النهااااااااااية
.. طلعت من بيته وتركت كل شي ورايه ذكرياتي وابني وروحي الي دفنتها بهذا البيت عمري ماحسيت نفسي انتمي الهم او لعالمهم الغريب عشت وياهم والأنانية ماليه كلوبهم .. جنت اتمنى ابني باقي بحياتي بس عرفت أنه رب العزة من اخذه مني بيها صالح الي وحتى لايبقى شي يربطني بيه ..
جنت اتحمل كلشي منه واكول الزوجه لازم تصبر على زوجها بس صار صبري عليه ضعف بالنسبه اله وسكوتي اله يتوقعه خوف مني ..
وصلت لبيت اهلي وجان وجهي منتفخ من البجي وجنت اتمنى أنه علي ماموجود مجنت اريدة يعرف بس يعرف عادل مد ايدة عليه ميسكت عليه ..
ردت الموضوع ينتهي بسلام ..علي هو الي فتحلي الباب ومن شافني بهالوضع كال شبيج وفاء شصاير ..
لزمت نفسي وكتله مابيه شي
كال .. شلون مابيج شي وهذا وجهج اشبي وليش كوة تمشين والجنط هاي شنو .. وفاء احجي مد أيده عادل عليج
كتله .. لا صدك ماكو شي اني تعبانه واجيت وانت تعرف بيه اني عايشه وياه لخاطركم ..
دخلت جوه ولكيت بابا وماما كاعدين وصدفه جانت عمه لمياء ورشا موجودات .. وعلي ممداوم لان الاوف مالته ..
شافتني ماما وكالت .. ماما اشبيج
كتلها .. مابيه شي
كالت .. شلون مابيج شي وجهج شبيه وجايه من الصبح كوليلي ماما بيج شي..
سلمت على بابا وعمتي ورشا .. وكمت ابجي من كل كلبي ..
كالولي .. شنو الموضوع شنو مد ايدة عليج احجي ..
كتلهم .. لا مامد ايدة عليه بس يريد يتزوج وعفتله البيت وطلعت ..
ماما ... منو يتزوج عادل هو كالج ..
كتلها .. اي ماما يريد يتزوج لو اسوي طفل ..
كالت .. ماما ياطفل هذا غير ترتاحين انتي مصارلج حتى ٥اشهر من ولدتي شبيه عادل..
كتلها .. ماما اني مو بس على صحتي خايفه اني ممرتاحه وياه حتى اخلف منه ..
كال بابا .. ليش ممرتاحه وليش متحجين النا مشاكلج حتى نوكفه عد حدة هسه جايه تكولين ممرتاحه طبعا يطغى عليج ويكول هاي متشكي ومتحجي لأهلها واني اسوي بيها الي اسويه ..
كتله .. كلشي تحملت خيانته سوالفه المكسرة تأخيره بالليل ولا كانه زوجته اني
لكن يكولي اتزوج .. لا بابا مستحيل ابقى وياه كافي خسرت صحتي من وراه حيموتني واني اصلا من انتكست ونقلوني مستشفى جان هو السبب لكيت بتلفونه مسجات متنحجي ورحت المستشفى اشوفه هو والممرضات ضحكه وسوالفه ومن احاسبه يكولي شغلي لاتدخلين .. هذا اخر كلام عندي بعد مااعيش وياه والي بيني وبينه انتهى بعد ..
لاحظت والدي استاء من كلامي لكن مانطق ولا كلمه لان يعرفني مااشكي اني من فراغ ومن تزوجت عادل لهذه اللحظه اني مو سعيدة وصحتي بالنازل ..
علي بدا يصيح ويتجاوز بكلامه على عادل واهله وكال .. انتي متصيرين بعد مرة اله مازال اني بالدنيا رضينا بالهم والهم مارضى بينا واذا طلع ماد ايدة عليج مااخليه يشتم الهوة بعد ..
كتله .. لا علي ياريت يمد ايدة اتحمل صدكني واكول لحظه عصبيه بس مال يتزوج عليه وعندة سوالف نسوان صعبه عليه .. احنا نطلب منه يطلك وكلمن يروح لحاله ..
ومرت كم ساعه واتصل بيه وكال علي انطيني التلفون اني ارد عليه ..
رد علي عليه وكال .. اسمع عادل انت ماعندك مرة بعد ولهما كافي تطلك غصبن ماعليك وبعد وفاء متصيرلك مرة واني موجود ..
كال عادل .. ليش هذا كله لان ردت طفل
علي .. تريد طفل ليش انت شمقدم لاختي حتى تقدم لابنها .. انت مو تريد تزوج روح اتزوج شوفلك وحدة مثلك ومابينا حجي بعد .. نتفاهم بالمحاكم ..
جان بابا ساكت ومراضي على كلام علي بس ماحجى اي كلمه لان يعرف علي بعد ميسكت لعادل وراح تكبر بينهم ...
علي .. كال لامي ماما اسمعي هذا الموضوع بعد ماينفتح ابد وماريد احد يحجي بحاضر وغايب ..
باوع على رشا .. كاللها ..
رشا كومي اصعدي وي وفاء ساعديها خلي ترتب حاجاتها ..
جان علي يحبني ويخاف عليه مثل بابا شلون يحب اخوته وخواته لكن علي تصرفاته مو لعمرة وحدي بقراراته أما بابا جان عاطفته تغلب عليه ويتراجع عن قراره ..
اجا عمي ابو عادل لبيتنا وراد يتفاهم وي بابا وأنه نتراجع عن قرار الانفصال ..
واجهته لعمي وحجيتله بكل الي صار وهو من حقه يتزوج يريد طفل واني ممستعدة اسوي اطفال نفسيا مو بس جسديا .. واتفقنا يصير موضوع الانفصال بالتفاهم ..
جانت امي تراقب بدون كلام وتبجي بدون ماتحسسني مااعرف تبجي على قسمتي لو على اجبارهم الي بزوج فاشل كل همه غريزته ومصلحته ..
اتصل بيه عادل اكثر من مرة ومارديت عليه ومرة فكرت ارد عليه .. ردت اعرف ليش ديتصل ... وتفاجات منه أنه يكولي اني اسف اذا اذيتج واني من فكرت بموضوع الزواج ردت ادفعج حتى تفكرين بموضوع الاطفال خاصه واني شفت شريط منع الحمل واتالمت ..
كتله .. اني ماضميت شي عليك انت تعرف اني صارلي فترة قليله من ولدت لازم ارتاح ولازم اسوي فحوصات ياله اسوي طفل ثاني .. وانت طبيب وتعرف ميحتاج افهمك ابني اجا عندة فتحه بالقلب وتعبان واني بكليه وحدة لازم ارتاح لكن انت اناني نفسك وبس والي بينا انتهى بعد .. مااكدر استمر ..
نهيت المكالمه وبجيت على كل لحظه عشتها وياه ..
انتهت عشرتنا وكلمن راح بطريقه وانطاني كل حقوقي وسمعت بعد فترة قصيرة من طلاكنا أنه هو تزوج صح انقهرت بلحظتها بس دعيتله الله يوفقه ويصلح حاله ...
رجعت اداوم بالكليه بس محبيته للدوام بيها جانت عيون الأساتذة عليه وحتى بعض الطلاب ... جنت بحالي ماالي علاقه باحد حتى صديقات ماعندي .. فكرت اترك الكليه واشوف مكان ثاني اشتغل بيه .. لكن مااترك شغلي الا الكى شغله ثانيه ..
مرت اشهر على انفصالي.. بهالوقت رشا نجحت من السادس وطلعتلها كليه العلوم وعلي وصل مرحله رابعه من كليته وحجيت وياه على رشا محد تفهمه بكدة وفعلا اقتنع بكلامي والضاهر هو هم جان مخلي هالشي اباله وفاتح ماما وبابا بالموضوع فرحنا بهالخبر وتمت خطوبتهم وجنت متأكدة من زواجهم حيكون انجح زواج .. لتفاهمهم ورقه مشاعرهم... هما الوحيدين الي ساندوني ا وكفتهم وياي ماانساها طول عمري ..
وتمت الخطبه واني اول مرة بحياتي افرح هالفرحه هذي وحتى ركصت وغنيت جنت فرحانه والدنيا كلها مسايعتني .. وكعدت بصف رشا وكتلها خاف تكولين ماركصت بخطوبتج شوفيني شكد دبجت اني وحمودي اخويه .. ضحكت وكالتلي اركصلج بيوم عرسج .. باوعت عليها وكتلها راحت عليه بعد ..
كالت بعدج صغيرة شنو انتهت الحياه ومثل ماامي تكول التالي ربه عالي .. والله يعوضج .. ثم تعاي كوليلي انتي انفصلتي وصرتي حرة بعد شتنتضرين متتصلين باحمد هو مو كاعد بلا زواج وينتضرج ..
باوعت عليها .. وكتلها رشا صدك تحجين ... تريدين ارجع واكوله تعال اتزوجني اني اطلكت وسبب طلاكي الاطفال..
كالت .. وفاء .. انتي ماطلكتي بسبب الاطفال موضوع الاطفال تأجل لكن مامنعوج منه نهائيا وانتي هم ترددتي بسبب تصرفات عادل ..
كتلها .. رشا انتي تعرفيني كلش زين اني عمري محبيت ولا راح احب احد بكد احمد بس اني تعبته هواي خلي يعيش حياته خاف هم اهلي يرفضوه وهم يرجع يتعب وياي خليه بحياته واذا الله كتب النا نكون لبعض ونرجع نرجع وميوكف بطريقنا احد ..
كمت من يمها وكتلها يمج علي لاتفكرين بغيره اليوم .. وانتهت الحفله وجانت حلوة كلش
وماما كالتلي اصعدي ارتاحي معليج اني اصفي البيت صعدت فوك بغرفتي وضليت اباوع من شباك غرفتي واتذكر ايام الكليه من اطلع والكى الطلاب بالشارع وشفت سارة شلون تلعب وتمشي وي صديقاتها جنت احبها بكد ماجنت احب احمد ..
اندك باب غرفتي وفتحت الباب رشا وكالت تلفونج جوة وجان يدك كتلها منو .. كالت مااعرف ..
باوعت .. لكيتها زينب .. وواتصلت بيها وسلمت وسالتني على حالي وكالت خالد يسلم عليج .. كتلها الله يسلمه ..
وفاجاتني بخبر مجان على بالي ابد أنه خطوبتها هي وخالد يوم الجمعه الجايه كلش فرحتلها وكتلها الف مبروك .. بس اني الجمعه الي تجي مااكدر اجي لان حفله المهر مالت اخويه .. اتعمدت أكوللها هيج مجنت اريد اروح واشوف خالد ويشوفني واهيج عليه المواجع بهيج يوم .. نهيت المكالمه واني داافكر اقطع علاقتي بزينب حتى لا اثر عليها بحياتها وتبقى كلما تشوفني تذكر حب خالد الي وخاصه اني جنت هواي احجي عليه وجنت اكول بوجهها هذا ماعندة كرامه .. فالافضل شويه شويه انسحب من حياتهم ويعيشون بسعادة والله يوفقهم ..
كلت لرشا .. انتي لسه مارحتي كالت لا داساعد عمه بترتيب البيت
كتلها .. اليوم خطوبتج وتساعديها روحي ارتاحي اني راح ابدل وانزل اساعدها
كالت ... كملنا كلشي والله وقابل اني غريبه صار بيتي بعد الا اشوفكم الويل ههههههههههه...
كتلها .. ام قلب الطيب انتي رشا واخذتي اغلى واعز الناس ..
كالت .. اني رايحه حبيت اسلم عليج وانطيج التلفون .. منو يكعدج الصبح للكليه ..
كتلها .. مفكرة اتركها للكليه
كالت .. ليششش
كتلها .. ممرتاحه بيها اريد تغيير
كالت .. شوفي غير شغله خاصه انتي مهندسه
كتلها .. صار شهر ادور والله يسهل ..
وسمعت صوت علي وهو يصيح رشا وينج ..
كالت .. اني رايحه للبيت علي ديوديني .. ياله حبي تصبحي على خير..
كمت اكلب بتلفوني وفكرت اتصل باحمد .. بس ماكدرت ابد .. اجيت فتحت الفيس وكلبته ودورت على صفحته لان اني لحد ماعفته مجان عندة فيس ماعندة مجال .. وكتبت احمد وطلعلي هواي اسم احمد وضليت ادور كل الصفحات وكتبت حتى باللغه الانكليزيه لكيت اسم لفت انتباهي وهو اسم مثل اسمه الكامل ...
احمد محمود .. وبين قوسين بصف اسمه مكتوب ( الوفاء عنوان ) .. دخلت الصفحه لكيت صور سارة وتاكدت هو ولكيت صورة تشبه صورتي تقريبا مكتوب عليها رسم لبنتي سارة وجانت هاي الصورة تقريبا تاريخها بعد زواجي باسابيع واخر منشور اله قبل أشهر .. شعر عن الحب والفراك والانتظار ضليت ادور بصفحته مالكيت شي يلفت انتباهي حتى شغله هو ممتغير نفس مكانه ... عرفت بيه كما هو حاله ..
نمت واني ابجي وافكر بيه وكعدت الصبح مارحت للكليه .. رجعت ايامي كلها كاعدة وحدي وساكته ..
ماما كالت .. ليش ممداومه بنتي
كتلها .. ماما ماحبيت هالكليه فد ساعه واطلع ادور شغل كالولي على شغله اروح اشوفها بس مكانها معاجبني شويه بعيد ..
جانت امي تريدني اشتغل لان بابا بدا يترك الشركه بعد الخلافات الي بينه وبين ابو عادل وهم بنفس الوقت صحته بعد كامت تتعب مو مثل قبل .. يعني امورنا الماديه كامت تتعب وخاصه علي حيتزوج وشغله بعد الدوام يادوب يكفيه هو وخطيبته ...
رحت ساعتين ونص رجعت للبيت بعد ماشفت الشغل الي بالشركه الجديد لكن هم ماعجبني جان بمكان مقطوع .. واتفقت وياهم رغم ماجنت مقتنعه بس لازم اساعد اهلي بهاي الفترة لحد ماالكى غير شغل بمكان ثاني .. جنت اروح وارجع مو بواهسي ابد وتعب الطريق والمسافه تاذيني ..
وفد يوم خابرتني رشا واني جنت دااشتغل وبنص الشغل وهوسته ...
وكالت ... لكيتلج شغله
كتلها ... صدك
كالت .. الراتب مغري عشر اوراق ماعدا الاكراميات بس تعب من ثمانيه للخمسه والج يوم بالاسبوع ترتاحين بيه..
كتلها .. بس كوليلي شعجب هاي المغريات والراتب
كالت ... لان شركه مقاولات والمهندسه الي لازمه الشغل متعرضه لحادث والشركه متعاقدة ومتكدر تتراجع .. واريد منج شغله ...
كتلها ... شنو هيه ..
كالت .. ماريد علي يعرف من طرفي لان مدير المفوض اني بنفسي حجيت وياه وتدرين علي ميقبل احجي بهاي الامور وانتي اخته تكدرين تكوليله كلشي والموعد مال مقابله باجر اذا تريدين تروحين كوليلي حتى اتصل بيهم وادز العنوان الج بمسج..
كتلها .. اوك اتفقنا اروح واشوف شمهما يكون احسن من هذا المكان..
دزت الي العنوان بمسج والي فرحني أنه المكان قريب مو بعيد ..
رجعت للبيت واني تعبانه واتغديت ونمت ... كعدت العصر
كالت ماما .. روحي لبيت عمتج هم غيري جو وهم ودي هالغراض لرشا خلي تشوفهم عجبوها لو لا حتى إذا ماعجبوها ارجعها ..
اخذت الغراض واني بداخلي اضحك واكول يعني رشا صارت مرة اودي بجهازها لا وتلكالي شغل وشركه مقاولات والله دنيا .. فتت من يم المحل الي التقيت باحمد بيه ودخلت لكيت بيه ناس هواي ودورت بالوجوه بلكي الكاه .. مالكيته بقيت فترة بيه اكلب بالغراض وهم مااجا .. وطلعت من المحل وخنكتني العبرة ..
رحت لبيت عمتي ونطيت الغراض لرشا وكتلها الطريق كله احجي عليج واكول مرة صارت وكمنا نضحك ..
كالت مارديتي عليه باجر تروحين للمقابله ..
كتبها اي ..
كالت .. زين كتيلي حتى اتصل..
اتصلت بمدير المفوض .. وكالتله .. استاذ ابراهيم باجر المهندسه وفاء تجي على المقابله الساعه عشرة .. ونهت الكالمه .. كتلها منو استاذ ابراهيم .. كالت المدير المفوض وباجر تلتقين بيه وبمدير المشروع ..
رجعت للبيت وكلت لماما.. وثاني يوم طلعت بعد ماتريكت ودعوات ماما ورايه واني كلش اتفاءل بدعاءها ..
وصلت للشركه تقريبا الساعه تسعه ونص وبعد نص ساعه على الموعد ودخلت للشركه واي احد يسالني اكول .. جايه على استاذ ابراهيم المدير المفوض جانت الشركه فخمه ومكانها حلو وحسيت براحه ماحاستها قبل ...وصلت للمكتب والتقيت بالسكرتيرة وكتلها عندي موعد مقابله وي الاستاذ استغربت من موعدي وكالت .. اني انظم المواعيد ماعندي هيج موعد ولا اسمج موجود ..
حسيت بفشله وكتلها البارحه اتصلنا بيه ورتبت موعد وياه هو ومدير المشروع الجديد ..
كالت لحظه .. خلي اتصل بمدير المشروع يجوز عندة علم .. اتصلت بيه وكالت انتضري هسه ارجع .. راحت تقريبا ربع ساعه ورجعت وكالت اني اعتذر فهمت الموضوع خطأ .. الموعد الي يخصج مو هنا هسه لحظات وتروحين تقابلين اكرر اسفي وابتسمت بوجهي بعد ماجانت معصبه ..
انتضرت ربع ساعه ودخلت بنيه وهي مبتسمة المهندسه وفاء دورج بالمقابله تعالي وياي ..رحت وياها ودخلت لغرفه فارغه من الاشخاص وبس ميز الاجتماعات وكالت انتضري هنا بس هذه الاستمارة تمليها ومن يطلع شخص ادخلي انتي بعده .. وطلعت هيه من الغرفه وجنت اسمع صوت بالغرفه الثانيه فعرفت اللجنه بالغرفه الثانيه والي يطلع من هالباب ادخل اني بعدة .. مليت الاستمارة وكتبت كلشي بيها .. وانفتحت الباب وطلع منها الشخص الي قبلي شلت استمارتي وكمت من مكاني ردت ادخل بدون ماانتبه منو طلع من الغرفه وفجاه كال الي ..
اكيد راح تنجحين بالمقابله .. كلشي بيه ارتعش وكل مشاعري رجعت بيها الحياة ورفعت راسي واشوف كدامي احمد ... ردت اوكع من طولي ولزمني وهو يضحك ويكول ..
تشتغلين عندي لو متقبلين
كتله .. شجابك هنا وشلون عرفت اني هنا ..
كال .. مو كتلج اني انتضرج بس تحتاجيني اتصلي بيه .. ليش وفاء انتي مريتي بهاي المحن كلها واني ماادري ..
وبعدها عرفت لا اكو شغل ولا اكو مقابله هذا كله فيلم من رشا من يوم الي اخذت تلفوني بخطوبتها وكالت تلفونج نسيتي جوة .. واخذت تلفوني وحصلت رقم احمد واتصلت بيه وحجت قصتي اله واتفقوا يرتبون موعد الي بالشركه الي يشتغل بيها احمد .. وحتى من جنت بيتهم وكالت حاتصل بالمدير المفوض استاذ ابراهيم جانت تحجي وي احمد ...
ولزمني من ايدي واخذني للبيت عدهم ورحنا هم تغدينا والاكل جان جاهز وانوار موجودة مثل اخر مرة التقينا بيها وكل الاكل نفسه الدولمه والسمج والكبه الموصليه .. وسارة تلعب وي بنات انوار وهم لعبت وياهم ..
واتقدملي احمد وصار زواجنا خلال شهر وسافرنا لتركيا قضينا شهر العسل وعشت وياه احلى ايام العمر وصار عندي طفل منه سميته علي ...وربيت سارة مثل ماربيت علي .. وتعلمت شي بحياتي واحب كل من يقرا قصتي أن يتعلم ... الحب لاينتهي ولو كان للحب نهايه لم يكن للوفاااء عنواااان ..
............ وانتهت الحكايه ........
