ومرت الايام وحان موعد الخطوبه بعد مارحت اني ورشا اشتريت الفستان كان بسيط وانيق لونه فضي فاتح وبيه شغل بسيط برونزي فاتح وكان نص ردن ومخصر وقصير شويه .. وخصلت شعري على لونه الطبيعي خصىل رفيعه بلاتيني غيرت مني هواي .. بس بينت اصغر من عمري وضعيفه كلش .. واجوي أهله واقرباءة تفاجات باقرباءه عدهم بنات جميلات بشكل استغربت ليش مااختارهم ليش اختارني اني بالذات ..
وسألته .. عادل ليش اختاريتيني اني وهاي بنات اقرباءك حسن وجمال ..
كال .. لان انتي ماتفكرين بفلوسي ولا يهمك المال .. المهم الحب ...
كتله .. بس اني مبادلتك بالحب ولا حجيت وياك بغزل ..
كال .. يجي الحب .. بس الي تفكر بالفلوس مراح تحب طول عمرها ..
جانت الحفله بسيطه والناس بس تباوع عليه جنت متضايقه واريدها بس تخلص ..
وفاجاني من كلي اني راح احجز على الاسبوع الجاي حفله العرس ..
وجاوبته باستغراب .. ليش هالاستعجال ...
كال .. وليش منستعجل كلشي مكملين ليش عندج نقوصات حتى بدله الزفاف راح اوديج على كم محل تشتريها .
كتله ... خلي العرس بسيط على شنو هالحجز والقاعه ..
كال .. ليش اني يوميه متزوج .. اريد افرح واريد عرس كل الناس تحجي بيه . كتله .. براحتك ..
كال .. هو انتي ليش تعجبيني لان كله براحتي ..مااحب الجدال بكلشي ..
سكتت ماحجيت اي كلمه ..
وبداخلي كلت لو جادلت بيوم احد مجان هسه اني الك بس دومي اسكت وسعادتي تضيع من بين اديه ..
ماحسيت نفسي عروس ولا ادللت ولا فرحت بحاجه اخذتها ولا حتى حبيت فستان العرس الي كل بنيه تحلم بيه ..وجان شريط حياتي يمر عليه مثل الحلم ..اتذكر حجايات احمد تدور براسي ..وكصايب سارة الصبح من الاكيها رايحه للمدرسه هنا جانت سعادتي وهنا عشت ايام عمري مرت عليه مثل الحلم وجنت اخاف لا اصحى منه بحضن واحد ثاني ..
خلصت الحفله وكلمن راح لبيته ماحجيت ولا كلمه وي اي احد بس حمودي بوسني وكلي مبروك حبيبتي بوسته وحضنته عسى ولعل الكى بيه حنان الام والاب .. اجاني بابا كلي مبروك وبكل جرأة كتله مبروك عليك الصفقه المربحه .. وصعدت لغرفتي وبكلبي هم محد يدري او يحس بيه ..
وبعد يومين جبت فستان العرس اني وعادل وياي وجان حاجز قاعه واني حتى مكلفت نفسي اسأله ياقاعه .. بس اكيد امي تعرف .. وعزمت صديقتي الوحيدة زينب ..وحجتلي على خالد شكد متاثر بزواجي .. وكلت بداخلي لو متزوجه هالولد مو احسن من عادل على الاقل جان فرحت احد بهاي الدنيا ..
واجا يوم العرس الي كل العائله تنتضرة الا اني .. وجان بأكبر قاعه ويمكن احلى عرس .. بس تبقى ذكرياتي وي احمد تدك بكلبي وين مارحت حتى لو اخر الدنيا وماتمر لحظه بحياتي اذا مااتذكر واعيش حبي اله .. حرموني منه بس محد ياخذ مكانه .. صح اليوم زواجي واليوم اهم يوم بحياتي بس يبقى احمد رجل حياتي ..
تم الزواج على اتم وجه وبين الحاضرين جنت اباوع بالوجوه وجنت افتقد شخص بينهم تمنيته يحضر وجنت مشتاقه اشوفه وفعلا اجا علي اخويه وبدون شعور كمت من الكوشه ولزمني عادل وكال ميصير تكومين هو اجاج الناس تنتبه .. عرفت أنه امي كايلتله لعادل على موضوع علي بس شكايلتله مااعرف ..
اجاني علي وبوسني كدام الناس ودمعته بعيونه عرفني مفرحانه ولا يجي يوم وافرح بعد ..
كتله علي .. ارجع محتاجتك ارجع للبيت ..
كال .. هو انتي بالبيت واني عفته تالي ارجع وانتي ماموجودة .. ازورج بيتج الجديد وعيشي حياتج بعد الي صار صار والله يفرحج باسني من راسي وراح وسلم على عادل ..
والأغرب أنه ماسلم على امي بس على عماتي وخالتي ورشا جانت تباوع عليه بحركه وقهر ..
خلصت الحفله ومن طلعنا باب القاعه وعصرني كلبي بشوفه احمد كدامي واكف بسيارته ويباوع جان قريب على سيارة الزفه .. متت الف موته من شفته اريد امشي رجلي بعد متساعدني.. حس عادل بيه شي ولزمني وصعدني بالسيارة ودموعي بدت تجري عادل جان يتصور خوفي مثل كل بنيه بليله عرسها .. واني ابجي على عمري الي ضاع واني اتفرج عليه ..
مشت السيارة بينا ورحنا للبيت وجان البيت فارغ .. هو جان عاجبه فندق لكن اني ماقبلت كتله ارجوك مااريد فندق وجان هذا طلبي الوحيد ..
طبينا لغرفتي مثل اي عرسان ونزعت ملابسي بعد ماطلع هو من الغرفه ولبست سيت نوم بسيط بعد ماسبحت واجا جايب العشه واتعشينا جنت جوعانه بس مااكدر اكل .. جنت اعاني من اي شي يصير بيني وبينه اتذكر احمد .. حتى من يوكلني اتذكر احمد من يوكلني .. كملت العشه وغسلت ورجعت كلشي لمكانه وسحبني لحظنه وبدا ويايه يتمتع واني جنت جثه هامدة كلشي ماحجيت ولا نطقت لكن الي استغربته جان وحشي بالتعامل كلشي بالقوة وحاد بحيث اتاذيت كلش منه .. وطلبت منه أن يتركني بعد لان تاذيت وتركني ونام .. وضليت ابجي لحد مانمت .. وصحيت على صوته وهو يكولي جوعان كومي اريد اكل وكمت سويت الريوك وكملت وكال اني راح اطلع اريد اروح المستشفى ومناك امر للشركه مااتاخر .. البيت يمج كلشي بيه واكو اكل بالثلاجة واذا احتجاجي شي اتصلي بيه .. وصعد بدل وطلع .. ماكو مشاعر بيني وبينه وعرفت أنه هو ميحب يكعد بالبيت ولا يحب التقييد .. امه وابوه اجوي العصر وجانت امه تباوع عليه وعلى كل تصرف اتصرفه ..
جنت مااتصل باهلي ابد ومن اريد اسال بس اسال على حمودي .. وعلي هو يتصل بيه بالاسبوع مرة تقريبا ويسالني شمحتاحه وخاف اكو احد مضوجني او مضايقني ..
كمت امل من كعدة البيت بس اكل ونوم حتى الطلعه الي جنت مااحبها كنت اتمناها ..
عادل يطلع الصبح ويرجع بالليل مستحيل ينام اذا مياخذ حاجته وكام حتى من يطلع الصبح ميكعدني وكام حتى يتأخر بالليل ومن يجي هو اني نايمه يكعدني علمود حاجته وينام وعلى هالمنوال جانت حياتي وياه ..
ومر شهرين من زواجنا وهذا حالنا .. يمكن طلعنا مرة لو مرتين اتعشينا مرة هو وصديقه وزوجته .. ومرة رحت ويه امه لبيت خاله وهو كال امرلكم من المستشفى .. ومامر علينا ورجعنا للبيت وهو مااجا وكلش انحرجت منهم .. حياتي وياه عبارة عن نوم واكل وأصبح الاكل هم معدوم بس النوم جنت احس بفراغ مو طبيعي بس مجنت اشكيله وجودة ميسد الفراغ الي بداخلي ..
بدت علامات عندي غريبه منها الدوخه والغثيان شكيت بروحي حامل وبدون مااكول لاحد كلت اروح المستشفى هم اشوف وضعه وهم اتاكد من الحمل .. رحت للمستشفى وسالت على مكانه وصلت لغرفته وشفته واكف وي وحدة شكلها جان ابد مو مريح ومنطي ظهرة للباب وهي تحجي وياه وكالتله اجتي مريضه دشوفها وبعدين نتفاهم .. التفت ومن شافني كدامه عدل نفسه وكال ها حبيبتي شعجب هنا وضلت الي وياه تباوع عليه تريد تعرف اني منو ..
كتله .. اجيت كلت خلي افاجئك ولكيت نفسي اني اتفاجأت .. وهي كالت من رخصتك دكتور وسحبت نفسها من الغرفه .. صح ماشفت شي يلفت الإنتباه بس جان الارتباك بعيونهم او وضعهم من هما واكفين مال حبيبين وديتغازلون ..
سويت نفسي طبيعيه ومتأثرت ولا كأن الموضوع يمي بس حسيت نفسي متزوجه من شخص كل همه النسوان ..
وكتله .. اني راجعه للبيت وبالبيت نتفاهم واليوم ترجع من وكت ..
كال .. اي مو مشكله بس اريد اعرف انتي ليش جيتي احتاجيتي شي ..
كتله .. لا ماكو شي بس جيت اجيك نفسي وهسه غيرت رايي اريد اروح ..
كال .. اي غير اعرف من شنو تشتكين ..
كتله.. شاكه بروحي حامل واريد اتاكد ..
كاال ... شنوووو منو حامل ..
كتله .. اني دااشك روحي حامل وكلت اجي للمستشفى هم اتاكد وهم افرحك ..
جان يوكف ويكولي انتي متأكدة انتي حامل ..
كتله .. عادل اشبيك احنا مو متزوجين طبعا اتوقع الحمل ..خصوصا عندي اعراضه .. كال تعاي وفاء خلي اوديج للطبيبه النسائيه وبلكت يتحقق حلمي .. استغربت من كلامه احنا كلها مصار النا ٣اشهر ليش هو هيج فرحان وشنو يعني حلمي تحقق ... وفعلا الطبيبه كالتله مبروك دكتور زوجتك حامل .. واتصل بامه وكاللها.. يوم باركيلي وفاء طلعت حامل ... وجانت الفرحه بعيونه واول مرة اشوفه فرحأن لهالدرجه من تزوجنا لحد هذا اليوم ...
للحكايه بقيه ..
