كان جوابي الموافقه..
فرحوا اهلي ونطوا خبر لبيت ابو عمر وكالولهم باي وقت يناسبكم تشرفونه...
صار موعد كعده الزلم وجابوا مشايه وسيارات ترست الشارع كلها ناس مبينين اهل اصول...
جانت نور يمي وساعدتني بيومها هي وشمس مرت حبيبي حسوني ...لبست فستان ستن ذهبي بس مو صارخ طويل وبي فتحه من وره مقسم وشريط اسود على الكمر وعليه بليره ربع ردن كيبور اسود
وبقيت شعري مفتوح ومكياج هادئ يناسب الفستان..
صار الموعد وبدوا يدخلون الرياجيل واني ونور دنباوع من غرفتي فوك وتطل على الطرمه وخاتلين وره البرده نبصبص مثل الحراميه..
والدي وحسوني ديستقبلون الضيوف وجان يفوت عمر راسا عاطت نور المخبله عااا لج بس لا هذا العريس كلتلها اي كالت صدقه ولج يمووت راح اعوف حمودي واخذه ضربتها وكلتلها انجبي حرامات حمودي بوحده مثلج طاكه فيوزاتها وضحكنه...
فاتوا كلهم واخر شي فاتت ام عمر وياها بنات 2 بعمري او اصغر وياهم اثنين نسوان كبار بالعمر ...
رحبت امي بيهم وصاحتني وطبعااا فتت سلمت السلام عليكم وشايله الكهوه حرام داتخيل نفسي اني بفلم مصري ههههه وقدمتلهم ..
صاحتني خاله ام عمر تعالي ياوردتنا اكعدي يمي واعرفج على الحضور ..كلتلها نعم خاله جايه وعرفتني وحده خالت عمر والثانيه عمته والبنات وحده رهف اخته مشاوفين بعرس اخويه والبنيه الثانيه جانت مرت عمه وبعدها عروس جديده..
كالولي ماشاء الله حلوه واخلاق الله يحفظج ويتمم بخير...
بهالاثناء الرياجيل كملوا تفاصيل الخطوبه والمتقدم والمتاخر وقروا الفاتحه...وصاح عمو ابوعمر على خاله لان الصاله جانت بصف الهول هلهلي ام عمر ..
وخاله ركعتنا بهلهوله الاشكت اذني وباركولي كلهم ودعولي بالتمام..وطلعت رحت للمطبخ ونور المجنونه فززتني وباركتلي وخربانه من الضحك..
حسوني ضيف الرياجيل كيك وعصاير ونور ضيفت النسوان ..واثناء من جنت بالمطبخ خاله ترخصت من ماما علمود عمر يفوت للهول يشوفني وماما قبلت صاحتني ماما وفتت بهالاثناء عمر كاعد بجانب الباب وامي واهل عمر كبال الباب مباشرة فجان تركيزي كله عليهم..
نعم ماما ..اسوله عمر يريد يسلم عليج طبعاا كمت اكلب الوان ونفسي تسارع ..شلونج اسيل خطوبه مباركه والله يتمم بخير كتله بخير اشكرك مطلعت مني بس هل3 كلمات..واترخص عمر ورجع يم الجماعه..
راحوا ورتبنا البيت وانتهى يومنا بسلامه..
بس ضليت افكر بروود عمر شاغلني وماكو لهفه ..عفت الموضوع وثاني يوم داومت وكلت النور ..جان تكلي لتضلين وهواسيه ليش اكو ولد ينغصب بس اكيد مستحي ويبيع ثكل عليج...كلت اي والله حجيها صح..
وره كم يوم اتفقنا واجوي اخذوني اني وماما ورحنا دنشتري الذهب والنيشان جانت خاله ام عمر ويانه وعمر ونزلنه لا ابو الذهب اول شي واشترينا حلقات كلش حلوه وامي اشترت حلقه لعمر لان هيج العادات.. عمر كله ساكت من اباوع عليه يبتسم بروود بس كملنا الحلقات عمر ترخص وكال عندي شغله مستعجله بالشركه الوالده وياكم كملوا الذهب وكل لاامه اخذيلها تخم ثكيل ولتبخلين عليها ..امي كالت مودع وليدي اخذ راحتك..بس حسيت خاله ضاجت لان عافنه..
المهم اخذتلي تخم ايطالي ثكيل ونازك ونواعم فرفشه وخاله طول الوكت تتعذر من عمر وحسيتها محرجه ..وكملنا النيشان ورجعنا
جان يومنا حلوو بس كلش تعبنا...
الخميس صار موعد نكطع مهر بالمحكمه واتفقنه نتشاوف اهلي واهله بالمحكمه...لبست فستان ابيض ومضرب بشرابي كلش انيق..طبعاا احنه ناس على كدنه بس امي مقصرت ويايه بكلشي من صغري جانت تسوي جمعيات ويه الجوارين وتلبسني ذهب واحلى اللبس..
المهم رحنه للمحكمه من فتنه عمر جان طالع فد شي لابس بنطلون اسود وقميص اسود والكمم لونها فيلي والعطر يسطر ..بس بعده ثكيل كلت اني هم ابيع ثكل شويه وما اريد اتعلق بي الا وره الزواج لان اخاف من يوم حادثه المرحوم...
فتنه للقاضي وكطعنه مهر وهلهلوا وطشوا جكليت وعمر لا اول مره باوع بعيني وكلي مبروك ..جاوبته مبروك الك هم ورحنه كلنا عزمونا بيت عمو ابو عمر على الغده وتغدينه بمطعم..
واحنا بالمطعم دك تلفون عمر ومجاوب وسوا صامت وظل يدك هزاز ترخص وراح حجه تلفون واني عيوني تراقبه ورجع عمر صاير نار بس حاول يخفي بس اني حسيته...
رجعنا للبيت...وثاني يوم سوينا حفله بيناتنه
أنت تقرأ
عشق وألم
Romanceالكاتبه أم آيه 😻🌸 قصه جميله جدا بيها هواي عبر منها الصبر والتحمل تتكلم عن بنت جميله تتزوج شاب وهذا الشاب تكون عنده علاقه ويصير اتفاق ما بين الزوجين انه ميحصل شي ابد ومده الاتفاق 6 اشهر بعدها انفصال ولكن تحدث هواي امور تغير حياتهم تابعوا وياي القصه...
