أحبها فياليتني احصل على حبها

١٤

شهم..
بقيت اني وحلا نتواصل حبيت اعرف شنوو تحب شنو تكره صرت اشاركها بكلشي
ومرتاح كلش هذا الشي يكفيني
من اروحلهم جانت تجي تگعد يمنه صح منبقه وحدنه اني چنت اخجل من عمي وحمزه احب اگعد وياهم ماردت احرجها ولا انحرج
وهيه عدها سادس هم مااحب اشغلها او اشتت فكرها واضغط عليها اني وعدتها مراح اضايقها ردتها تحس بحبي وتحبني بأحساس مو لأن واجب تحبني
وياهم اضمن نفسي مااضغط عليها بس من انفرد وياها مااعرف ابقه نفس تفكيري لو الي بداخلي يتغلب عليه واحتمال اضايقها بكلمه او تصرف وتعتبرني مو گد حچايتي
جنت اجاهد وياها اجاهد نفسي الي تحاول تاخذتي وياها الغير عالم صح عاقدين احنه وكلشي حلال بس حبيت اجرب احساسي وي حلا كأنوو متعرفين بفد مكان وحبتني مو حب بالأكراه لأن ابن عمها ومتصير الغيري ردتها تحس بيه
اصعب شي چان يمر عليه لما اشوف نفسي خلاص راح انهار ومااريد اطبق الوعود الي اخذتها على نفسي وعدتها مااضغط عليها للزواج واخليها هيه تحبني
مرات افكر يجوز متحبني الحب الي رايده ليش مااخليها تعيش وياي دور الحبيبه واصدگها
بس هالشي محلوو بحقي اني مااريد منها تمثيل كل الأريده تتقبلني من قلبها تحس نفسها متعيش بدوني مثل مااني اشوفها هيه عمري وحياتي والماضي والمستقبل
بهاي الفتره بدت عطلة المراجعه الهم
وبدت تحضر للأمتحان
جنت اتواصل وياها شي قليل كلش
بس اسألها عن احوالها وصحتها وتحضيرها للامتحان واقطع الأتصال
بكل دقيقه الي تمر عليه شوقي الها يزيد
حمزه الأطباء قرروو يسووله عمليه
واغلب الأطباء نصحوه يسويها خارج العراق
بيوم رحت اشوفه اني والولد هشام ورضا اخر فتره نروحله كلنه نلعب دومنه او شطرنج
نتونس ونونسه ويانه ونرجع
شفناه محتار ويتصفن
هشام گله شبيك اليوم ليش هيچ احسك مو طبيعي
..مااعرف محتار الطبيب نصحني اسوي العمليه خارج العراق
..وليش محتار ميرادلها حيره وين متكون نتائجها افضل سويها
..مااعرف هشام بس منو الي ابوي يتحمل مستشفيات ومراجعات ميتحمل كل هذا وريحانه هم مااگدر اتركها بهالوضع اخاف اتأخر اني اعرف شنو النتائج ارجع لا والله محتار والتفكير تعبني
شهم..گول ياالله حمزه انت طلعت من الأخطر منها واكيد نشوف منو افضل دوله بهيج اختصاص تروح تسويها واني مستعد اسافر وياك
..وين تسافر ودوامك
..دوامي عقد شركه واصلا بعد شهرين ينتهي العقد ولازم اجدد افسخ العقد واشرحلهم الأسباب واكيد راح يتفهموني
حمزه ..بقيت صافن عليه والولد ماحچوو شي اعرف الي يسوي علمودي ويمكن يتحجج العقد يطول بس همه ماگدر يحاجو خجلوو مني اوو مأيدي مااعرف بس اكوو بوجوهم نضرة استغراب
شهم..أي شبيكم صافنين عليه من ارجع الله كريم احصل وضيفه بشهادتي هواي شركات تطلب عقود هذا الموضوع انتهينه منه لتفكر بي بعد
بعدنه نحچي واجه عمي لمينه الدومنه احتراما اله وبعدناها عنه
متعودين احنه اذا واحد من عمامي او والدي يجي يمنه يگعد ع الگاع كلنه نعوف الكراسي وننزل نگعد بمستواه
اني واخوتي نزلنه وگعدنه يمه
عمي طبيعته حلوه يحبنه ولد اخوو عبالك ولده ودائما يحب يحجي ويشاقه ويانه نرتاح وياه من احنه صغار
بس هالمره جان شكله ممرتاح وصفنه تاخذه وصفنه تودي عرفته على موضوع حمزه
گتله عمي حمزه حچالي عن سفرته وقررت اسافر وياه
..لا عمي مستقبلك ودوامك اني اروح بس بالي يم البنات وامهن لو تتزوج حلا حته تجي يمهم وانت تداريهم
..عمي تعرف حلا جايتها امتحانات ومااريد اشغلها بهالفتره مثل مگتلك اني اسافر والدوام عقد وراح يخلص ماراح اجدد وي الشركه وخلص
..عمي صعبه عليك
..ماكو صعوبه خليني اغيير جوو بحجة هالبطل بعدين طول عمرك تعاملنه ولدك وتعرف حمزه شنو بالنسبه الي اذا الأخ ميشيل اخوو ويوگفله بهالمواقف شنو قيمة الخوه خلص اني جواز عندي تبقه عليكم وين الطبيب ينصحكم ونحجز ونسافر
انت وجودك غير يم بناتك عمي ربي يديمك خيمه الهن اني ماعندي شي شتگول حمزه لو مرايدني وياك احچي
..اكيد اريدك وهسه ارتاحيت من دريت انت وياي يبقه عندي هم واحد ريحانه وخاصتا هيه تعبانه هالفتره واخاف عليها مااعرف مااحس نفسي ارتاح وهيه بعيده عني بهالوضع ولو اني والماكو سوه هم مافيدها بالحالتين
الأب..انت الخير والبركه بويه لتفكر ريحانه بنيتي شنو فرقها عن خواتك واخوتها واهلها موجودين تريد توديها يم امها حته ترتاح اكثر بكيفكم
شهم..هذي الأمور لتفكر بيها شكوو عليها ريحانه ترجعلها على طولك ان شاءالله
طلعنه منه وقبل لااطلع ردت اشوف حلا صاحتها عمتي وطلعتلها بالكليدور لاگتني اخذتها وطلعت للحديقه
..شلونچ حبيبتي
..الحمدلله مشتاقتلك
..مو گد اشتياقي بس تعرفين علمود الأمتحانات مجاي اتواصل وياج اكثر علمودج والله بداخلي اتعذب على هالصوت الحلوو
..ابتسمت ودنگت
..حلا راح اسافر وي حمزه اريدچ توعديني تحاولين تبذلين جهدچ بالدراسه والوعد الي بينه مننساه اني ابقا على تواصل وياچ وقبل لااسافر هم راح اشوفچ اكيد
سلمت عليها بستها براسها وگتلها دخلي شويه وگلت للولد يلله نروح
حمزه..لك شهم وين جنت
..غمزتله يم اختك
..ههههههههه
..يلله شباب نروح سلمنه وطلعنه بالطريق الولد گلولي متأكد من قرارك
كتلهم اكيد عدكم غير حل لو نخلي عمي يروح مو حمل هالبهذله اروح اني احسن
گالو بلغ ابوي وامي اخاف ياخذون على خاطرهم
..ليش ياخذون على خاطرهم قابل شمسوي اني اكيد ابلغهم بس المفروض يفرحون
وصلت للبيت وحاچيت امي وابوي
ابوي سكت وحسيته يفكر بس امي گالت
..يمه ودوامك وعرسك ماعدهم احد ليش ميسوله هنا
..الدوام عقد يمه من اجي اجدد والعرس مو هسه منا لمن حلا تخلص امتحانات
..ولو خلصت قابل تداوم
..طبعا تداوم شكو مكمله اذا مداومت
..والله خوش حركت شفتها معاجبها حاولت اغير الموضوع يمه مو موضوعنه هذا اقصد العرس بعده وهذا هوو راح اسافر وانتهه الموضوع
..شكو جاي تحچيلنه اذا ناهي
..علويه حبيبه ابوس راسچ انتي ام الحنيه شكوو گالبه عليه قراري مو صحيح يعني ابن عمي وين يروح اذا الله مقاسمله اخ احنه حسبة اخوته مو هيج علمتونه لو لا
..يمه براحتك اخو حلا بعد هوه اني شايفتك صار شگد تصبح وتمسي يمهم اگول لو تاخذ يمهم گعيدي احسن
..ضحكت خوش فكره والله رايحه من بالي الحجيه غيرانه عليه لو زعلانه شنو الفلم
..لاهاي ولا هاي بعد كبرتوو مالنه حكم عليكم
..يمه مو قصة كبرنه بس مجبور اني هسه مو المفروض تدعيله ربي يشافي ع الأقل الخاطر ريحانه
..لايمه صبح ومسه اندعيله الشبابه مو الريحانه بس انت اشوفك مشلوع گلبك عليهم بدون نتيجه
من حچت هيچي حچه والدي ونبرة صوته چانت حاده
..علويه كافي لغوه الولد سوه الصح وعلى هذا اني ربيته وانتي علمتي ليش تلومي هسه
..طبعا هيچ تحچي الدم يتحرك
..من شوكت گايمه ترادديني ام هشام انتبهي التصرفاتچ راجعه بعقل الجهل من جننتي وخطبنه حلا وصارت قطيعة اخوتچ وانتي گالبه ومعاجبج العجب شنو التردي بالظبط
صار شگد مشايفهم هيچ مختلفين دائما امي مطيعه اله گتله يابه هدي اعصابك امي حقها زعلانه عليه مجاي تشوفني هواي مو قصدها
..لاقصدها اني سكتت ارد اشوف نهايتها شنوو صار شگد تلح وصابر عليها وتحچي واشوفها تشد وي مرة اخوك وهيه ساكته وتعبر كل الحچي مو غشيم اني بس اريد اشوف نهاية هالشي شنوو
..يابه خلص فدوه اروحلك متسوه الطلابه بهالليل اني الغلطان سامحوني اثنينكم
..لك انت شنوو طفل يمك وترضيني ابوك اني وجاي احچي الي اشوفه خلي امك تفهم احبها واحترمها بس لتتماده وخل ترجع ذيچ هيه الحنينه ام گلب الچبير الي تستوعب الكل شجاها من تالي استخفت
عافنه وطلع
بقيت مصدوم امي شحاجيه يم ابوي وضام كل هذا بگلبه
گالت ها ارتاحيت صيح اخوك گله هم خل يرتاح وخل يسولف النسابتكم وافرحوو كلكم
صفيت هيج لاالرجال الداريته ولا الولد الربيته
..يمه شني سالفتچ شكو بينكم انتي وابوي
..البينه نسابتك وانت ولك بهذلتك شلت حالك تركض وراها مثل المخبل شجاك خايب هاي بناتنه ماحبيت الا حلا
..يمه شجاب حلا متگليلي الموضوع مو يمها ليش گوه تربطي بيها
..مو يمها الموضوع يم اخوها لو مااخوها تروح وياه وتعوف وضيفتك
..والله حته لو مو اخوها اروح شلچ بهالسالفه يمه ليش تغثيني وتغثين نفسچ تالي الليل شبيها حلا غير اعرف شبيها وهيچ كارهتها
..بيها اخ يالبيها خليني مچبوبه وانت ماوصيك صير محبس بأيدها
..يمه تره تعبت وتعبتوني عوفيني رحمه الأهلچ
..عايفتك ومالي علاقه بيك وچني لاجبت ولاربيت
..صحت يمه كافي والله دمرتوني هذا هوو لاجبتي ولاربيتي وعساني لاعشت والله ياخذني ويريحني ويريحكم اني وين وانتوو وين
..انت غرگان وماتدري بالجواك شنهوو اخ يانار گلبي خليني ساكته لو حچيت كلشي يخرب
..لاتحچين كفيتي ووفيتي طلعت واني روحي طالعه اني شبيها وشتقصد
كل هذا جي اروح وي حمزه ولو رحت ليش هالعصبيه

يتبع
تصبحون على ماتتمنون حبايبي