أذان الكنائس

part 10

الجزء العاشر
آذان الكنائس

أطلت الشمس بخيوطها على قبة الصخرة فكانت كالمرآة للسماء الزرقاء , استيقظت وطن بسرعة رتبت غرفتها و باقي غرف المنزل و بدأت بالإستعداد لحفلة خطوبتها أخرجت ثوب والدتها كان ثوبا أبيض مطرزا بخيوط حمراء ببعض الرسوم الفلسطينية القديمة كالعصفور و السنبلة , كوته جيدا حتى تزيل جميع التجاعيد التي أصابته بمرور الزمن , و بدأت بتصفيف شعرها .
في هذه الأثناء كان عمر غارقا بأحلامه فكونه لم ينم دقيقة واحدة الليلة الي مضت جعله يشعر ببعض الكسل قليلا , حتى شعر ببرودة تعتري جسمه فاستيقظ فزعا : شو هاظ ؟؟
-منيح اللي صحيت !!
-ولك محمود شو جابك عندي من صبحية ربنا ؟
- أي صبح ؟؟ الساعه ثنتين الظهر كوم يا دوب انلحك نخلص !!
- شو نخلص بعدين شو اللي درتو علي ؟
- مية يدابه !! نلحك التجاهيز للخطبة !!
- تجاهيز شو خلصشوف محلاني مش ظروري
- شو محلاك ؟؟ شوف شعرك مطولو !! ولا اوعيك ؟؟ كوم كوم ولا يلا خلينا نخلص و فش اليوم فطور بالبيت !!
-ولا دفطر بالشارع يعني ؟
-لا عندي , ممنوع تشوفها كبل الحفلة
- لليش ان شالله ؟
- حيونة بعيد عنك خلص كوم بلا لعي يلا !!
- طيب انكلع كدامي ..

خرجا من المنزل و ذهبا إلى الحلاق , كان شابا بالعشرين من عمره تقريبا, بدأ بقص شعره و كل أصدقاء عمر موجودون يغنون له من الأغاني الشعبية : " و تلولحي يا دالية "
-اسكتو يا نور
- " يم غصون العالية "
- اسكتو يا بقر
-" و تلولحي عرضين و طول "
- ولكو اخرسو وحياة الله ببطل هسه
- لا خلص يخوي كملو كملو بلا ميبطل مسدكنا و يلاكي غيرنا يتفشش فيو (محمود)
- يتفشش بمين ؟؟ هي مرتو صارت يعني طلباتك اوامر (أحد أصدقائه)

خلع عمر حذائه و رماه على صديقه : اكلك بطلت اخطب شو هي سيرة خلص يخوي اترك شعري شو الكرف اللي عايش فيو كومنكلع ولا !!
-خلص توبة توبة والله مبنعيدها بس كمل يستر عخواتك !!

كانت عملية حلاقة شعر عمر أصعب بألف مرة من عملية قتل مستوطن , و ما إن انتهو من عملية الحلاقة حان الآن موعد "حمام العريس " كما يطلقونها عليه , وهنا كانت المعجزة لجعل عمر يستحم .
-بديش اتحمم !!
-ليش ولك تروح معفن ؟؟
-معفن بعينك كبل يومين تحممت !!
-حتى لو لازم تتحمم كمان مرة كم مرة رح تخطب بحياتك ؟؟
- ضحك عمر بمكر " شو عرفك " ؟
- ااه والله هس بكلها و بنشوف !!؟
- روح انكلع هيني فايت ! بس ما رح اطول من هسه ها !!
- يما الخوف !! مين كلك طول مش باكي الا ساعه لأذان المغرب !!
- مش خايف !
- هههه طب فوت فوت يلا
لم يستغرق عمر سوى عشر دقائق أثناء استحمامه و خرج مباشرة و عقدة الغضب بين حاجباه ...
-نعيما ولا!! منورة ريحة الشامبو
-كمنكلع شبدي البس هلكيت انا ؟
- جبتلك اواعي تخفش
- تكليش بدله !!
- ااه ليش تكليش بدك تروح ببلوزة
- اكلك شو ؟؟ انا بطلت اروح و بطلت اتزوج و بدي اروح علبيت !!
- روح روح و انت مش لابس اشي !! روح بالبشكير اللي عليك يلا
- انكلع اعطيني البدلة بس مش لابس الجكيت من هس بكلك ..
- طيب طيب يلا البس الكميص اشوفو عليك !!
و ارتدى عمر القميص و البنطال , بدى وسيما للغاية و حتى قصة شعره كانت جميلة للغاية