عشق وألم

البارت الرابع

نزلت اركض كل 3 درجات سوووه ...وركضنا عليها كلنا وهي تبجي وتصيح اصخمتي يااختي ويابنتي سواد وجهي عليك ليوثي تعال عروستك تنتظرك  والله صغير بعدك على الموت يابعد خالتك...
بها الاثناء وكعت ومحسيت نفسي الابالمستشفى وحاطيلي المغذي والابر وفاقده وره 3 ايام ياله صحيت..ولو مصاحيه احسنلي..
ليث راح وميرجع بالطريق مسووين حادث داعمتهم تريله من جهته الي ديسوق بيها وخالتي ورجلها كسور..
مات ليث وماتت احلامي وذابت روحي واسودت الدنيا وتغير كلشي..
مصدومه وماكدر ابجي وامي دكلي بنتي ابجي طلعي قهرج لتظلين كابته بكلبج تره تطكين وتموتين من القهر..لتحركين كلبي عليج بنيتي..(ام آيه)
طلعنه رابع يوم للبيت واهلي معافوني بابا وحسوني وماما..اني جنت اسمعهم بس حاسه نفسي بغير عالم يشربوني مي واكل غصب..
مرت 7 ايام على وفاته واني بعدني ساكته ومناطقه ولا كلمه..اجتني ماما وظلت تواسيني وتمسح بايدي وتبوسها ودموعها تجري على ايدي..كلتلي انتي صغيره والايام الحلوه تنتظرج وهو مو قسمتج والله يعوضج ان شاءالله..ومدت ايدها على حلقتي ونزعتنياها حتى مااظل اذكره وهي دتنزعنياها بجيت بحركه وصحت ليث ليث ..بجت امي وصاحت بابا وحسوني وكلتهم بجت وصاحت ليث ..فرحوا اهلي وحاجوني وواسوني وابويه كلي اذا يصير بيج شي اني امووت..كتله اسم الله عليك..وبعدني ابجي..
كتله حسوني اريد اروح اني وياك لمكان وافق حسوني وكلي امر حبيبتي..

بدلت ولبست تنوره سوده وقميص اسود وذبيت شال على راسي وقررت اتحجب واتقرب من الله بلكت يصبرني على فراكه..
رحنا للصايغ ولكيته وسلمني الهديه..وسلمته باقي المبلغ..
رجعت للبيت فتحتها وشفتها نازكه وناعمه ولبستها وكلت هذا اخر شي بقالي من ريحته..
تعبت هوايه واكثر الايام اخذ مهدئات وحسوني معافني ولا لحظه..ونور ساعدتني وتجيني مرتين بالاسبوع تدرسني الماده وجتي الامتحانات وامتحنت ونجحت ومرت على وفاه 6 اشهر واني يوميه داموت الف موته وحاسه انكسر شي بداخلي.
شفت اهلي ديتعبون وينقهرون عليه ابويه صار بي السكر وامي شكل عدها الضغط..
فقررت لازم ادوس على حزني لخاطرهم وبالفعل الله انطاني الصبر والحمدلله ونجحت من السادس ..
وانقبلنا اني ونور اثنينا بايولجي لان جبنا نفس المعدل فرق بسيط بالاعشار...