Gedigte

Boksiemense

Die lewe éís, jy konformeer

In dié formaat, word jy geleer,

Vierkantig kassies, opgelyn

Glimlag gou mooi, bewaar die skyn!

"Gemiddeld!", wagwoord van die jaar,

So swem ons waar die stroom heen vaar.

Skool visse wat moet swenk en swaai,

Ontwyk die hap van honger haai.

Bang kuddediere, maal ons rond,

Nes vlakvarke, aanbid die grond.

'n Hotsnotsgod wat handjies vou,

Met ja en amen, vol berou.

Klein miertjies, netjies in 'n ry,

Moet harder werk om kos te kry.

Ons wyk nie af, kyk reguit voor

Moet tog net nie dié pad verloor!

'n Lepel, silwer, groot en rond

Knyp toe die oë, maak oop die mond.

Dikteer die brein tot barstens vol,

'Versadig', maar so blind soos mol!

Soos bliksoldaatjies, voort marsjeer,

Onsigbaar mag, wat hier beheer,

Tot in die spervuur van verdriet

En nooit eens self, 'n skoot geskiet!