بقيت صافنه على كلام علي وشلون حجى ويه بابا حسيت بنفسي شكد مضلومه لان اني بتهم وعمري ماتعبتهم مو نفسي وامدحها لكن اني مثال للبنت المطيعه وكل الناس جانت تحسد امي عليه ... وحتى علي و محمد كلنا نفس الشي لكن اليوم علي كل كلامه كان صحيح طغوا علينا بابا وماما هواي وزادوا بظلمهم الي ولعلي وحتى البنيه الي اختارها ميصير يتزوجها الا اني اتزوج عادل ربطوا مصيىرة بمصيري يعرفوني اني ماممكن اتخلى عن اخويه ومستحيل ابني سعادتي عليه وشلون يعوف الي يحبها وشلون شفت الحب بعيونه وهو يحجي على نور ..
وكلام بابا ... يذب احمد ورة الشمس ليش بابا مو عندة بنيه بعمر الورد وانحرمت من امها تالي تريد تحرمها انت من ابوها .. ضليت مصدومه من كلامه ..من عرفت احمد لهذا اليوم شفت وسمعت اشياء مسامعتها ولا حسبت حسابها .. وقررت ارضخ للأمر الواقع وارضى بنصيبي لخاطر علي ولخاطر سارة لان بابا ميحجي هيج اذا مو هذي نيته والسبب الي دفعه هي امي هاي افكارها ..وهي امي واني اعرفها .. ومن بابا مد ايدة على علي ماحركت نفسها ولا نطقت بكلمه ضلت تباوع علينا يمكن لان هي جانت تتمنى علي يخطبها لرشا لكن هي تكدر تضغط عليه بس علي ماممكن احد يكدر يضغط عليه ..و قررت من اتزوج عادل مااتصرف وي اهلي مثل ماجنت يمهم وفكرت اغير طريقه تعاملي وياهم لان زواجي بعادل مراح يستمر اكيد والي ينبني على خطأ يبقى خطأ وميدوم ..
ومرت الايام بسرعه واحمد عرف بعد ماالتقى وي علي وحجاله الموضوع كله واني مجنت اريدة يعرف اهلي باعوني علمود الفلوس ...لكن من اتصل بيه اني ردت احجيله كلشي بهدوء وفاجاني أنه علي حجاله كلشي وكالي كلمه جرحتني حيل لو بس زواجنا يصير اني ماعندي مانع انطي لاهلج اي شي يردوه ..
كتله احمد .. الموضوع مو هيج انت فهمت غلط وعلي بالغ بالكلام ..
كال وفاء .. الموضوع اني فاهمه صح من البدايه بس انتي لحد هاي اللحظه ماتنطين باهلج .. واني ادعيلج بكل وقت الله يوفقك وهذا رقمي يمج شتحتاجين اني عندج اعتبريني صديق او حتى اخ وتلكيني بالخدمه .. شوفي حياتج ومع السلامه ..
نهى المكالمه بعد مانزلت دموعه ... هذا هو صفحه احمد انطوت من حياتي بس عمرها مراح تنطوي من كلبي ويبقى عايش وي روحي ..
وصار يوم الخميس وامي فرحانه وعمتي لمياء اجتي ورشا عيونها بالبيت تدور على علي بس متعرف اي شي لان امي متريد تجرح مشاعرها لرشا .. خاصه وان علي طلع من البيت من ثاني يوم بعد ماضربه بابا وشكد امي اتصلت بيه مجاوبها خاصه وان العالم جايين ولازم يلتقي بيهم .. لكن هو اكتفى بمسج واحد دزة الي ..
وفاء .. ديري بالج تتنازلين وتضعيفن وتتزوجين عادل ابقي صامدة وبالنسبه الي اني تركتها لنور ماعندي استعداد اتزوج بنيه اكبر من مستواي الي تريدني تقبل بيه كما اني .. ارجوج لاتضعفين علمود موضوعي ..
غيرت ملابسي ورحت للصالون حسب توجيهات امي وخليت مكياج بسيط ولبست فستان لونه بيج وشعري نزلته على جتفي جنت بسيطه كلش بس البساطه تليق بيه اكثر .. جانت عيوني بارزة بلونها العسلي رغم رجعت الهالات بيها وبين التعب عليه بس المكياج يغطي كلشي ..
واجوي اهل عادل ولازم التقي بيهم طبيت عليهم وطبعا اتعمدت مااقدم واجب الضيافه طلبت من رشا هي الي تادي هالمهمه لان جنت كاعدة على اعصابي وشفت عادل الي ماما وبابا مبهورين بيه اما أهله جانوا ناس مبين عليهم الترف ويباوعون علينا من طارف عيونهم ..
عادل جان شكل وهندام طول على جسم رشيق حنطي البشرة وعيونه واسعه ماشال عيونه من عليه واني ابد ماركزت عليه جنت باردة او ميته بمشاعري كدام الكل والي يسالني اجاوبه والي ميسال معناها ماعندي كلام وياه .. وتمت الموافقه بفرح الكل الا وفاء وصورة احمد بين عيونها ...
جان عادل عندة اخت وحدة واخ اكبر منه متزوج لكن مسافر وهو الصغير بيهم على عكسي اني اكبر اخوتي واخته جانت متزوجه .. وعايش بس هو وامه وابوه .. ودائما يحب يسافر .. جانت امه مبين عليها صحتها على كدها وكلامها قليل وتركيزها على بنتها اكثر من اخوتها الباقين.. واتفقنا نشتري ونجهز امورنا خلال أسبوع لان هو مستعجل وكل شي كامل عندة واذا شي ماعجبني كالي يتغير ..
مرت الايام ثقيله عليه وجانت تفوت ايام مااحجي بيها ابد جنت افتقد اخويه كلش وشكد اتصلت بيه وطلبت منه يرجع مارضى حتى امي توسلت بيها مجان يرد عليها وتدز اله مسج وبقى مصر على موقفه أنه مايرجع وجان يبات يم صديقه الي أهله مسافرين ويطلع يشتغل من الصبح لليل لكى شغل اله ورتب أمورة خاصه وهو يعرف يشتغل بصيانه الحاسوب والنصب وكل شي وبدا يشتغل بابراج الانترنت ..
واشترينا الذهب والغراض من ملابس وعطور ومكياج وكلشي يخص الزواج وطبعا محد اجا ويانا بس اني وامي رحنا ودزلي مبلغ خيالي اشتري بيه الي اريدة واني اكتفيت بشي قليل لكن امي اشترت لنفسها فستان شيك وكتلها ماما اريد اشتري لرشا هم فستان لان تعبت ويانا وفعلا اخذتلها فستان روعه جان لونه فضي يلوك الها وهي بيضه ورشيقه وصاحبه عيون سود كحلها رباني.. اخترت من الذهب طقم بسيط امي ماعجبها تروح على اشياء كبيرة وضخمه واني احب البساطه بكل شي.. حسيت بجوع طبينا اتغدينا بمطعم ورجعت كملت بعض الاشياء ورجعنا للبيت لان ممتعودة افتر هواي بالسوك ..
صعدت لغرفتي سبحت وغيرت ملابسي جان شباك الغرفه مفتوح رحت دا اسد البردة حتى انام لمحت سيارة احمد فاتت من يم بيتنا ركزت عليها شفته يباوع على بيتنا نزلت دموعي لان جنت مشتاقتله من كل كلبي وتذكرت حظنه الي اخر مرة وشلون بجى وشلون بجيت على صدرة .. اجيت لزمت التلفون ردت اتصل بيه بس كلت كافي اشلع كلبه اخابرة شاكوله اشتريت الذهب وملابس النوم لا مااكدر ... وحظنت وسادتي ونمت بهمي وهم شفته بمنامي اني وياه بسيارته وحاضني ويلعب بشعري وفات من يمنا عادل وعفت حظنه وخفت ولزم ايدي احمد وكال لاتخافين اني يمج وضل عادل بس يباوع علينا من بعيد ..
وفزيت على تلفوني وهو يدك باوعت رقم غريب مااعرفه جاوبت وصوت قوي يكولي ...
هلو وفاء اني عادل ..
كتله اهلا عادل ..
كال .. نايمه ..
كتله .. اي تعبت قبل ساعه اجيت ونمت ..
كال .. اني اسف بس ردت اسال كملتي امورج تحتاجين شي ادزة الج ..
كتله .. لا شكرا كملت مامحتاجه حتى الفلوس بقى منها هواي ..
كال .. يمعودة هذا قليل بحقج ..
كتله .. شكرا الك
كال .. حضري نفسج هاليومين تجين تشوفين الغرفه والبيت
كتله .. ان شاءالله
كال .. اعوفج هسه وانتظر جيتج هالاسبوع
كتله .. اتفق وي ماما واردلك الخبر ..
كال .. اوك
كتله .. مع السلامه
كال .. مع السلامه .
جان مستعجل على الزواج وطلبت منه مااريد بس حفله العرس .. والخطوبه بين اهلي واهله بس ماااحب الهوسه والناس هواي تباوع بس امي دزت على خالتي وعماتي واني مقبلت ابد بس عزمتهم بعد ..
رحت لبيتهم حتى اشوف وضعهم وامي جانت تريد تشوف كلشي طبعا وجانت فرحتها متنوصف ابد .. جان بيتهم عبارة عن تحفه مجان بيت عادي ابدا .. استقبلتنا امه بصدر رحب وهو مجان موجود كالت ساعه ويجي وطلبت مني اصعد اشوف الطابق الثاني .. صعدت لكيت كلشي جاهز باحلى الاثاث والستائر جانت احلى ماموجود .. وفجاه تذكرت احمد وجنت اتمنى اعيش وياه على الحصير وخنكتني العبرة ونزلت من داانزل شفت عادل جاي ديصعد ولا حسيت بيه من اجا .. وكالي نورتي البيت كتله شكرا .. كال ارجعي اصعدي خلي اشوفج الغراض الي جبتهم الج ...
كتله لا شكرا راح انزل وانتظرك جوة نزلت واني خايفه ...وكلت شلون راح انجمع وياه تحت سقف واحد .. مااحس اي شي اتجاهه ولا افرح بشوفته والذنب مو ذنبه ابد ..
واتغدينا سوة وجان يباوع عليه شلون اكل اني بطبعي اكل كلش على كيفي عكسه هو سريع بالاكل جنت كلما ارفع راسي الكاه صافن بوجهي ومبتسم .. بحيث كمت من ميز الطعام رغم جان الاكل كلش عاجبني .. حرت بشخصيته ساعه أشوفه مغرور ساعه أحسه بسيط ساعه أحسه فرحان بيه ماعرفت شنو شخصيته بس هو بعد اصبح الي وشيكون خلي يكون ..
رجعنا للبيت وكان أكثر كلامه وي امي وحجالها عن دوامه بالمستشفى وعن سفرة وشلون خلص دراسته والي ضحكني بالموضوع امي شلون تحجيله عني وشلون خلصت اني دراستي .. وبعدها حددوا موعد الخطوبه الخميس القادم .
من رجعنا البيت بدت امي تحجي عليه وتكولي انتي ليش كالبه وجهك على الولد وليش متحجين وياه ..
كتلها ... وحدة ومغصوبه على واحد شتريدين تكون مو الي تريدين راح يصير مو تريدين اني اتزوج واعيشكم بفلوس رجلي حتى بابا يدفع لأهله فلوس شوكت ميحتاجون وانتي تشترين الذهب وتكوميه حتى يشوفوج الجوارين والصديقات باحلى مايكون ... وهاي اني كبش وذبحتيني جوة رجل عادل وذاك ابنج يفتر بين البيوت يشتغل ليل نهار الي ماكلفتي روحج انتي وبابا ترحون تدورون عليه انو تاكلون وتشربون وعايشين حياتكم واني وعلي نجرع السم حتى نرضيكم اذا جانت هاي الامومه ادعي من الله لايشوفني طفل وخاف اضلمه مثل ماظلمتيني انتي وبابا ....
نزل كلامي عليها مثل الخنجر وطعنتها بيه بس مو بيدي جان شي واكف على كلبي لازم احجي شكد اتحملت منهم لكن عمرهم ماحسوا بيه ولو علي موجود جان هواي تغيرت الامور عندي وجان اتحملت بس بعد علي وفوكاه بعد احمد هواي عليه ...
للحكايه بقيه ... ............
