.... بعد ماحسيت بالالام قويه ومغص قوي واغمى عليه نقلني عادل للمستشفى جنت اسمع بس مو بتركيز وسمعته يحجي وي خاله ويكوللها بس لا الجنين بي شي ..
وصحيت بالمستشفى على الالام خفيفه تجي وتروح .. ولكيت بالمستشفى ماما وبابا .. مااكذب عليكم من شفتهم حنيت وجنت محتاجه احظنهم لان احنا شما كبرنا نبقى نحتاج لحنان الام والاب بوستني امي واخذتني بحضنها وكالتلي شبيج ماما .. وبابا كاعد يم رجلي ويمسح بيها ويكول للطبيب قدمها باردة وعادل رايح جاي بالممر ... كتلهم ااريد علي اتصلوا بيه .. كالت ماما هسه نتصل بيه .. انتبهت على المستشفى الي احنا بيها نفس المستشفى الي يداوم بيها عادل ..
اجا الطبيب وسوولي فحوصات وتحاليل وعرفوا أن هاي الالام سببها الكليه والكليه تعبانه وجانت عندي حتى انتفاخات اني جنت اتصورها من الحمل لكن الطبيب كال شغل الكليه مو صحيح ولازم تاخذ علاج بس المشكله العلاج يأثر على الجنين .. والنتيجه انه لو اتحمل الالم او اضحي بالجنين .. اني انهارت اعصابي من عرفت وكلت للطبيب اني اريد الجنين مااريد اضحي بيه .. الطبيب كال أنه الجنين موجود بس العلاج يضره لان الحمل باوله.. وخاصه أنه اني حامل شهر ونص تقريبا وهاي الفترة هي فترة تثبيت الجنين ..
عادل اجا عليه وهو يكولي حاولي تتحملين الالم ونسافر لعمان هناك العلاج افضل .. وافقت بدون تفكير لان جنت خايفه على طفلي اكثر من روحي ..
وسمعت صوت علي وهو يسأل امي اشبيها وفاء من شفته كانه رجعت بيه الروح وبوسته وحضنته .. وكتله علي سلمت على ماما وبابا كال اي سلمت .. كتله علي مو كافي ارجع امي ترى تعبانه العالم هم الها الظاهر .. كال وفاء مو وكته هالكلام كوليلي شكو شبيج ..
كتله .. قبل فترة حسيت بانتفاخ بالقدم تصورت من الحمل تالي طلع بسبب الكليه ..
كال ... وهسه شيكول الطبيب
كتله .. يكول لازم يمر على الحمل ٤اشهر على الاقل ياله تاخذين علاج وهسه بس مسكنات ينطوني لان ياثر على الجنين والجنين باول تكوينه ..
كال .. وفاء ياجنين اشتري روحج المهم انتي تصيرين زينه وبعدج صغيرة وتكدرين تسوين بمكان الطفل خمسه اطفال ..
كتله .. لا علي مااكدر هذا طفلي اتحمل الالم علمودة لحد ما تعبر فترة الخطر ويكبر شويه وابدي العلاج ..
كال .. وفاء انتي تعبانه فكري بصحتج ..
لكن اني احس بيج شي صاير شي انتي الفترة الي مرت صارت صحتج احسن انتي مرتاحه وي عادل ..
ماحجيت لعلي اي شي ولا جبت سيرة زواج عادل وطلاكه لان من احجيله تزيد المشاكل ويرجع يتوتر الوضع بين علي وماما وبابا وخاصه ان بابا يريد علي يشتغل وياه بالشركه بعد ماحالوه على التقاعد من الجامعه ..
كتله ..لا مابيه شي هو كل انسان يتعرض للمرض وتعرف انت اني حامل وتقل مناعه الام بالحمل صدكني مرتاحه وعادل ممقصر بشي وياي ..
راح علي بعد مانطاني كلمه أنه هو حيرجع للبيت خاصه وأنه عندة دراسه ويريد يعدي هالسنه بسلام .. وكال لعادل استعجل باجراءات السفر ضروري وفاء تاخذ العلاج .. بقيت اسبوع بالمستشفى بين ماهيئنا أمور السفر واجراءات الفيزا .. بفترة رقودي بالمستشفى عادل ماتركني بس جنت اضوج من يختفي أحسه راح على هاي الممرضه .. هو مجان مقصر وياي بس سوالف النسوان جنت احس بيه مدا يتركها وهذا طبع بيه وكل مرة تغفر كلشي الا الخيانه صعبه تجاوزها حتى لو مجانت تحب زوجها واني حاصير ام ابنه لازم يترك هاي الامور .. كمت من مكاني واتمشيت على غرفته وهم لكيت الممرضه كاعدة وياه .. وفجأه كتله بدون سابق انذار هاي شعدها كاعدة هنا وهي فزت من مكانها وكالت بوجهي بكل صلافه .. اعتقد هذا مكان عملي اني مجايه على بيت احد .. وطلعت من الغرفه وحتى ماكلف نفسه يرد عليها ...
كتله شفت شلون تحجي وياي ..
كال .. شتريديها تجاوب
انتي طبيتي وتهجمتي عليها شفتينا بوضع مزري قابل هي مجرد جايبه اوراق ودااوقعها الها ..
كتله .. اني مرتك ومن حقي اغار عليك ..
كال .. اي صح حقج بس مو من حقج تحاسبيني على شغلي وكلامي وي الناس ..
كتله .. اسمع عادل اني سكتت على موضوع زواجك الاول وعلى مسج الخاتون الي تكولك جيبلي عشه وياك بمزاجي لاتصور اني حبا بيك لا بس اني كدام الناس كلها مرتك ولازم تحترمني ..
كال .. ادري بيج انتي متحبيني وصدكيني اني هم نفس الشعور ومتحمل كلشي منج لان حامل ولوما ابني جان تصرفت وياج غير تصرف ..
كتله .. من اطلع من المستشفى سوي الي يعجبك بس مازال اني هنا احترمني مااريد يكولون زوجته مريضه وحامل وهو ديلعب وي النسوان ..
تركته وطلعت من الغرفه ودموعي على خدي ابجي على حظي وعلى حملي الي حتى مااتهنيت بيه رجعت لغرفتي وشفت الممرضه كالت ليش تحركتي صحتج تعبانه الحركه مو بصالحج ابد ..
رجعت لفراشي واتحملت كل الالام لخاطر ابني ..
امي ماعافتني ابد وجانت تسهر على راحتي ودمعتها مانشفت طول فترة مرضي وسافرت لعمان اني وياها وبابا وعادل كال اجي وراكم بعد يومين لان جان عندة شغل حتى ماسالته شنو الشغل اللي يمنعك من أن تروح وياي امي شفتها تضايقت لان بهيج محنه ومايجي وياي بس ماحجت اي شي كدامي .. بس سالتني ومن سؤالها عرفت أنه هي افتهمت أنه احنا ممتوافقين ...
كالت .. وفاء ليش عادل ميجي وياج
كتلها .. ماادري كال يومين واجي وراكم
كالت .. يعني متعرفين ليش اكو مرة متدري ومتسال زوجها هيج سؤال ..
كتلها ... ماما هو اني شنو الي ادري بيه هو متزوج قبلي وماادري اني نايمه على اذني ..
وحاولت أنه تغير الموضوع .. كالت .. صدك وفاء .. اذا ولد شنو تسميه واذا بنيه شتسميها ..
واني مااعرف شلون اجا على بالي اكوللها ..
اذا ولد طبعا اسميه احمد
واذا بنيه سارة ..
ضلت امي طول طريق السفر ساكته لحد ما دخلنا لعمان وكعدنا بالفندق جانت امي ممرتاحه لاهل احمد خاصه وأنه ماكو احد بيهم زارني بالمستشفى ولا حتى أخته بس على كد التلفون بس خاله ام عادل اجتي زارتني وجانت تعبانه وكتلها بعد لاتبجين انتي تعبانه أما ابوه حتى ماكلف نفسه يرفع التلفون ويسأل عني ..
ارتحنا بالفندق جان الفندق بنص العاصمه وجان بابا مبين عليه التعب وطلبنا منه أنه يبقى بالفندق ..
دخلت المستشفى وبدت إجراءات المستشفى من تحاليل وفحوصات وبعد يومين طلعت النتائج أن الكليه معرضه للفشل وبيها قصور وتفاجات من كلام الطبيب أنه ضروري نرفعها لان حتأثر على عمل الكليه الثانيه .. كانت صدمه لامي وانهارت بيها واني سالت الطبيب وكتله والجنين .. كال الا تعدي الاربع اشهر ياله نعرف وضعه يبقى هو يتحمل او ميتحمل لان بعدة صغير ومنكدر نحدد شي ..
كتله .. دكتور بس هي تشتغل ليش نرفعها
كال .. هي صح دتعمل لكن مو بصورة صحيحه وتتوقف متبقى حتى حجمها اصغر من الثانيه وليش تبقيها وتأذي الكليه الثانيه تبقين بكليه وحدة سليمه افضل من أن تبقين بكليتين وحدة تفرز سموم ومتشتغل بصورة صحيحه ونخاف لاتتعب الثانيه .. والقرار قراركم ..
طبعا اتصل عادل وعرف بالموضوع وجان رايه أنه ماارفع الكليه وابقى انتظرها تتوقف او بعد الولادة ارفعها و اسوي العمليه .. اني هم جان رايي اتحمل لكن الطبيب كال هاي مسؤوليتكم انتو تتحملوها ..
ماما وبابا جانوا مصرين أنه اسوي العمليه بأقرب وقت لكن اني مقبلت ولا حتى عادل ..
بقيت بعمان شهر ونص وبدت الالام تزيد عندي ودخلت شهر الرابع بالحمل وفجاه بدت تدهور صحتي ..
جان بابا راجع لبغداد هو وعادل وبس اني وماما بقينا بعمان اجرنا بوقتها شقه وكل اسبوع او عشره ايام اروح المستشفى اجيك وضعي ..
وبيوم بالليل كمت اصرخ من الألم جانت الالام بطني ماترحم ونقلوني مستشفى ..
وجانت الصدمه الكليه توقفت وضروري اسوي عمليه ودخلت العمليات وأجريت العمليه وشفت الموت بعيوني وجانت حالتي خطرة كلش .. اتصلت امي بعادل وبابويه واجوي ثاني يوم من عمليتي جنت من اصحى اهذي بالجنين واسال كولولي ابني عايش لو لا .. جان حملي بعدة والطفل موجود بس خامل لان الي مريت بيه مو سهل والطبيب بلغ اهلي سواء كمل الحمل او ماكمل ممنوع أحبل الا بعد اقل شي ٤ او ٥ سنوات ومسموحلي بطفل واحد واذا مااحبل افضل لان الكليه الثانيه الي بقت عندي مو سليمه ميه بالميه ولو رافعها الكليه المريضه بوقتها جان افضل ومتأثرت الثانيه.. بدت امي تلوم بعادل وكالتله المفروض نضحي بالطفل ونسوي العمليه بوقتها بس انت ماقبلت ..
ضليت تعبانه كلش ونزل نص وزني وصرت شاحبه والي يشوفني ميعرفني .. اخذت علاج يكفيني ٦اشهر ورجعت لبغداد ... وطبيت بشهر السابع وبطني صغيرة والطفل ميتحرك الا نادرا ومن اسوي فحص بالسونار يكولولي خامل كلش وحجمه صغير .. بهاي الفترة بقيت يم اهلي وعادل يتصل بالتلفون يوميه ... ويدز بيد سايق مصرف الي ....
افتهموا اهلي من كعدتي وياهم أنه اني عادل ممتفقين ابد ... وباليله من الليالي جنت نايمه لزمني مغص قوي بحيث كمت من فراشي وشفت ملابسي كلها مبلله صرخت واجتي امي تركض عليه وعرفت أنه نزل مي الطفل وصارت ولاده عندي واني بشهر. السابع ...
للحكايه بقيه
