البارت العاشر والاخييير
#خفايا_انثى
#بقلمي_شمس
رجعنا للبيت .. وعمتي ام انس گلبت الغراض كولها والملابس ..
وتحجي .. اي حظوظ امه مايوم جابلها قطعه قماش .. وحظ البايرات هيج..
ارجوان .. عمه فدوتج الغراض كولها .
ام انس .. كافي لج مو تضحكين عليه .. بسوالفج لمي غراضج وولي منا . #شمس
انس غمزلي .. ولميت الغراض وكمت وثاني يوم عقدنا لبست فستان طويل وردان شيفون مشجر كولش حلو لونه بصلي واني شعري اشگر كيرلي ..
وخليت ميك اب وكحله ورموش لان رموشي شگر ميبينن ..
تعجب من شافني طلعت اكبر من عمري .. ماعزم عماتي وهن اصلا مايجن زعلانات ..
بيناتنا سويناهه وخالاته اجن وبناتهم .. حفله عائليه وطلعت ذهب ماما لبسته كوله ..
عبالهم جايبه انس تخبلن خالاته .. ويتهامسن وي ام انس وام انس معبسه طول الحفله..
خلصنا عقدنا ثاني يوم محكمه .. وبدأ بالاجراآت .. وصرت مرت انس وميخلي احد يحجي وياي .. بس اذا راح شلون بيه .. #شمس
اكيد حيطلعون الفرق كوله وينتقمون .. انس مقبل نتزوج گال من تخلص اوراقج نتزوج ونطلع گبل ..
اني بقيت شايله البيت كوله حتى محد يحجي .. وانس يواسي بيه .. واشترالي موبايل گال حتى نحجي ونتراسل.. #شمس
وبيوم الي راد يروح انس الامريكا .. اجو رجال ومريه رادوا يحجون وياي وكنت اني ضايجه لان انس حيروح وراح اعيش بمعاناة بعده ..
گلي انس ارجوان تعالي للاستقبال بس اريدج تكونين هاديه ومتتعصبين ..
استغربت شنو الموضوع .. دخلت للاستقبال لگيت عمو وعمتي ورجال ومريه كولش حلوه تخبل متوسطه بالعمر ..
سلمت وگعدت وهمه عينهم عليه وعيون المريه تدمع ومختنگه ..
گال عمو .. بابا ذولي اهلج الحقيقين .. وجايين يردون يحجون وياج ..
اني لا اراديا شهكت ودموعي تصب وبين اضحك وبين ابجي ..
عمي گال يله احنه نخليكم ع راحتكم .. گام انس وياهم .. گوتله انس ابقى يمي .. #شمس
بدوا يحجون ويبررون واحنه غلطنا وردنا نصحح الغلط واهلج مقبلوا ينطوج ..
وتالي رجعنا كم مره لگيناكم منتقلين وبقينا ندور .. الى ان لگينا بيتكم الي بالكراده ورحنا والجيران گالوا اهلج استشهدوا وانتي عند بيت جدج .. #شمس
والبارحه يله لگينا عنوانهم ..
واجينا ناخذج تعيشين ويانا .. منگدر نعوج هنا وحدج ..
ارجوان .. هههههههه وحدي ومنو گلكم وحدي لزمت ايد انس .. اني يم زوجي وبعد شهر واسافر وياه ..
هسا ذكرتوني وين كنتوا لمن اعاني وحدي واتعذب .. وين كنتوا لمن الناس تصيحلي بنت زنا وتذم بيه ..
ولا تگولولي دورتوا عليه هذا مو مبرر.. من غلطتوا مافكرتوا بيه .. ليش مسقطتيني ليش ولدتيني وخليتي المجتمع يذم بيه ويسموني لقيطه ..
شلون نطاكم گلبكم من خليتوني بكارتونه وذبيتوني بالشارع .. #شمس
الله يحبني وطلعوا ناس طيبين وخافوا عليه وربوني ودللوني وعشت بسعاده بس الموت اخذهم مني .. واني كل يوم ابحي عليهم وافكر بيهم اكثر مماافكر بيكم لان انتوا بالنسبه الي اغراب مااعرفكم .. #شمس
بجت امي وصارت حمره اتباوعلها نفسي من ابجي هم اصير حمره .. واني اشبهها حيل عبالك حبايه ومقسومه حتى انس گلي ..
نورهان .. ماما سامحينا .. الله عاقبنا ومانطانه جهال لسا .. حرمنا من الاطفال .. سامحينا انتي ولاتحرمينا منج ..
ارجوان .. للاسف فات الاوان واني مسافره وي زوجي لو جايني بغير هاي الظروف كان ضعفت ورجعت وياكم لان شفت الظيم والناس تنهش بجسمي ..
بس هسا مستحيل اترك الانسان الي وگف وياي ونقذني ..
وهسا من رخصتكم زوجي وراه سفر ومااريده يتأخر ..
بقوا يتوسلون محجيت وياهم ..
انس .. ارجوان حبي مو هيح عيب ..
ارجوان .. انس ليش ماهمه عرفوا العيب والحرام من حطموا حياتي وولدوني بالحرام ..
عبدالله .. خلص انس اتركها ع راحتها خليها تفكر وهذا عنوانه ورقم موبايلي والارضي ياليت قبل متسافرين تتصلين بينا او تزورينا .
اخذهن انس .. وطلعوا واحس بماما عينها عليه تريد تحظني وخايفه ..
طلعوا وحظنت انس وابجي طلعت قهر السنين كولها .. كانت امنيتي اشوفهم واحجي الي بداخلي ..
هسا ارتاحيت .. بس ماادري ليش ماحسيت شي اتجاههم كأنه غربه بالنسبه الي . #شمس
وودعنا انس وراح .. وبقينا ع تواصل كل يوم يخابر ويتغزل .. وبدت مشاعري تتغير اتجاهه وحبيته كولش واتمنى يرجعلي بسرعه ونسافر ..
لكن المعامله اتأخرت وبقينا كم شهر احنه بعيدين عن بعض ويگلي شوكت تجين يمي راح اموت ..
وعمي غير معاملته وياي وحتى البنات صاروا يحبوني .. بس عمتي ماتغيرت ..
واني هم مالي دخل بيها اخلص شغلي واگعد هو كم شهر ورايحه اني ..
واخيرا خلصت معاملتي واجه انس وتزوجنا وكانت ليله من العمر عيشني بيها ملكه .. تزوجنا بالفندق وكان متلهف حيل ومشتاق واني هم مشتاقه الحظنه عوضني حظن الابو والام ..
للصبح نمت بحظنه ومااريد اتركه وهو يگلي وربي مااطير يمج .. هههههه استحيت ..
ورحت للمقبره زرت اهلي وتنازلت عن حصتي بالبيت الاخواني لان اني اخذت الذهب .. وبعد يومين ودعنا اهلنا وطلعنا .. وگلي اكو مكان نمر بي قبل منروح للمطار .. اخذني الاهلي .. شافوني حظنوني وگاموا يبجون ..
وسافرنا وكانت هذي اخر مره اشوفهم . لان استقرينا بأمريكا وكملت دراسه ودرست لغات .. وصار عندي حمل والتهيت بين الحمل والدراسه بس انس ماتركني وكان اليه السند وكولشي بالدنيا ربي يحفطه الي عوضني عن كولشي واجانه ولد وسميته حسن ع اسم بابا وبعد مافكرنا نسوي لان هناك غربه ولازم نكون نفسنا ودراسه عدنا وحسوني كافي علينا مخبلنا وحاليا رجعنا للعراق واستقرينا هنا الحمد لله وعايشين حياتنا بالحلوه والمره مساندين بعض وربي لايحرمني من زوجي واولادي لان اني حامل وبيه بنوته .. #شمس
وهاي قصتي حبايب ويمكن اني احسن من هواي اطفال اهلهم يذبوهم بالزبل او بالشارع والي يربون بالميتم وينحرفون ..
اني يمكن محظوظه لان عوضني بأنس ..
واتمنى الكل تصير اله عبره ويبطلون نزواتهم وشهواتهم قبل الزواج .. اذا تحبها اتزوجها مو تخطأ وياها وتالي تكون النتيجه اطفال متشردين ويتسمون لقطاء .. او مجهولي النسب ..
فكروا بعقاب الاخره قبل الدنيا .. وخافوا الله . لان هذي الحاله متكرره هوايه وخاصه هسا شرطه بغداد دا تلگي باليوم وبالقليل اربع اطفال بالشوارع ومايتعدا اعمارهم بالايام وحتى بالمحافظات ..
ارحمنا يارب واسترنا .. تحياتي لكم احبتي ❤
#الكاتبه_شمس
أنت تقرأ
خفايا انثى
Fiction généraleلانني انثى .. مقدرا لي ان أعيش في مجتمع ذكوري .. ظالما يحكم ع ظاهر المرأة ولايفكر في دواخلها .. ان كانت سيئه ام جيده . حكموا علي ولقبوني باللقيطه من غير ان يكون لي ذنبا بهذا .. فماذنبي ان ولدت من ابا واما لايخافون الله ولم يتحكموا بتصرفاتهم وكنت ان...
