خفايا انثى

البارت الرابع

البارت الرابع
#خفايا_أنثى
#بقلمي_شمس

اني من عرفت انس حيطلع للخارج ضجت وبيوم الي راد يسافر بقيت ابجي وحاظنته وهو يتلمس بشعري واني مكنت لابسه حجاب وشعري كيرلي .. گال اموت ع هذا الشعر .. ومسح دموعي ..
وگال أنتضريني منا الى ان ارجع .. مو تتزوجين سواهه بضحك ..
امه گلتله .. لا هاهي بقت بس تاخذ وحده مالها نسب . ماما ضاجت حيل وطلعتنا منهم وگلتلهم بعد يحرم علينا بيتكم ..
ضجت لان بعد مااشوف انس .. وبقيت ادرس واهتم بدراستي .. ردت اصير مثل انس وادخل طبيه .. كان المثل الاعلى بالنسبه الي ..

نجحت من المتوسطه وبتفوق .. الى ان صرت بالثالث متوسط .. وامتحنت وكنت بكل الامتحانات زينه ..
وبيومها رجعت للبيت واهلي اتأخروا حميت الاكل الاخواني واكلوا لان احنه نجي قبلهم وماما مسويه الغدا من الصبح .. بس نجي نحميه .. صارت ال 3 وفوگ وماكو اهلي قلقت عليهم .. اتصلت من الارضي ع بيت جدوا ماكو احد يرد ..
زاد قلقي وبقيت ابجي .. وخفت ليصير بيهم شي ماعندي احد بالدنيا غيرهم .
وفعلا الي خفت منه صار .. من طالعين من المستشفى بطريقهم انفجرت سياره مفخخه واهلي ماتوا ..

من اجه عمو اخدنا وگللنا ابوكم وامكم ماتوا .. انصدمت مبجيت ولا گلت اي شي بس صافنه ..
گوتله انتوا كذابين بابا وماما ميموتون بس انتو تكرهوني وتردون تقهروني ..
وماحسيت الا ضربني راشدي .. هذا كان اول راشدي اخذه بحياتي ..
وگلي بعدج شنو شفتي من القهر .. نزلت دموعي وابجي وهو دفعني وطلعني وقفل الباب واخذنا بالسياره البيت جدو ..
مصطفى حظني طول الطريق ويبجي ومحمد گاعد يم عمو ويبجي هم ..
اني حسيت بثگل الدنيا علينا وشلون راح نعيش ..,
بعد اهلي .. وصلنا واني حتى ملابسه اسود وماعندي اصلا ..
شفت الكل يعيط .. ركضت ع بيبي وگمت اعيط .. حسيت حياتي انتهت .. توقفت حانت ساعة الصفر ..
واني اتباوع بعيونهم الي تريد تاكلني .. ولو مافاتحه كان طردوني ..
تركوني وراحوا .. هسا حسيت نفسي يتيمه ومالي اهل من صدوگ ..
كنت عايشه بدلال .. وحتى اهلي الحقيقين مااهتميت الهم ..
الفاتحه كولها ابجي ودمرت نفسي مااعرف ع اهلي او ع حظي ..
بيبيتي حنينه .. ماخلت احد يمسني .. خلال هذي الفتره ..
خلصت الفاتحه .. وجابوا ملابسنه وغراضنا وقفلوا بيتنا لان بعدنا صغار وبقينا يم بيبي ببيت عمو الكبير گاعدين .. عمو ابو انس ..
مرت عمو كل ساعه تگومني ..تشغلني بس بيبي متقبل وتخليني يمها بالغرفه .. تگولها عندج بنات گوميهن .. ارجوان بعدهي حزينه ع اهلها .. حرام عليج ..

شفت عيون 👀 الحقد عند مرت عمو وبناتها .. هم كانوا يحبون محمد ومصطفى بس اني يكرهوني .. حتى سوولهم غرفه فوگ الاخواني وجابوا اثاث غرفتهم.. بس اني مااهتموا وانام بالگاع يم فراش بيبي .. شگد اتوسلت البيبي گولتلها خلينا نروح نگعد ببيتنا واني اشتغل واطبخ وانظف بس ابقي يمنا .
بس عمو مقبل وبيبي خطيه صحتها ساءت بعد وفاة بابا ..  وماتگدر تگوم ..
وكل يوم طبيب لهذا عمو مقبل .. گال ليصير عليها شي وانتو ماكو احد يمكم ..
ومرت عمو تگول اي عيني تردين تبقين هناك وحدج حتى تبقين ع راحتج وتسوين مثل مسوت امج الزانيه ..

اني بقيت اعيط عليها .. وگولتلها لتگولين امج اني ماعندي ام غير ماما منى ..
دخلت البيبي ابجي .. شويه اجاني محمد وشبعني كتل وهو اصغر مني . ويضربني مرت عمو قرات براسه ..
تالي دفعته .. وگتله حرام انت اخويه او ابن بابا وماما ماعندك كل رحمه ..
محمد .. ومنو گلج انتي اختي .. انتي وحده من الشارع والمفروض نرجعج للشارع بس لعيون بيبي باقيه هنايه .
بيبي .. لك امشي سخيف . هو انت خليت بيها عيوني مستحيت وضربتها گبالي وتگول لعيون بيبي ..
اطلع من غرفتي مااريد اشوف وجهك ..

مرت الايام وصار الاربعين مال بابا وماما .. ورحنا نزورهم .. بس بيبي مگدرت لان مريضه .. دخلت الها گلتلي يمه ديري بالج ع نفسج لان بعدي محد يهتملج ولتخافين ابوج ضمن حقج .. بوستها ونطيتها علاجها وطلعت ..  #بقلمي_

وصلنا القبر اهلي .. حظنتهم وابجي .. واعاتب بيهم ..

هانت عليكم دمعتي😭 وماتسألون
رحتوا وتركتوني للي مايرحمون…

بعدني ماكملت ماحسيت الا انجريت من شعري وبتراب المقبره .. وصوت عمي يگلي لج من الي ميحرحمون لج مو زين لفيناج من الشارع وسويناج بنت ناس وانتي بنت زنا…
الناس كولها تباوعلي وهو مسح بيه تراب المقابر ..
مااحجي بس عيني ع قبر ابويه وامي وابجي واعتبهم بداخلي ..
ربي ارحمني واخذني وياهم .. لاتخليني للضيم .. لو مخليني بميتم ولايسوون هيج بيه ..
تركني وراح بعد مادفرني برجله مسحت ملابسي وصعدت بالسياره وابجي ..
صعدوا يمي اخواني .. محمد يباوعلي بحقد .. ومصطفى يگولي متأذيه اشرتله براسي لا ..
محمد .. لك عوفها ختولي شنو مهتملها ..
مصطفى يباوعلي وضايج بس هو شخصيته ضعيفه ميگدر يسوي شي وشنو بيده وهو هم طفل بالاول متوسط ..
بعكس محمد رغم صغر سنه بس شخصيته قويه ..

رجعنا للبيت تعبانه وجسمي يوجعني من الظرب دخلت گبل البيبي وسديت الباب .. رحت يمها ع السرير وحظنتها ونمت يمها لان هي الوحيده الحنينه الي باقيه الي .. من حظنتها تلمستها بارده ثلج .. گمت اگعد بيها بيبي بيبي گومي شلت ايديها وگعت مني .. گمت اعيط
#بقلمي_شمس
يتبع…