في يوم بعد ما السنة بدات ليها زي شهر كدة فاطمة كانت في حصة العربي مع سنة اولى استاذة ليلى المديرة طلبت فاطمة تجيها في مكتبها، لما فاطمة مشت ليها قالت ليها انه في ولد في صف ثاني نقلوه ليهم من مدرسة تانية، الولد امه متوفية وابوه قريب استاذة ليلى، عنده مشكلة في العربي لانه كانوا عايشين برة السودان، ابوه سفير وكانوا في السفارة السودان في ايطاليا، رجعوا السودان ليهم سنة ودخلوا الولد في مدرسة لكن نتيجته ما عجبت اهله وخاصة في مادة العربي، استاذة ليلى اقترحت عليهم يجيبوه مدرستها الشغالة فيها دي و حسع ليه شهر في صف تاني لكن لسة ما متحسن في العربي، واستاذة ليلى طلبت من فاطمة انها تديه دروس اضافية في العربي، فاطمة قالت ليها (طيب ما احسن استاذة نعمات هي تديه الدرس الاضافي، لانها اصلا استاذة صف ثاني..يمكن ما ترضى لو انا اخذت تلميذها) استاذة ليلى قالت ليها ( بالعكس، استاذة نعمات هي الاقترحت انك تديه الدروس الاضافية، قالت انتي بقى عندك خبرة وطريقتك كويسة مع المبتدئين.. وانا قلت اكلمك واخد موافقتك قبل ما اكلم اهله)..فاطمة قالت ليها ( اذا كانت استاذة نعمات ما عندها مشكلة انا ما عندي مانع ..ولو عايزين ممكن ابدأ معاه طوالي) استاذة ليلى سكتت شوية كدة كانها مترددة بعدين رفعت راسها وقالت (لكن في حاجة لازم تعرفيها..الحصص ح تكون في بيت الولد ما عندكم في البيت.....) طوالي فاطمة قاطعت استاذة ليلى ( يا استاذة ليلى انتي عارفة رأي اني ادي حصص في بيوت الطلاب و عارفاني كم مرة رفضت امشي...) استاذة ليلى كانت متعودة على صراحة فاطمة قامت رفعت يدها وقالت ليها ( اسمعيني للاخر... اولا هم عندهم سبب الولد حصل ليه حادث حركة ، هو نفس الحادث الاتوفت فيه امه، و حصل ليه كسور في رجله و عملوا ليه عمليات كتيرة وحسع لسة رجله ما رجعت طبيعية تمام و بيمشي بعصاية، والدكاترة قالوا ما يتعب كتير عشان كدة ابوه ما عايز يكتر عليه المشاوير بعد مشية المدرسة، تانيا هم النزموا انهم يرحلوا الاستاذة الحتجيهم من باب بيتها لباب بيتهم بالعربية يعني ما ح يكون في جهجهة بالنسبة ليك ..تالتا هم قالوا الدروس فترة مؤقتة بس لغاية امتحان الفترة يعني كلها 3 او 4 شهور ما كتيرة) فاطمة قعدت تستوعب في الكلام دة وتفكر و استاذة ليلى تعاين ليها و قالت ( وطبعا ما ح يقصروا من الناحية المادية...) فاطمة قالت (الناحية المادية ما مشكلة...) وفكرت في تلاميذها القاعدة تدرسهم مجانا في البيت، استاذة ليلى قالت ليها ( اهله ناس محترمين ولو ما بعرفهم شديد اصلا ما كنت قلت ليك تمشي ليهم... البيت ما بعيد في المنشية و فيه بس الولد وابوه و حبوبته ام ابوه... حبوبته علوية دي ياها قريبتي، هي ذاتها كانت زمان استاذة لكن كان تخصصها تاريخ و نزلت المعاش طولت ....) استاذة ليلى تقول في الكلام دة وتعاين لفاطمة، عارفاها رغم لسانها المتبري منها قلبها طيب، وفاطمة ساكتة و استاذة ليلى لما شافتها ساكتة كدة عرفتها قربت تقتنع، قامت اتنهدت و قالت براحة وهي تعاين ليها بقعر عينها( يحليله الولد يتيم.....) طوالي فاطمة قالت (خلاص كويس مبدئيا ...لكن لما اكلم امي و ارتب احوالي في البيت ) طوالي استاذة ليلى قالت ليها ( شكرا ليك يا فاطمة...عارفاك ما بتخذليني انشاء الله) واتفقوا بكرة يقعدوا يشوفوا الترتيبات.
فاطمة مكتبها كان مع مكتب صاحبتها لبنى قريبة اصحاب المدرسة. فاطمة كلمتها بالدرس الاضافي المعروض عليها ولبنى شجعتها شديد قالت ليها ( اصلا كل الناس بقوا معتمدين على الحصص الاضافية) وقعدت تضحك قالت ليها ( امشي عشان تمهدي لينا نحن الطريق كمان معاك).
المغرب في البيت تهاني كل يوم بتجيهم سليمان راجها شغال في صيدلية بالليل بجيبها ليهم هي وولدها ويجي غاشيها بعد ينتهي، فاطمة انتظرت لما تهاني جاتي وفتحت موضوع الحصة الخاصة لامها وصديق وتهاني عشان تشوف رأيهم صديق قال ليها ( القرار الاخير قرارك ... لكن انا ما دايرك تضغطي على نفسك عشان تجيبي دخل زيادة ، الحمد لله الاحوال كويسة و كفاية شغلك بالنهار في المدرسة) فاطمة حكت ليه بظروف الطفل و انها راغبة تساعده اكتر من رغبتها في الدخل الاضافي. امها قالت ليها ( مادام من طرف استاذة ليلى واهلها مافي مشكلة ... وناس معروفين ما مشكلة). صديق قال ليها(... لكن لازم يلتزموا بحكاية الترحيل دي ... انا ما خايف على فاطمة عارفها انسانة مسئولة وبتقدر تحافظ على نفسها .. لكن ما عايزها تتجهجه وتركب براها بالليل) المهم التلاتة قالوا ليها البتشوفيه اعمليه ونحن معاك و قالوا ليها جربي و لو الحكاية ما ظبتت ممكن تخليها. كلام اهلها دة شجعها و بدات تفكر في الترتيبات. بالعصر قاعدين يجوها بنتين وولد من ناس الحلة تدرسهم بتقعد معاهم ساعة قبل المغرب، تحاول بعد كدة تعيد ترتيب مواعيدها بعد الحصة الجديدة دي.
بالليل في العشاء مع امها وصديق وايمان وعمر الونسة و الكلام كله في الدرس الخصوصي الجديد دة عمر همه عربيتهم ماركتها شنو و ايمان قالت ليها (بختك تاني المنشية كل يوم) فاطمة قالت ليها ( المنشية ماشة اسكن فيها؟ ما شغل وبجي راجعة..) امها قالت ليها ( ما بعيد على ربنا يسكنك المنشية و احسن منها..قادر وكريم....).
الصباح فاطمة غشت استاذة ليلى في مكتبها وقالت ليها خلاص موافقة، استاذة ليلى اتبسطت شديد و قالت ليها خلاص ح اتصل على اهله عشان نشوف الترتيبات.
يتبع.....
