمه
كالت كومي خلي نشوفج راح يجي بابا ياخذ امي .. كتلها .. هسه جايه بس اغسل وجهي وانزل ..
غسلت وكملت ومن دانزل .. اجا بالي اكتب لاحمد مسج على الاقل اعلمله على رقم تلفوني ..
وكتبت اله مسج بدون ماانتضر رده .. عفت تلفوني بالغرفه كلت خاف يتصل وامي تنتبه عليه لان امي ميعبر عليها شي ..
نزلت وجانت عمتي متوترة وكلنا بالبيت نضحك على سوالفها واني جنت انقهر عليها بعد مااضحك لان مو بيدها الغيرة محطمتها .. وفجأة اجا خالي يركض وصوته مبحوح جان شكله مال واحد مصدوم ومن فتح باب المطبخ وبدون ميسلم وفاء وين ابوج اني مكدرت اجاوبه بس كتله خالو شكو شبيك احجي كال وين ابوج وعلى صراخه جتي امي تركض وابويه اجا كاله محمد شبيك هو زعل بسيط .. خالي محمد كاله يازعل ابو علي بدل وتعال ويايه ابنك علاوي متصوب بالانفجار .... امي صرخت او وكعت من طولها واني حرت بيها مدري احير بروحي ... وعمتي كامت تبجي ورشا كامت تعيط من شافت امي واني خابرت الاسعاف اجوي ينقلون امي للمستشفى .. رحت اني وعمتي وياها واخذت موبايلي بدون ماافتحه .. وامي خلوها بالعنايه المركزة وكل هذا واني بالي يم علاوي الي مااعرف مصيره .. ومحمد اخويه الي ماشفته ابد من صارت الهوسه ... لزمت التلفون وخابرت على خالي لان بابا مايرد عليه خطيه .. وخالي رد عليه كال لاتخافين علاوي مابيه شي بس جروح ورجله مكسورة من العصف مال الانفجار بس هو منهار على جماعته هواي ميتين لان هو جان بالمقهى واجاه تلفون وطالع برة المقهى يحجي وي بنيه يعرفها وماخذه الحجي وعلاوي بطبعه يمشي من يحجي بالتلفون ومبتعد عن المقهى وصار الانفجار الله كاتبله عمر جديد .. بس كولي لامج خطيه ... كتله ماما بالمستشفى خالو وفاقدة الصدمه كلش جانت قويه عليها ..
كام يلوم بروحه ويكول صوجي شسويت باختي .. كتله خالو غير هو شي صار والله كاتبه علينا الحمدلله من عدت سلامات على علاوي ..
نهيت المكالمه وشفت تقريبا اكثر من عشر مكالمات من احمد ..
وجان يرن تلفوني باوعت .. لكيته احمد ... جاوبته بتنهيدة وحيرة وبدون شعور كمت ابجي من سمعت صوته وسألني شبيج وفاء ..
كتله اني بالمستشفى وي ماما تعبانه .. وكال هسه اني جاي عليج بعد مااخذ عنوان المستشفى ونهى المكالمه ..
ومااحس الا ربع ساعه وفعلا اجا وكال ها شنو الاخبار كتله علي الحمدلله صار زين بس ماما مادتصحى والطبيب كال انهيار عصبي ولازم هي تصحى لان الصدمه جانت قويه عليها ماتحملتها ..
احمد كال .. يعني علي صحى والوالدة بغيبوبه فعلا الام هي الحنان كله .. وسألته .. كتله والدتك عايشه كال اي هي والوالد الحمدلله بس تدهورت صحتهم بسبب وفاه اخويه الي انقتل بالباب وبعدها دزو اعتذار خطأنين ومو هو الشخص المعني وجان اسمه علي وكان اكو شخص مطلوب الهم نفس اسمه وتالي وكع بيها المسكين اخويه .. كتله .. احمد هذا قدرة الله كاتبها اله ..
وبهالاثناء صاحت عمتي
و فاء .. تعالي احلام بدت تتحرك
كتله ...ياالله امي صحت رحت اركض الها ورحت اشوفها وعمتي تباوع على احمد وعيونها كلها اسئله هذا منو ..
علي ... علي ..
ماما لاتخافين علي صحته زينه الحمدلله بالعكس هو صاحي وانتي وكعتي .. ورجعت نامت .. كال الطبيب للصبح ياله تصحى زين اتركوها خلي ترتاح ..
وفجاه عمتي جرتني وردت اوكع بالكاع ..
عمه اشبيج على كيفك ..
لج هذا منو الحلو لج ديري بالج تحبين حلو وتبتلين مثل بلوتي واني بدون شعور ضحكت من كلبي .. احنا بعالم وعمتي لمياء بعالم ثاني .. كتلها لا عمه ماكو شي هذا زميل لاكيته بالمستشفى وشويه ويروح ..
عمتي .. اي عمه احسن مابينا حيل مشاكل .. اكولج خالج محمد ماسال عني.. لو بس ادري حامد ليش يدافعله .. حامد شكد يحبني بس دائما يوكف وي خالج .. كتلها عمه ولو مو وكتها بس انتي غيرتج حتخرب عليج كلشي ..
كالت عمتي .. بت حامد واحلام شتصيرين تدافعين لخالج قابل تدافعين لعمتج ..
كتلها عمه ..اروح على الولد عيب عفته وحدة وفكري شويه بنفسج حتى انتي ترتاحين مو بس خالو ..
تمشيت على احمد جان كاعد دينتظرني واني امشي خجلت من نضراته وهو يباوع عليه ومركز على تفاصيل جسمي ومن اقتربت يمه
كال .. شعرج هسه حلو احلى من الصبح وهو جان مرتب وكام يضحك ضحكته جانت احلى شي بيه احلى من كلشي .. اجتي عمتي ورايه كالت اني اروح لو انتي تروحين للبيت لان ميصير نعوف رشا وحدها .. كتلها عمه انتي روحي اني باجر مراح اداوم ..
وكالت لاحمد بكل جراءة .. عيني تعبناك ويانا انت اتوكل يادوب توصل لبيتكم.. كاللها احمد .. بس خلي اوصلج او اوصل وفاء اي وحدة بيكم تروح جان عمتي تكول اني اروح ..
احمد .. تحتاجين شي وفاء كتله لا شكرا .. كال مع السلامه ..
بهاي اللحظه من راح التفت عليه و كانه يعدل بنطاله وجان يغمز الي بطارف عيونه وراح .. كمت احجي على روحي ليش مارحت اني بمكان عمه ..
جان انتبه على روحي ..
كلت وفاء شبيج هاي امج تعوفيها علمود تطلعين دقائق وي احمد .. معقوله الحب يخليج تفكرين بهالتفكير هذا ... وبعد اكثر من نص ساعه مااحس الا صوت ورايه يكولي اكيد الحلوة جوعانه والتفت وجانت الصدمه ..
يااا شلون اجيت '"""""""
