قتلتني ساحره

الجزء الاول

قتلتني ساحره
الجزء الاول
بقلمي همسات الليل(ام آيه)

اسمي يوسف مرحله ثالثه كليه الزراعه.. طويل وشكلي حلو موغرور بس ربعي واهلي يكولون..اعيش ويه عائلتي الصغيره المكونه من والدي استاذ جامعي من غرب العراق و والدتي مدرسه لغه انكليزيه من جنوب العراق واختي رؤى طالبه صف خامس علمي..
ابويه وامي كانوا طلاب بنفس الجامعه يدرسون كليه التربيه قسم انكليزي..عاشوا قصه حب  حلوه استمرت 3 سنوات واتكللت بالزواج بالمرحله الرابعه..
ابويه طلع امتياز وصار استاذ بنفس الجامعه بس امي صارت حامل وتعب وارهاق الحمل خلاها نجحت نجاح المهم بعدين تعينت مدرسه باعداديه بنات..
احنه عائله كلش منظمه ومثقفه ومادياا مرتاحين والحمدلله..
اني جنت متفوق بكليتي وجنت معجب بطالبه بنفس قسمي اسمها ميس جذبني الها بالدرجه الاولى اخلاقها وهدؤها قبل شكلها بس ابد محسستها بمشاعري..جنت ناوي بالرابع افاتحها واخطبها وره التخرج وبعد الاتفاق  نزوج..
العراق وره السقوط مر بااحداث مروعه..
وبدت المشاكل وبيوم رايح للكليه بخطي وطبعا كليتي با اطراف بغداد وازدحام تاخرنه شويه طبيت للكليه لكيت طابع الحزن يغلب عليها وانصدمت بخبر مقتل 2 من الطلاب واحد بنفس المرحله ويانا بس بغير شعبه والطالب الثاني مرحلى اولى واسمهم (عمر وعلي) ..وبدء الذبح على الهويه ..
وبدت الطائفيه وعمليات الخطف والقتل وخطف البنات واغتصابهم..
سووا بلبله بغداد كام الشيعي ينقتل بالمناطق السنيه ..والسني بالمناطق الشيعيه...وكمنا نعرف مصطلح الشيعه والسنه..بينما كنا قبل منعرف هيج تفرقه وخير دليل والدي من الغرب والدتي من الجنوب..بس نكول حسبي الله على الي سوه هاي الفتن وهجم البلد..
وبصباح يوم جديد كعدت اريد اروح للكليه ولكيت امي تبجي وتصيح على ابويه اليوم اتطلعه من بغداد لا احرك روحي..
نزلت كتلهم صباح الخير ردوا السلام بس البيت كله متكهرب ورؤى تبجي وامي صايره نار..
امي كالتلي فدوه اروحك حظر جنطتك دنوديك لبيت عمك ابو عبير همه بيت عمك وخالتك بنفس الوقت..بالمناسبه صارت قسمه عمي ابو عبير وخالتي وره زواج اهلي بكم سنه وصاروا الاخوه مزوجين الخوات...
كتلها شبيج فهميني لتبجين ..كالت هسه الشرطه ملتمه براس الفرع مصطفى الحلاق رايح يجيب صمون وضاربي كاتم وهسه امه كالبه الدنيا  سوده عليه وحالها يبجي الكافر وقبل كم يوم يم بيت خالتك منى بالبياع كاتلين 2 وانت بالكليه وكومه بهالاسبوع نقتلوا ومحد يعرف شنو القصه..
يمه فدوه اروحلك خلي ندزك لبيت عمك على الاقل خالتك تحبك ومتذمر وعمك نفس الشي وفتره وترجع من تستقر الاوضاع
عارضت كلتلها ماعوف كليتي..ضلت تبجي وتكول ماعندي غيرك انت واختك اذا يصير عليكم شي امووت..جاوبتها اسم الله عليج..
كالت علمود رؤى اتفقت ويه خالك الدكتور ادزها يمه بالحله تكمل هالسنه ويه بناته..وهو كلي دزيها وكال مثل بناتي وبعيني احطها كلي كملي اوراقها وجيبيها..رؤى سمعت حجي امي وكامت تبجي وعاندت بس ماباليد حيله امي من تريد شي لازم يصير لان هيه صاحبه القرار بالبيت..
وتكول اني امكم وتهمني مصلحتكم وهذا الي راح اسوي هو من مصلحتكم...
المهم حضرت غراضي وبيت عمي عدهم علم بجيتنا
ورحنا لبيت عمي بالانبار طبعااا اني من جنت صف سادس رحت اخر مره لديره والدي..
وبيت عمي جانوا يجون من عدهم زياره طبيب وصارلهم 3 سنين يجون وحدهم وميجيبون عبير وكرم..
وصلنا لبيت عمي  واستقبلونا عمي وخالتي بكل حب وتلكانه كرم وكبران صاير ثالث متوسط وعبير جان دوامها ظهري وبعدها بالدوام..
المهم تغدينا وارتاحينا وفتحوا الحجي على اوضاع بغداد وشلون صارت شبه مهجوره والعالم خايفه..
وعمي كله لاابويه بيت ابونا فارغ اكعد بي ولاترجع بعد الما تهدئ  اوضاع بغداد بس والدي رفض كال اني استاذ ولازم اكمل مسيرتي التربويه ..لان الفساد  اذا يبدي بالتعليم فنقره على البلد السلام..
وامي ايدته الرأي وكالتله نرجع ومنبقى ..مادام أمنا على يوسف يم عمه وخالته..بعد رؤى نوديها لخالها وهي حاضنتها وتبجي وخالتي تواسيهم وتكول زوبعه وتعدي وتنجمعون من جديد..
بهالاثناء اندك الباب..