قتلتني ساحره

2

#قتلتني_ساحره
الجزء الثاني
همسات الليل (ام آيه)

اندك الباب وكام كرم فتح الباب وجان تدخل عبير..
بقيت فاتح عيوني مبهور بيها ولاهيه شفتها اخر مره صف ثاني متوسط ضعيفه وناعمه وحتى حركاتها مثل الاطفال جانت..
هسه انسه طول برشاقه وهدوء ونزاكه لابسه الصدريه نيلي وقميص ابيض والحجاب الابيض..
سلمت وبوست امي وابويه واحضان ويه رؤى لان نفس العمر وكلش صديقات..
واني سلمت عليه من بعيد..وبهمس شلونك يوسف
جاوبتها بخير الحمدلله صايره مره كلتلها  راح نزوجج لاابو الغاز واضحك بصراحه اني جنت احب اداهرها وافرح من جانت تزعل وتبجي..
طعجت وجها وترخصت وفاتت ويه رؤى واسمع ضحكم وسوالفهم وطلعوا حضروا العشه ويه امي وخالتي..
عبير : اني طالبه بصف خامس ادبي..علاقتنا جانت كلش قويه بيت عمي ابو يوسف لان ماخذين خوات..
جنه صغار جنت احب اروحلهم وافرح من اشوفهم يجون يزورونه بالعطل بس يوسف جان يحب يداهرني دائما ويبجيني..
المهم من صرت مراهقه حسيت اني بديت احبه بس هو بالمقابل ماكو تبادل بالمشاعر ..
نجحت صرت ثالث وهو انقبل كليه..قررت اسحب نفسي لان حبي من طرف واحد وهو محاس بيه وثانيا هو انقبل كليه وراح يبدي حياه جديده يعني نهائيا ميفكر بيه حتى بالحلم..
سحبت نفسي وابتعدت ..حتى لمن جانوا اهلي يروحون لبغداد جنت اتحجج وابقى بيت عمي الثاني..وهو اصلا مااجه علينه من يوم دخل الكليه..
اليوم من شفته وبعد هالمده الطويله بصراحه كلبي رجف واني اصلا ادري بيهم راح يجون امي كلتي قبل يومين..من شفته حسيت نفسي راح يغمى عليه لكن تمالكت نفسي وسيطرت على تصرفاتي..
لمن سلمت عليه جاوبني حلو بالبدايه حسيت نفسي بغير عالم بس من استهزء بي وكالي نزوجج لاابو الغاز خاب املي وكلت اني ولاعلى باله..
المهم هو راح يبقى يمنا فتره الله اعلم شكد لازم اسيطر على مشاعري وماافرض نفسي عليه..لان اني بطبيعتي شخصيتي قويه ومااضعف لان والدي زارع الثقه بيه من الصغر ..
بقوا يمنه عمو وخاله ورؤى يومين والثالث رجعوا لبغداد لان عدهم روحه للحله علمود يودون رؤى لبيت خالي..
عبير:رؤى رادت تبقى بيتنا وتوسلت بعمي وخالتي بس رفضوا والظاهر مجانوا رايدين يبقوهم اثنينهم حتى ميحسسون اهلي بقاء يوسف واخته عبء على اهلي ..المهم اهلي اصروا على بقاءها وتحججوا بيت عمو بان هناك يم بيت خالها احسنلها علمود تدخل دورات السادس ويه بنات خالي الدكتور  احمد وخالي مراح يقصر بالدراسه عليهم وبالمناسبه بنات خالي تؤام وعلمي مثل رؤى ومتفوقات..
المهم ودعناهم وراحوا واني رحت للدوام  جانت نهايه عام ومباقي شي ونمتحن..
يوسف كلش جان ضايج بروحه اهله ..طلع العصر شويه ويه ولد عمي وعمتي ..
عمو رتبله ويه الاساتذه بالجامعه لان معاون العميد مال كليه يوسف جان صديق عمو وبنته اصلا طالبه يم عمو..يعني مصالح مشتركه..
وجانوا عمو يستنسخله المحاظرات ويدزها على الاميل مال يوسف..
طبعاا رجعت مشاعري تخربطت من جديد وبديت ادخل بدوامه حبه..
وهو مشاعره كلها تعبر عن  الشقى والضحك
يوسف رتبولوا الوضع وسوله اجازه مرضيه بس يروح بالامتحان يمتحن.. والمهم صار وقت الامتحانات واخذته امي وراحت لبيت كرايبنه بقوا طول الامتحانات جانت تروح وتجي ويا كل الامتحانات..بعد خالته وتحبه..
المهم نجح يوسف وصار مرحله رابعه واني صرت سادس..وبقى يمنه وكل فتره خاله وعمو ورؤى يجونه بس يوسف ابد موصل بغداد لان الوضع بعده مو تمام..
يوسف بعده يداهرني بتصرفاته وكلامه..
ومره من الايام فتت للهول لكيته يحجي بالتلفون ومخنوك ولازمته العبره ويحجي ويه ولد ويكله لابشرفك حرامات..بس كلبه ديتكطع حسيته..
اني الفضول قتلني بصراحه

ام ايه