بركان أنشقاقي

* الفصل الحادي عشر *

عند مادلين في البيت ....
كان قاعد ثروت في المكتب ، و بعد ما اليوم خلص ، و اتأكد ان مادلين نامت .. فتح درج المكتب و اخد منه الشنطه ، و خرج من المكتب و قفل الباب و مشي .....
في اوضه چمانه .. كانت بتغير هدومها عشان تنام .. و فجأه الباب اتفتح ، وقفت چمانه في صدمه ، و حضنت هدومها ، و اديها بتترعش من الخوف .. و اتكلمت .....
چمانه:خير يا دكتور ثروت ، في حاجه ؟
اتكلم ثروت ، و نظراته لچمانه كانت بتقتلها .....
ثروت:نادين جابت هدومك اللي كانت معاها .. هتلاقيهم في الشنطه دي
خلص ثروت كلام ، و حدف الشنطه في الاوضه علي الارض ، و قفل الباب و مشي ....
قعدت چمانه علي السرير ، و قلبها بيدق من الخوف ، و نفسها عالي جداً .. و بعد ما بدأت تهدا ، قامت و لبست هدومها ، و اخدت الشنطه من الارض و شافت الهدوم اللي فيها ، و شالتها .. و بعد ما خلصت طفيت النور و نامت .....
( روايات بسوم )
___________________________________
تاني يوم الصبح .....
في بيت عمار ....
صحيت روميساء من النوم ، خرجت من الاوضه .. اول ما خرجت شافت بسام قاعد علي الكنبه ، بصيتله و دورت وشها و مشيت ، و قبل ما تدخل الحمام وقفت ، لما سمعته بينده عليها ....
بسام:روميساء
وقفت روميساء ثواني ، و بصيتله و اتكلمت ....
روميساء:نعم ؟
بسام:صباح الخير
روميساء:صباح النور
بسام:لسه زعلانه ؟
روميساء بتريقه:و هزعل ليه ، هي في حاجه تزعل !
بسام:اها طبعا .. اسلوبي معاكي امبارح
روميساء:يعني ...
قاطعها بسام:قبل ما تقولي اي حاجه .. انا عارف اني غلطان ، انا اسف بجد
ابتسمت روميساء ، و بصت في الارض و اتكلمت .....
روميساء:حلوه الاغنيه دي اوي
كان بسام بيسمع اغنيه ، اول حب لعامر منيب ....
قام بسام من مكانه ، و وقف قدامها و هو بيغني مع الاغنيه .....
بسام:ياما كتير ليالي ، و ياما كتير عيون ، ضاع فيها عمر غالي ، في الحيره و الظنون .. و اتغير كل حالي من يوم ما شوفتها
اتكسفت روميساء جدا ، و اتكلمت بخجل ....
روميساء:بعد اذنك
قالت الكلمه دي و دخلت الحمام علي طول .. ضحك بسام علي كسوفها و لبس الشوز بتاعه ، و طلع راح علي القهوه ....
( روايات بسوم )
___________________________________
في مبني الصحافه .....
ايسل قاعده في مكتبها ، و بتتكلم في الموبايل ....
ايسل:ايوه يا فارس ، انا بسألك سؤال ، يبقي تجاوب عليا
فارس:اجاوب علي ايه ؟
ايسل:لوسيندا و بيبرس فين يا فارس
فارس:انتي اتهبلتي ولا ايه !! انا مالي و مال لوسيندا و بيبرس يعني ، و بعدين ما انتي عارفه انهم في شغل
ايسل:في شغل ، بس المفروض انهم يتكلموا او يظهروا ، لكن دول فص ملح و داب
فارس:طب و انا مالي
ايسل:عشان هما اخر يوم كانوا معاك انت قبل ما يسافروا ، و من ساعتها ما ظهروش
فارس بعصبيه:لا ده انتي اتجننتي رسمي بقي .. بقولك ايه ابعدي عني احسن
ايسل:انا كنت عارفه انك مش هتتغير ، انا غلطانه اني بكلمك اصلا .. سلام
خلصت ايسل كلامها ، و قفلت السكه علي طول ، و رميت الموبايل علي المكتب ....
في اللحظه دي كانت داخله سيرين المكتب ، و شافت اللي حصل .. دخلت قعدت علي مكتبها ، و اتكلمت ....
سيرين:مالك يا بنتي في ايه ؟
ايسل:ماليش
سيرين:مالكيش ازاي ! و انا سمعاكي بتزعقي مع فارس ، و رميتي الفون بتاعك .. في ايه يا ايسل بس ؟
ايسل:شاكه فيه يا سيرين ، شاكه فيه و مش طيقاه
سيرين:شاكه فيه ازاي يعني !! و بعدين هو مش ده حبيبك ؟ ازاي بقي شاكه فيه !
ايسل:بدأت احس انه مش حبيبي ، و بدأت احس انه غريب و مش مظبوط
سيرين:يعني ايه ؟ مش مظبوط بالنسبا لايه ؟
ايسل:و الله يا سيرين مش عارفه ، بس هعرف
سيرين:اممممم
( روايات بسوم )
___________________________________
عند نادين في البيت .....
بتتكلم في الموبايل .. و هي ماسكه دوسيه و بتدور فيه ....
نادين:هتعمل اللي اتفقنا عليه امتي ؟
تيسير:وقت ما حضرتك تحبي
نادين:ثروت مسافر النهارده .. الموضوع ده يخلص بليل
تيسير:و انا تحت امرك يا هانم
نادين:لما نشوف يا تيسير .. اول ما تخلص كلمني
تيسير:تمام
نادين:يالا سلام
تيسير:سلام
قفلت نادين مع تيسير ، و مسكت الدوسيه ، و طلعت منه ورق كتير ، و كملت قرائه فيهم ....
( روايات بسوم )
___________________________________
بعد ساعه .. عند مادلين في البيت ....
كانت مادلين بتحضر الشنطه لثروت ، و ثروت في الحمام .. و بعد دقايق خرج و اتكلم علي طول ، و هو رايح يقف جنب مادلين ....
ثروت:بتحضريلي الشنطه بنفسك .. ده ايه الرضا ده
مادلين:يعني لو مش هحضرهالك ، هحضرها لمين
ثروت:اممممم بتثبتيني يعني
مادلين:في ايه يا ثروت ، غلطانه انا يعني اني بحضرلك الشنطه
ثروت:لالالا ، ده انا ماصدقت .. تسلم ايدك يا روحي
و مسك ايديها و باسها .. ابتسمت مادلين بتكبُر ، و اتكلمت ....
مادلين:ميرسي يا ثروت .. غير هدومك بقي عقبال ما اخلص تحضير الشنطه ، و چمانه تجهز الفطار ، عشان نفطر مع بعض
ثروت:ماشي يا حبيبتي
مشي ثروت عشان يلبس ، و مادلين بتكمل تحضير الشنطه .. و چمانه تحت في المطبخ بتحضر الفطار .....
( روايات بسوم )
بعد ربع ساعه ، طلعت چمانه من المطبخ ، و بدأت تحضر الفطار علي السفره .. و فجأه و هي طالعه من المطبخ ، شافت شاب قدامها .. أتخضت جداً ، و وقفت مكانها مش بتتحرك .. و الشاب اتكلم ....
- ايه شوفتي عفريت !!
اخدت چمانه نفسها ، و اتكلمت بصوت هادي جداً ....
چمانه:انا اسفه جداً ، بس ما اعرفش حضرتك
- طيب يا ستي ، اعرفك .. انا نضال ، صاحب البيت ده
چمانه بعدم فهم:صاحب البيت ده ، ازاي يعني !!
نضال:انا ابن الدكتور ثروت ، و مادلين هانم .. في حاجه !
چمانه:لالا مافيش حاجه .. انا اسفه جداً ماكنتش اعرف
نضال:مش مشكله .. المهم انك عرفتي
بصت چمانه في الارض و ما اتكلمتش .. و نضال كمل كلام ....
نضال:انتي بقي الشغاله الجديده ؟
چمانه بخجل:ايوه انا
نضال:اممممم بس حلوه
بصتله چمانه بخنقه ، و اتكلمت .....
چمانه:بعد اذنك ، عشان بحضر الفطار
قالت الجمله دي و مشيت ، راحت تكمل تجهيز السفره .. و نضال اتكلم بصوت عالي ، عشان تسمعه ....
نضال:حلوه بردو ، و مش هتعدي من تحت ايدي
قال الجمله دي و ضحك .. و طلع خبط علي اوضه ثروت و مادلين ، و فتح الباب و دخل علي طول و هو بيتكلم ....
نضال:انااا جيت .. وحشتووووني
فرحت مادلين جداً اول ما شافته ، و جريت عليه و اخدته في حضنها ، و اتكلمت .....
مادلين:وحشتني اووي يا حبيبي .. كنت فين كل ده
نضال:كنت بتفسح مع اصحابي يا ماما ، ما انتي عارفه
مادلين:بس غيبت عليا اوي يا حبيبي
نضال:معلش بقي يا ماما ، حقك عليا
باسها نضال .. و راح عشان يسلم علي ثروت ، و قبل ما يتكلم .. قاطعه ثروت .....
ثروت:تسيُب و قله ادب ، ما هو انا اللي سامح بالمهزله دي
قال ثروت الجمله دي ، و بصله بقرف و خرج من الاوضه .....
( روايات بسوم )
استغرب نضال و بص لمادلين ، و اتكلم ....
نضال:هو في ايه ! مش هيتغير بقي !?
مادلين:ابوك و انت عارفه يا حبيبي ، معلش ما تزعلش .. يالا بقي ننزل نفطر
نضال:ماشي يا ماما يالا
نزل نضال و مادلين عشان يفطروا ، و كان ثروت في المكتب ....
قعد نضال ، و مادلين اتكلمت .....
مادلين:هروح المكتب انادي ثروت يا حبيبي .. ثواني مش هتأخر عليك
نضال:ماشي يا ماما
مشيت مادلين ، و راحت علي المكتب .. و قبل ما تفتح الباب ، سمعت حاجه صدمتها و .....
........................
#بسمه_ممدوح