أحبها فياليتني احصل على حبها

٢٣

..شهم
..حلا روحي نامي
صحت بصوت تركيني الخاطر الله تركيني شنو تردين مني بعد شنو العندي ومدمرتي تركيني بقهري وروحي لتخافين مااخلي احد يحس بشي بس بهذي الفتره مااريد اشوفچ خليني محافض على اعصابي
راحت ودموعها بعينها رغم كلشي دموعها تحرگني
كل هذا وضعفي يمها يدمرني اكرها اكثر لأن احس بنفسي مالي قيمه يمها وحته اني ممقدر نفسي قابل انتضر منها تقدرني اني الخلل بيه المفروض اتركها من الأول من العقد والكلام الي گالته تراهنت وياها وخسرت الرهان
بعد الي صار ردت اكسر شريحة الأتصال واخلص
بعدها فكرت لا لازم اعرف منوو عندي صديق الي من ايام الكليه موضف بشركة الأتصالات طلبت منه يتأكدلي من الرقم بأسم منوو
بالبدايه گلي الا تقدم دعوه رسميه وقرار من المحكمه يطلع يلله نگدر نكشف هوية صاحب الرقم
گتله اني مااريد اقدم دعوه اريدها بمعرفتك
..شهم عليها مسؤليه اخاف تهدده او شي وراح يقدم دعوه
..مااسوي شي بس اريد اعرف الرقم بأسم منوو
..انتضرني شكم يوم اردلك خبر
..راح اعتمد عليك
..تدلل بالخدمه
..خادم ربك حبيبي تسلم
بعدها خلصت ايامي النهار كله اطلع ولليل كلش يلله ارجع وحته اهلي قليل امرهم اخاف يشكون بشي
چنت اخلص الوقت يم جماعتي لو بمكان معزول
ارجع اخر الليل احس بكل حركه تسويها كمت اشتاق الأيام الخطوبه چانت بعيده عني بس قريبه الي هسه لابالعكس

حلا ..
بهذي الأيام تغيرت حيل وحته اكل مالي واهس اكل غلقت اجهزتي واهلي لأن بيت وحدي وبعدنه عرسان يستحون يجون
اخلص النهار وحدي ويجي الليل تزيد الوحشه عليه مجرد ميدخل واحس بخطواته داخل البيت احس بالأمان عطره الي يسبقه يحرك الحنين الي بداخلي حنيت الكلشي بي الحضنه الهمسه الكلمات الغزل منه
توجهت الربي يكشفلي منو وره الي صار ويخلي حبي بقلبه ويتمسك بيه
مرت عشر ايام وبده يداوم
فرحتله لأن ينشغل شويه وبلكي يرتاح نفسيا
بس چان نفسه
احضر الأكل والملابس اله وهوه مينطق ولاحرف وياي

بديت اتعمد اطلع بوجوده اتحجج بأي شي
ويبقه هوه يتجاهلني

شهم..
چنت اراقب كل خطوه تخطيها اتمنى انسى كلشي وارجع اعيش حياتي مرات بداخلي افكر البنات كتلة مشاعر منو الي يغذيهن بالحب والأهتمام يجذبهن وهيه ممقشمرتني مچانت واعدتني بشي ليش مااكمل حياتي وياها واني اعرف هيه تحبني هسه ليش مااترك كلشي واخذها بحضني ونبدي اني وياها من جديد
بعدها ارجع اگول لا هيه مترهم بعد شلون اخليها بحضني وهيه احتمال تمنى تكون بحضن غيري

اخ ياحلا بعدچ سبب كل الأختلافات الي بداخلي اريدچ ومااريدچ اشتاق احضنچ وانسى كلشي واخاف يتوهملج حضن غيري صعب كلش صعب نكمل سوه
بقينه فتره طويله على نفس الحال وماكو خبر من الولد
فد يوم اني بالدوام وباقيلي ساعه وارجع
اتصل بيه صديقي
..الوو
..هلا شهوم
..هلا بيك حبيبي
..عرفت بأسم منوو مسجلي
..احس گلبي يريد يطلع من مكانه واريده بس ينطق گاله منوو
..بأسم أيات علي حسن البنيه من نفس المنطقه مالتكم
..احس مي بارد نزل على راسي وجسمي متأكد
..متأكد
..رحم الله والديك اني ممنون منك
..تدلل بس مثل ماوصيت مااريد تصيرلي مشكله بسببها
..ريح بالك
غلقت الفون واريد الساعه تخلص
ومية فكره ابالي وليش هالبنت تريد توگع بينه وليش توهمني هيه ولد معقوله تكره حلا زين مو تگول مثل اختي
المهم ماكو صور وتهديد ومن هالكلام
الحمدلله الف الحمدلله
جريت نفس ابتسمت فرحان ورجعت افكر بس هذا الشي ميمنع انو هيه عدها علاقه قبلي
رحت للبيت
خفيت الفرحه الي اني بيها وصحتها اول مره انطق اسمها من الحادث الهسه
..حلا
..احس گلبي راد يوگف يمه صاحني اي صاحني شنو يريد معقوله لهنا وخلص كلشي معقوله يريد الم اغراضي رحتله واطرافي ترجف
..ها شهم گلتها بصوت ناصي
..تعالي اريدج احاچيچ
..زاد خوفي والدمعه وگفت بطارف العين جاوبته احچي
..گعدي لو مستعجله متردين تشوفيني
..انت متريد اشوفك
..وانتي هيچ بكيفي تمشين ع العموم عرفت منو صاحب الرقم الي يدز الرسائل
..اطرافي نرجف والخوف سيطر عليه وحته شفتي ترجف اريد الزمها مااسيطر كلشي بيه خايف كتله منوو
..شفت خوفها ورجفتها تمنيت احضنها وانهي كلشي تجاهلت شعوري وجاوبتها
ايات علي حسن
منو هذي مو صديقتچ لو اني غلطان
..معقوله ايات لا جذب ايات متسويها
..وليش اجذب عليچ هذا الي عرفته
..ليش شنو مسويتلها اني ليش گمت اضرب وجهي وابچي چنت كاتمه كل الم داخلي بس بوقتها فقدت وجهي گمت مااحس بي وشعري ملخته
..حلا كافي ليش هيچ تسوين بنفسچ كافي
..مو كافي دمرت حياتي الله ليوفقها ليش چنت فرحانه واحچيلها عن حبي الك احچيلها عن كلامك وحبك والغزل وشلون متفهمني ليش هيچ تسوي بيه ليش
فقدت حسيت حضن دافي وانفاس حاره على رگبتي
چنت گعده بالگاع احس الدنيا تفتر بيه بقيت بحضنه احچي واعتب على ليات اخر شي رجعت علي طلعت كل الي بگلبي
..محد بيكم يحبني طلعت اني الغبيه وطول ذيچ الفتره اعاتب نفسي ومتندمه لأن محاسه بيك تالي اني منو الي حس بيه اول شخص انت الي ع اساس تحبني وتموت عليه صدگت بكلام مو موثوق اعترفتلك بكلشي وانت ماصدگت خيالك اخذك لبعيد وشكيت بيه امثل عليك ومااحبك
..اششش كافي مو هيچ ملختي نفسچ اهدي واحچي كلشي بگلبچ
..شحچي يعني شگول ليش شهم ليش ابالك تفكر اني وياك احچي وعندي علاقه هيچ مو واثق من تربيتي
..لتخربطين بالكلام ولتلوميني تعرفين شنو الي بيه تعرفين بالنار الي بصدري حبيتچ بكل معنى للحب وعبرت مرحلة الحب والعشق همت بيچ همت بكل جزء منچ تالي بأيام العرس تگليلي شخص رايدني ويعرف بيه چنت مااريدك تعرفين شنو معنى كلامچ لو لا
..گمت اشهك واجاوب اعرف بس انت مافهمتني هذا قبل لاتخطبني وكلشي انتها بينه وحته صديقتي ابتعدت عنها والولد اصلا خطب قبلك وكل بنيه تنخطب وينعجبون بيها اشخلص مو بس اني يعني مسويت جريمه
..مااتحمل مااتحمل شخص يشاركني بيچ لو ياخذ لحضه وحده من وقتچ وتفكرين بي
حلا تعرفين اني هسه يلله حييت چنت بگد ماضايج منچ خايف عليچ ومحتار شأسوي وشلون اتصرف اذا طلع الحچي صح
ولچ من گلي اسمها عبالك مي بارد انصب عليه
صديقتچ هذي شنوو مصلحتها وليش هيچ تكرهچ
..مااعرف ماحسيت تكرهني بيوم مااعرف
..كافي اششش لزمت وجهه مسحت دموعها قبلتها براسها ونزلت على خدها وشفايفها قبلت وجهه كله چنت بدون وعي اتصرف
كافي حبيبتي
خلي الي راح يولي وتركي كلشي وراچ
اني هم والگلته الچ ذاك اليوم كله انسي
حلا تعرفيني مااگدر بدونچ تعرفين انتي نقطة ضعفي ليش تعذبيني بدموعچ
..شهم بعدك ناوي اطلگني اذا بعدك تركني اروح مااريد تعيشني بأمل
حضنتها وهمست قريب الأذنها
..أنتي شنوو تردين
..اني اريدك بس اريد شهم الي اعرفه الي يحبني ويخاف عليه اريدك متصدگ كلشي ينگال والموضوع تره الي صار مو اول مره بالبدايه حاولو وي عمتي ورادو يخربون الخطوبه ومن حچيت وياها واعترفتلها بكلشي وانت مسافر راحت وافتهمت كلشي وجابتلي رايه بيضه محنايه تدل على بياض وجهي ورفعة راسي واصلا مجان احد غيرنه اني وهيه وريحانه نعرف بس سوت هالشي حته تعزز ثقتي بنفسي وتبينلي نيتها شنو وياي كل هذا مر عليه وانت ماتدري بي مو بس انت تحبني اني هم احبك وحبي يختلف صح مااعرف اعبر بس افعااي تبينلك حبي مردتك تعرف حته لتنقهر ولتضوج وانت بغربه وچنت متأكده من احچيلك كلشي تصدگني
..تفاجأت من كلامها رفعت راسها بأيدي وعيني صارت بعينها چنت احس كل عذابها دموعها تحركني
..حلا هاي شوكت وليش مااعرف
..ماحبيت اضوجك
..لو گايلتلي مو احسن چان عرفت الي يسويها وعشنه ايامنه براحه
..ماكو فرق چنت عبالي تصدگ بس طلعت غلطانه
..حلا لتلوميني كلشي صار يخليني اصدگ او اشك بالموضوع المفروض تصارحيني
..هذا هوو صار الي صار وهسه عن اذنك
..وين
..اروح انام
..مو قبل منحل كلشي
..شنو نحل وشنو بيدي اني
..كلشي بيدچ القرار الچ وهالمره قرارچ هوه الي يمشي

يتبع ..

طبعا كتبته بصعوبه لأن بالي مشوش احتمال اضيفله تعديلات باچر او اكمل ماباقي هواي ع النهايه يجوز باچر اختمها الرأي الكم اذا بي نقص اعدله واذا احداثه عجبتكم اكمل الأحداث