البارت الثاني
#خفايا_أنثى
#بقلمي_شمس
*عن لسان والدا ارجوان الحاليين ..
اني منى .. خريجه معهد طبي .. تعينت بمستشفى الاطفال والتوليد اول متخرجت .. وداومت معاونه طبيب كم شهر وبعدين صرت ادوام بصيديليه المستشفى مع دكتور صيدلي… اسمه حسن .. انسان خلوق ويخاف الله . كان عينه ميرفعها عليه ..
واول ماحس بأعجاب بيه .. وشاف اخلاقي اني كنت ملتزمه بذاك الوقت والبس حجاب .. وملابس مستوره .. خطبني بسرعه وتزوجنا ..
انسان بمعنى الكلمه يحبني ويخاف عليه وغمرني بحبه .. كنا مرتاحيين ماديا الحمد لله راتبنا مكفينا وهو عنده بيت بس صبغه ورتبه وشويه شويه غيرنا الاثاث وتحسنت حالتنا لان ماكان حتى طفل عدنا نصرف فلوسنا عليه ماعدا الاطباء الي تعبنا منهم وقررنا نتركها ورى الله ومنراجع بعد ..
لان كولهم نفس الكلام مابيكم اي شي وهاي ارادة الله . والنعم بالله .. خلينا املنا بي كبير ..
وبقيت دايما اردد .( ربي لاتذرني فردا وانت خير الوارثين ) ..
وعندي امل يجي يوم والله يرزقني بطفل .. لكن ماحسبت يوم يرزقني بطفل مو مني او من حسن ..
بيوم وكالعاده طلعنا الصبح للدوام واحنه نطلع ع كفينا لان المستشفى قريبه ع منطقتنا ..
وجان نسمع صوت طفل يبجي .. باوعت بالحديقه ماكو .. قفلنا الباب وطلعنا .. لگينا بالباب كارتونه وبيها طفله تخبل حمره بيضه وسمينه .. بس مبينه حديثه الولاده لان حتى دمها بيها ..
رفع حسن البنيه واني اتباوعلها وابجي .. واگوله ياألهي .. اني صار سبعة سنوات اريد ريحة طفل .. واكو ناس تاخذ تشمر اطفالهه بالكراتين ..
كنت دايما تجينا هيج حالات . للمستشفى بس ماكنا نهتم ولا ببالي اتبنى واحد منهم ..
لان كان عندي يقين انه يجي يوم والله يرزقني ..
بس هذي الطفله تختلف اجت حد بابي وكأنه الله نطانياهه .. وخاصه لمن قرأت اسمها مكتوب وتاريخ ولادتها اوووف ياربي اليوم مولوده 1/22ومكتوب هذي امانه الله عندكم ..
الناس التمت وتذم بأهلها .. وتگول اخذوها للشرطه او ودوها للميتم ..
اني رفضت ,.. گوتله حسن هذي الطفله الله دزها النا .. خلينا انبلغ ونشوف الاجرآت ونتبناهه .. مستحيل افرط بيها ..
ولان حسن انسان متدين ويخاف ربه .. مارفض ورحب بالفكره ..
اكو ناس گالوا شلون تتبنون وحده مامعروف اصلها ولقيطه .. ومنهم اهله رفظوا وگالوا راح تنحسب علينا وماتنطي واسمك وعشيرتك الوحده ( نغله) مثل مالبعض يسموهه ..
لكن اكو ناس اندعت النا وفرحت .. راح استشرع حسن وسوه الاجرآت ..
وسجلها بأسمنا .. ارجوان حسن محمد .. واسم الام منى هادي فرحت بالجنسيه واسمها متسجل بأسمنا ..
لكن حسن خطيه فتره قاطعوا .. بس امه كانت تجي يمنا واهلي هم مقبلوا بس ماعارضوا ولان شافوني فرحانه فرحوا الفرحنا ..
واجت ناس تباركلنا .. حسيت ربي نطاني نعمه .. وكل فرض بصلاتي اشكر ربي عليها ..
حسن اشترى سرير الها وتسوگنا ملابس وحليب ومميه وهي كانت سمينه حتى گماط ميكفيها ..
ياربي اكو واحد عندها هيج طفله وتذبها . شلون ينطيها گلبها ..
حسن يجي من الدوام يلاعبها وهي الحياله تضحك ومخبلته ..
كبرت ارجوان وصار عمرها اربع اشهر .. وكنا كل يوم ناخذها ويانا للحظانه ونرجعها او مرات تجي عمتي ام حسن .. نخليها يمها ..
حياتنا تغيرت وعشنا بسعاده .. ارجوان صارت كل حياتنا ملت البيت علينا ..
وهي تعرفنا اول متشوفنا تبقى تشمر بأديها .. بديت اطعمها وهي متصدگ تحب تاكل ومدفنشه صايره شعرها كيرلي اشگر مو سرح يخبل وعيونها صفر .. سبحان الخالقها ..
دخلتها البيتنا غيرت حياتنا .. وبعد سنه سوينا الها عيد ميلاد كبير وعزمنا اهله واهلي بعد ماكانوا مقاطعي اجوا بس اخواته واخوانه مااجوا بس مرت الكبير وابنها أنس عمره ست سنوات يحبها الارجوان والوحيد من ولد اخوانه الحسن يلاعبها ويحبها بس امه متقبل وتمنعه .. ع عينها فتح حسن صيدليه وحده وزاد خيره .. وقرر نشتري بيت كبير وبمنطقه حلوه ..
بس البيوت غاليه فبقينا نوفر حتى وي فلوس هذا بيتنا
نشتري بيت اكبر ..
بعد عيد ميلاد ارجوان .. گمت اتخربط واتأزمت حالتي وادوخ واوگع حسن خاف عليه هوايه .. وعباله شي مو زين ..
اتأخرت عليه .. بس عادي لان كانت دايما نتأخر هوايه يله تجي .. فما حسبت حساب انه بعد هذي الفتره احمل .. الى ان راجعت للدكتوره وسوتلي تحليل .. گلتلي ماما انتي حامل صار شهرين اني تخبلت ممصدگه طلعت الحسن ابجي وحاظنته وحاظنه ارجوان وابوس بيها واگولها يوجه الخير مليتي حياتي عليه ..
وحسن يبجي وممصدگ خلينا العياده كولها تبجي ويانا ..
وارجوان هم خافت خطيه وتبجي…
تالي اخذنا حسن ورحنا بشرنا اهلنا وفرحوا .. واخوه الكبير صالحه… وگله شناوي وي هاي البنيه بعدك تريدها ..
گله حسن .. صدوگ تحجي من دخلتها البيتي وصارت بنتي الله رزقني بمال وعيال .. وهسا تريدني اتخلى عنها هم الله ميقبل ويغضب عليه ..
اعتبرها يتيمه وربيتها والله جازاني خير عليها .. هاي بنتي وماافرط بيها ..
اني سكتت لان ادري بحسن يحبها البنتنا وميتركها .. مرت ايام حملي بصعوبه وتعب لان فتره طويله يله حملت كبرت بطني واخذت اجازه فتره لان نايمه ع ظهري واجت ماما تراعيني الى ان وولدت وجبت توأم بمكان الواحد وربي مامتوقعه بحياتي الله يرزقني بطفلين ببطن وحده اثنين ولد .. اخوان وسند الارجوان حبيبتي .. وجه الخير بنتي وحياتي كولها ومستحيل افرقها عن اولادي ..
#بقلمي_شمس
يتبع…
أنت تقرأ
خفايا انثى
Fiksi Umumلانني انثى .. مقدرا لي ان أعيش في مجتمع ذكوري .. ظالما يحكم ع ظاهر المرأة ولايفكر في دواخلها .. ان كانت سيئه ام جيده . حكموا علي ولقبوني باللقيطه من غير ان يكون لي ذنبا بهذا .. فماذنبي ان ولدت من ابا واما لايخافون الله ولم يتحكموا بتصرفاتهم وكنت ان...
