على اخر اليوم استاذة ليلى رسلت لفاطمة تجيها في مكتبها لما مشت ليها لقت معاها ضيفة، كبيرة في عمرها اكبر من استاذة ليلى تكون في السبعينات كدة، لكن راقية ولا بسة نظارة نظر، و لابسة توب راقي والوانه هادئة. استاذة ليلى عرفتها بيها ( دي قريبتي حاجة علوية حبوبة سامي الولد الكلمتك عنه) سلمت على فاطة بابتسامة عريضة سلام كويس، استاذة ليلى ضحكت وقالت ليها( حاجة دي بنقولها ليها ما عشان كبيرة في العمر..لكن عشان حجت بيت الله كتير. ما شاء الله..) فاطمة قالت ليها( ربنا يتقبل ان شاء الله) .. استاذة ليلى قالت ليها( اقعدي يا فاطمة عشان تتعرفوا و تتفاهموا) ...
حاجة علوية قالت ليها( كان مفروض يكون معانا ولدي عماد ابو سامي لكن للاسف جاته سفرية سريعة كدة و قال لي امشي انتي عشان نكسب الزمن لسامي.. طبعا زي ما قالت ليك استاذة ليلى سامي امه اتوفت ليها زي سنتين تقريبا ...عماد كان في السفارة في ايطاليا وهناك حصل ليها حادث حركة وكان معاها سامي .هي اتوفت طوالي ربنا يرحمها و سامي حصلت ليه كسور في رجله ...عمل عمليات كتيرة وحسع ماشي متحسن الحمدلله... ورجعوا السودان ليهم سنة تقريبا وهناك طبعا القراية كلها انجليزي بعد جاء هنا دخلناه مدرسة عالمية،.. طبعا فيها عربي لكن ماطلع منها بشئ..) ...
حاجة علوية سكتت شوية ودنقرت وقالت (سامي دة امه الله يرحمها كانت بتخاف عليه شديد ... بعد اتزوجت قعدت 6 سنوات حتى ولدته و بعده تاني ما ولدت...عشان كدة مع انه كانت في مدرسة عاملنها المسلمين والعرب في يوم السبت الاجازة في ايطاليا لكن امه ما كانت بتخليه يمشي...ابوه قال اصلا باقي سنتين ونرجع السودان وان شاء الله ح يتعلم العربي ...ما قايلين الحكاية صعبة كدة.. حسع حتى كلامه العربي مكسر)
فاطمة استغربت و قالت ليها ( ما عنده اصحاب بيتكلم معاهم ..كدة ممكن يتصلح العربي بتاعه) حاجة علوية قالت ( والله من جاء من روما ودخل المدرسة الفاتت ما شايفة ليه اصحاب ... في البيت ياداب بقى يندمج مع اولاد عمته اولاد بنتي لما يجونا..ابوه قال خلوه على راحته شوية شوية) اتنهدت كدة وقالت ( والله يا بنتي المأساة المر بيها سامي ما ساهلة اصلو...)
فاطمة مخها بقى يودي ويجيب (يا ربي بقدر عليه الولد دة ؟) زمان درسوهم شوية علم نفس في الجامعة ، قالت ان شاء الله يساعدها ، لانها بقت عندها رغبة وحماس انها تدرس سامي بعد عرفت ظروفه، قالت لي حاجة علوية ( انا غايتوح ابذل اقصى جهدي معاه ان شاء الله و ربنا يقدرني افيده ...)
حاجة علوية قالت ليها( والله استاذة ليلى شكرتك لي كتير وورتني المجهود العملتيه في المدرسة وانا انشاء الله متفائلة انك ح تنجحي مع سامي...)
قعدوا بعدداك ناقشوا الترتيبات و المواعيد و المرتب، واتفقوا يبدوا بداية الاسبوع الجاي تجيهم فاطمة 3 مرات في الاسبوع ساعة قبل المغرب. .
