الفصل التاسع
دخل "طارق" مكتبه يخبط الباب بقدمه ومن خلفه "زياد" القي بمسدسه علي مكتبه وجلس في غضب يكاد يشق جدار المكان
_ يا طارق مش كل مرة تسلم الجرة , بدل العصبية دي
_ كل مره نعمل الخطة ويجي ميعاد التسليم نروح ونهجم ونلاقي مفيش حاجة ويدفع التمن مرشد غلبان كل زنبه أنه حب يعيش نضيف
_ الله يرحمه
_ يرحم مين ولا مين محسن ولا رفعت ولا علي مين
_ ربنا رحمته واسعه بس ده أنت محقق الرقم القياسي في موت المرشدين يخربيتك أدي دقني لو في مرشد تاني قربلك
_تصدق كل مره بتأكدلي أنك دخلت شرطة غلط
_ أنا أخري أصلا شرطة السياحة هناك . ياااااااااهـ كانت أحلي أيام . فاكر ياض أنت طول الليل ع الشاطئ و ....
_ بس متكمليش الله لا يعيدها أيام
_تصدق ياض أنت فقري , بقي مزز شرم ولا التخشيبه والحجز وتاجر المخدارات اللي هتموت وتوصله دهـ
_ الراجل دهـ أكيد أكبر من مجرد تاجر ولا بيكشف مرشد ده عنده أيد خفيه يوم لما نعرفها كلنا هنتصدم
صوت هاتف " طارق" أعلن عن متصل كان هذا المتصل هو "رامز"
_هششش الحكومة ,, ألو رامز باشا اؤمرني يا باشا
_ أنت فين يا أبني ,, تعاليلي ع المكتب بسرعة
_ اقفل أنت بس قبل ما السماعة توصل للمكتب هكون قدامك تعليماتك يا باشا
أغلق الخط ونظر إلي "زياد" الذي كان يقف يبتسم إلي صديقه
_ عندك طلعه ؟
_ ومستعجله كمان ,, الظاهر في مشوار له دعوه بجوازه
_ يارب عقبال ما أبقي زي رامز يا رب
_ تبقي زيه في شغله ؟ يااارب يا زياد وأبقي أنا كمان
_ أهبط بقا أنت كل حاجة شغل ,, أنا أقصد أتجوز
_ مالك مسروع ع الجواز ليه بتحسيسني أنك بنت حوله مستنيه العدل
_ حد طايل بيت العدل دهـ نعمه مش بيحس بيها أمثلنا
_ أمثلنا أزاي يعني ,, مالنا يعني
_ خلينا قاعدين أنا و أنت في وش بعض كده مفيش نوع من أنواع الحنيه , الرومانسيه , الجمال , مفيش ست مفيش أنثي يا جدع نفسي أشوف خلق عدله غير المناظر دي أو حتى أبقي ضامن أني لما أروح من الشغل بعد خلق المجرمين ألقي حاجة زي القمر كده مستنياني في البيت تقولي حمد الله ع السلامه يا حبيبي وحشيتني القي أكل طعمه حلو حاجة كده جميله تدخل حياتي بدل ما كله خشن كده حاجه طريه تظبط الموضوع
ضحك طارق حتى ظهرت نواجذه ودمعت عيونه ختمها بكحه جعلته يقدر ع الحديث
_ لا مش قاادر بجد , ياعيني يا زياد أنت ليه فاكر الجواز بمبي كده . يا زيزو الجواز ما هو ألا شهر واحد بس وتبدأ المشاكل تظهر والست الجميلة دي هتخش البيت يا قلبي تلاقيها واقفة ليك في وشك كده ولابسه ليك أجمل عباية بيتي و يا سلام علي ريحه البصل و التوم بقا وبدل يا حبيبي تقولك جبت الغدا معاك يا أبو العيال وبمناسبة العيال ألحق المدام حامل ألحق المدام ولدت مصاريف مستشفي ألحق المدام جابت بنت وولد يتربوا في عزك ألحق العيال دخلوا المدرسة عاوزين مدرسين درس خصوصي والثانوية العامة بقا وأنت وقوه أعصابك يا سكر يا ضغط , ألحق البنت كبرت ألحق جالها عريس ألحق فلوس الجهاز , الواد عاوز يخطب الواد عايز شقه , ولما تموت تاخد معاشك والست يا صاحبي العزيز عندها سيطرة غريبة الشكل علي مراكز الذاكرة , أوعي تتخض لما تقولك عمري ما شوفت معاك يوم عدل , عمرك ما جبت لي حاجة , وهكذااا بقا
