أحبها فياليتني احصل على حبها

٢٠

طلعت وصار بوجهي حمزه وعمي وسام
شصار بيه احس رجليه انشلت اني اليوم مكتوبتلي الصدمه مارفعت عيني عليهم بقت عيوني بالگاع ومركزه على رجليهم
سلموو على شهم وگلهم اتفضلوو وخلو ام البيت تضيفكم
حمزه ..منورين العراريس لك انت غير ناقص هاي وين جايبها وانتي ست حلا شلونچ عيني نگول  مبروك

حلا..بقيت منصيه راسي واحس الدنيا تدور بيه خوف وخجل وارتباكي مو طبيعي بهاللحضات
قطع كلامه شهم
..لك حمزه بلا هالسوالف هذي مريتي اريدها صاحيه ليصير بيها سكر.. كلش زين تدري وگتلك راح اخذها للبيت تشوفه .لتسوي نفسك ذكي وكامشنه ولازم علينه لزمه عوفها يمعوود هيه هيچ وكل شويه دايخه
..هههههههه ام السان شو انبلع السانچ شبيج متگليلي انتهيتي على شنوو غير رجلج وطالعه وياه
..من الخوف والرهبه الي اني بيها بقت الدمعه بطارف عيني ومن عرفته يدري بيه گوه سيطرت على نفسي ومنزلت دموعي
وسام ..مبروك يابه ان شاءالله يتعمر بوجودكم وينترس جهال منكم حلاوه شلونچ ولج وين بوستي
شهم ..فوت جوه واخذ بوستك عمي تدلل
وسام ..ههههههههه لك بديت تغار مني غير انتو اعتبركم اخوتي مو ولد اخوتي اني وياكم نفس العمر لتكبروني بعدني بداية ال٣٠
..سلمت عليه وباسني وكل هذا واحنه بالباب شويه وگالوو يلله خل نطلع سوه
عمي وسام بسيارته هوه وحمزه
واني وي شهم وهم گعدت يمه بس بعد الرجفه بيه
شهم..لچ ولاعبالي هيچ انتي جبانه علويه مااريد هالخوف صيري سباعيه شبيچ گمتي ترجفين
..يوو شهم مو خوف بس رهبه وخجل استحيت منهم والله عبالك مسويه جريمه
..يمكن باقيه ابالج الضيافه وعبالج الكل راح يشوف شلون ضيفتي هههههههه
..اضحك انت شكوو عليك
..والله بوجودچ ان شاءالله حياتي كلها فرح وضحك
..ان شاءالله
..يلله حبيبتي وصلنه ..نزلنه ودخلنه للبيت وحمزه وعمي وسام طبگوو سيارتهم ورانه صارت نزلتنه سوه
اني شت ركض الغرفتي
وبقوو همه عدنه فتره وراحوو
اجن البنات وحچيتلهن شنوو اشتريت وشنو اختاريت وشهم اخذني للبيت انسام حجت عليه شلون ترحين وياه قبل الزواج ميصير وعلا جانت يم اهلي گالتلها شنو ميصير ابن عمها مينخاف عليها وياه وهيه مرته شرعا وقانونا بعدين اخاف من حلا على نفسها ومااخاف عليها من شهم دارت عليه لچ اني الفرحه البگلبي الشهم مو الچ عبالج. شگد ماافرحلچ فرحتي اله اكثر ع المرار الي شافه وياچ
..ضحكت وياها لچ انتي اختي لو اخته
..لا عيني اني اخته وحته بالعرس حسبوني من اهل العريس
انسام..ياا هيچ بعتينه كل هذا لعيون هشام نسيتي اهلچ وصفيتي وي اهله
ريحانه ..ولجن كافي كلنا اهل والفرحه الهم اثنينهم يستاهلون دارت عليه لچ حلا شهم مخابر حمزه وگايله من رخصتكم اخذ حلا اشوفها البيت وهذا اخوچ اول ماوافق وبعدها گام يلوب عاد اني گتله شنو ماتأمن بشهم گلي لا مأمن بس كلشي يصير نزل جوه ولگه عمي وسام واخذه الكم وراح
..يبوو ذكرتيني غير لاگانه بالباب طالعين شصار بيه اطرافي خدرت ومتت من الخوف
وحچيتلهن الصار كامن يضحكن عليه وبدن يرتبن جهازي بالجنط
وعلا تكتب شنوو النقص حته نشتري
انتضرتهن راحن وصحت ريحانه وحچيتلها شلون شفت رامي وتخربطت وشهم عصب عباله بسبب الكلمه الگالها بعدها خاف عليه وبده يهدأني وطلبت منها نصيحه اگل الشهم اصارحه لو لا
ريحانه..ديري بالچ تگليله ماضي يولي يمعوده راح يحسب محاولاته وياچ قبل وصدچ اله كله الهالسبب ويعتبر حبج اله حاليا تمثيل خلي مرتاح فدوه اروحلچ
..هذا هوو مراح اگول بس اضل برعب هيچ لازم اخلص من هالسالفه
..ليش خايفه انتي ميگدر يسويلچ شي
..مااعرف بقت يم ربي
هدتني شويه وتعشينه كملنه العشه وترتيب باقي احتياجاتي واتصل بيه شهم
..ألوو
..هلا ياروحي تدرين اني وين هسه
..وين گاعد ابيتنه واتأمل مكانچ اتذكر شلون ذبتي بين اديه وشلون ردت افقد وياچ وانسى كلشي بس تمالكت نفسي بصعوبه
اخ اخ ياحلا شوكت انسى كل اه بگلبي وشوكت اطفي نار اشتياقي بقبله منچ وحضنه دافيه تنسيني حته اسمي
..جنت اسمع واني مركزه وياه بكل حرف يگوله وانفاسه چنت احس نفسي مو بس اسمعها لا جنت اتخيله يمي واحس بدفوو انفاسه
..وياي انتي
..اي وياك
..اي يا حلا اي گليلي شوكت يصير كل هذا
..مابقه شي ايام واني ملكك
..اووف هنه خمس ايام احسهن يصيرن خمس سنين لو الصبر ينباع چان اشتريته گليلي هسه شوكت اشوفج
..ضحكت لايروحي ماكو تشوفني بعد اليوم الحنه والعرس ممنوع تشوفني قلبي هذي تعليمات الوالده