الإنكسار

البارت الرابع عشر

البارت الرابع عشر
#الانكسار
#بقلمي_شمس

من شافني مصدومه والموبايل بيدي والدموع تنزل والرسائل مستمره بالارسال . 
اجه بسرعه سحب الجهاز من ايدي .. وگلي حبيبتي .. بس اسمعيني انتي فاهمه غلط ..
اني بس اتباوعله بأحتقار .. وگوتله .. يعني كل ليله تروح يمها تنام وتشبع غريزتك وتجي تنام يني وتحظني ..
لك الشغله الي متقبلها ع نفسك شلون تقبلها ع غيرك .. انت تدمرت من الخيانه .. شلون تعيشني الي عشته انت حرمتني من الفيس ومن الفايبر ومن كولشي وقبلت وگلت حقه .. اشهر واني متحمله العقد الي بيك واحاول اتخطاهه واخليه تتعالج من مرض عدم الثقه بالناس خليتك تثق بيه ونطيتك كولشي شبابي ومستقبلي .. ربيت نونه مثل بنتي واكثر ..
وحسبت عائلتك عائلتي . بعد كل هذا تجي تطعني بظهري وتخوني .. ومو بس رسائل لا  .
طلعت تروح الها وتنام وياهه .. ملعبت نفسك مااتذكرت طعم الخيانه الي صارت وياك ..
اصلا انت متفرق عنها .. انت نفسها تشبهها بس الفرق هي خانتك بفراشك وانت خنتني بفراش عشيقتك ..

هو الكلام كوله ساكت بس من وصلت للاخير تخبل ..وگام يعيط حاول يسكتني .. كافي سمرا اترجاج كافي عبالج مايأنبني ضمري بس والله غصب عني اصدقائي قشمروني وبس مره وحده رحت الها . الايام الباقيه كنا نسهر بالكوفي ..
اجو عمو وخاله وميوسه ع صوتنا .

سمرا .. ههههه كافي كذب انت صغير وضحكوا عليك انت اكبر واوعى مني رجال عمرك حيصير 31 سنه وبعدين كلامها الك ميگول هيح .. وحتى اذا اول مره المهم خنتني ولمستها ..
امير .. انتي السبب هملتيني من حملتي لسا ..
سمرا .. گمت اعيط عليه وگوتله .. يعني اذا تمرضت تتركني وتشوف غيري هو هذا مفهومك للزواج .. ليش منو گلك. الزوجه مكينه تجيبها تلبيلك طلباتك وغرائزك واذا عطلت تشتري غيرها.. 
مع الاسف عليك امير .. اصلا متستحق اعيش وياك دقيقه لان نزلت من عيني .. وكرهتك .. لو اني مسويه هيج كان قتلتني مثل مسويتوا بلي قبلي بس اني مااقتلك راح اتركك تتعذب بضميرك هاي اذا عندك ضمير ..
واخليك تتحسر ع شوفه ابنك .  وهذا اكبر عذاب الك

عمو بقى يعيط .. فهمونا شنو السالفه ..
سمرا .. اعتقد فهمت كولشي عمو من كلامنا .. ابنك خاني وي غيري وباليل يروح الها وينام يمها ..
لهذا اني اريد اروح الامي هسا . وورقه طلاگي تجي وراي ..
عمو وخاله .. بنيتي افهمينا مو هيج تحلين الامور ..
سمرا .. رجاء عمو الشغله الي متقبلوها ع ابنكم لتقبلوهه عليه لان اني اعتبرتكم اهلي .. لتضلموني وي شخص خاين وميستاهل حبي ..
لان اموت نفسي ولااعيش وياه ..
عمو .. گال يله بنيتي روحي ويانا للبيت لان امج خطيهرهسا نايمه واخاف تنهبط اذا رحنالهه هسا .. نامي عدنا الليله والصباح رباح ..
اخذت غراضي وملابسي وغراض نونه .. وطلعنا من الغرفه عمو اتجه ع امير .. وگله .. تف عليك مستحيل تكون ابني انت ..
امير بقى مخلي ايديه ع راسه وگاعد بالصاله .. شال راسه باوعلي بحزن وندم وكأنه يتوسل بيه .. كانت هاي اخر نضراتي  .. تركته ومشيت اجه احمد اخذنا .. رغم حبي اله كسر گلبي وخذلني .. مااتوقعت يوم اكو شخص يتعرض للخيانه ويتدمر ويرجع يخون هو .. مهما كانت الاسباب والمبررات .. ماكو شي يغفر الخيانه ..

رجعت وي بيت اهل امير لان الساعه صارت 11 ومگدرت اروح الماما .. اكيد حتقلق ..
دخلت بغرفه ميوسه ونونه بحظني عبالك گلبها يعلم اني حتركهم ..
بس نونه تعودت عليها ومااگدر اخذها وياي لان اكيد امير حيطلعها حجه ويجي كل يوم للبيت ..
بيومها للصبح اني منمت .. وخاله وعمو واحمد وزوجته كولهم يقنعون بيه اهدأ ومااتسرع ..
واني بس صافنه مجاوبتهم .. لان هم معاشو وياه وشافوا شلون يعاملني ببدايه الزواج .. عبالك وحده خاينه يعايرني بأمي ويقفل الباب عليه من. يطلع ومخله حتى رقم صديقاتي اتواصل وياهم حرمني منهم كل هذا واتحملته .. وخليته يحبني ورجعتله الثقه الي كانت منعدمه عنده .
وتالي يخوني بسهوله .. لان كنت حامل ومشغوله دايما .. مافكر بيه يوم وساعدني بحمل البيت ونونه ودوامي .. كان اناني يفكر بنفسه وبغريزته الي يريد يشبعها بأي طريقه ..
ميوسه الوحيده الي فهمتني .. الكل يگولي لتخربين بيتج ..
صار الصبح طلبت من احمد يوصلني ..
اخذنا اني وميوسه لان عندها دوام .. عمتي خطيه ضغطها ارتفع بسبب امير . فمگدرت اترك نونه عندها اخذتها وياي الى ان تصير عمتي زينه ..

وصلنا ميوسه للجامعه .. واحنا رحنا للبيت والطريق كوله يگولي خويه فكري زين لتتسرعين انتي تحبين امير وهو يحبج وهاي ساعه شيطانيه .
سكتت محجيت وياه لان ابنهم هيج يگولون بس لو غير انسان متأكده ذموه ..
والدليل زوجه امير الاولى انقتلت لان خانت بينما امير الكل يدورله اعذار ليش ..
لانه رجال .. وماعليه عيب .. مجتمع فاشل يحلل الي حرمه الله وهو الزنا لمجرد انه رجال ..
وصلت البيت اهلي .. دگيت الباب فتحهه ولد مااعرفه طويل وحنطاوي حلو ..
ابتسم بوجهي .. گلي اكيد انتي سمرا ..
گوتله بلي اني .. منو حضرتك ..
ظحك وگلي ادخلي وانتي تعرفين بقيت مستغربه .
واحمد هم عصب من شافه نزل الغراض كولهه ..
وعينه ع الولد ..
تالي طلعت ماما تلگتنا .. واني من شفتها نسيت كولشي وحظنتها وابجي فرغت همي بحظنها . لان هي اكثر وحده تفهمني .. حتى لو كانت مو امي الحقيقيه بس هي الي ربتني وعلمتني ع الصح والغلط وهي الي تحملت كولشي عمودي هذي الانسانه الي تستحق اسميها ام ..
#بقلمي_شمس
يتبع…