#الضياع
بقلم فردوس عبد اللطيف
الجزء الاول. حقيقية
بسم الله الرحمن الرحيم
اعزائي القصه حقيقية وصاحبه القصه معانا بالكروب وتقرى تعليقاتكم رجاءا عدم التجاوز
اني وصال عمري الان 16 سنه راح احجيلكم قصتي من بدايتهه واريدهه تكون عبره للاهل الي يفكرون بأنانية مع بناتهم
فتحت عيني عالدنيا اعيش مع والدتي وأختي وعد واخواني الكبار ...صهيب اخوي الكبير وعصام اخوي الوسط واحمد الصغير ......
نعيش بأحد المناطق الزراعية القريبه الى بغداد نمتلك بستان صغير وبي بيتنا واخواني كل واحد اخذ مساحه من البستان حتى يبنيهه ويتزوج بيهه والدي متوفي مااتذكر شكله ولاشفت حنيه اب واسمع امي دكولهم هاي يتيمه ليش تصيحون عليهه لان اخواني يعاملوني بقساوه ماعدهم تفاهم رأسا يضربوني كنت اخاف منهم من يجون اركض اختل بالغرفه ويه اختي وعد
من دخلت المدرسه رحت وحدي وأختي بقت بالبيت ظليت ابجي خلي تجي وياي ....وامي دكولي ولج بعدهه صغيره السنه الجايه نسجلهه وهاي القوانه يوميه لحد ما تعودت اروح ويه جيرانه واقاربنه من بعيد تعرفت عليهه اسمهه حياة واخوهه اكبر مني بسنه اسمه ليث
نروح للدوام سويه ...ليث كان مهتم بينا وبالطريق هو الي يقودنا .... تعودت على حياة وليث وصارو على طول يجون يمنه ونلعب بالبستان مالتنه وحتى اختي وعد تجي ويانا
كنت افتقد وجود ابوي ...بصراحه محد يعوض الفراغ الي يتركه غياب الاب بمناسبات كثيره كنت اشتاقله وتمنى لو ان والدي موجود كان حياتي مختلفه لكن الي سمعته من امي ان والدي توفى بسبب السرطان صار عنده سرطان بالقولون
عندما اكتشفو كان منتشر بجسمه وفارقنه بعد ولاده اختي وعد ....كنت صغيره حتى ما اتذكر شكله
اخوي الكبير صهيب قرر يتزوج بالبدايه تزوج عدنه بالبيت لحد ماكمل بناء بيته وتحول بي اني صرت بالرابع ابتدائي
ووضعي نفس الشي وأختي وعد تجي ويانه للمدرسه صرنه مجموعه لكن ليث ما عافنه بقى يجي علي نروح سويه للدوام
بهالمرحله اخوي الوسطاني عصام تزوج ونفس وضع اخوي صهيب اول زواجه يمنه بالبيت لحد ماكمل بناء بيته وتحول بي .....
اني بهالفتره كطفله ماكنت اعرف شنو مشاعر حب وغرام
مسؤليه براءة الطفوله كانت الغالبه على مشاعري لكن اهتمام ليث بي اشعر بوجوده مثل الي تحس بالامان بوجود ابوهه صحيح عمره مقارب لعمري لكن اهتمامه بي يحسسني بالامان بوجوده بقربي
امي المسكينه كانت حزينه وتعاني من استهتار اخواني ميسمعون كلامهه ولا يهتمون لنصيحتها كانو دائما ينفذون الى براسهم وهي كانت تبجي وتنقهر ودكول لو ابوج عايش ميسوون بي هيج بدت صحه امي تتدهور لكن محد بحالهه كلمن يفكر بنفسه وبمصلحته ويحاول يرضي زوجته
بعد وفاة ابوي كان عدنه كم فلس امي تصرف منهم واخواني
كل واحد فكر بمصلحته بقى اخوي الصغير هم قرر يتزوج
هم شكو فلوس باقيه انصرفت على زواجه وبناء بيته لحد ما تدهورت الحاله الماديه لعائلتنه خصوصا اخواني لا عدهم شهاده ولا صنعه تربو عالاعتماد
كملت السادس وصرت بالاول متوسط وامي وظعي الصحي تدهور لازم تجي وحده من الجناين تداريهه وتقوم بواجبات البيت أتفقو كل يوم وحده تجي من الجناين
لكن الي صار ظلو يسمعون امي كلام وهن ما مجبورات وامي تتاذى وتنقهر وخصوصا اخواني من النوع الي يداري زوجته على حساب أمه
اخوي صهيب كان مجمع مبلغ بس هو من النوع الي يشرب الخمر ويلعب القمار وكل يوم يجي سكران
اقترح عليه صديقه يفتح ملهى ليلي
صهيب. اني صهيب الأبن الكبير لعائلتي واعتبر نفسي المسؤول عن العائله بمقام والدي لا درست ولا اخذت شهاده
ولا عندي مهنه كنت اشتغل بسياره حمل ومجمع كم فلس
اقترح علي صديقي ...هاني
هاني. ولك صهيب تدري جاي تنفتح ملاهي ليليه ببغداد وتجيبلك كم بنيه ومغني رخيص وتطلع ليليه ربحك خير من الله هذا غير داخل تخلي يلعبون قمار وتنصبلك على كم زبون
وتستفاد ...اشو جاي يرحون لملاهي لبنان ودبي يكتون دفاتر
خلي نجيبهم هنا ونستفاد
صهيب ....زين والموافقات والمشاكل
هاني ...الموافقات سهله ماكو شي صعب وبالنسبه للمشاكل عين كم واحد (حراس امنيين) يحمولك الملهى والبنات
صهيب. والله خوش فكره تغسل الفكر مكظيهه اشتغل بسياره الحمل ودوخه السيطرات من باجر أبيع السياره
وانت دورلي على مكان شوفه مناسب ياما ابو نؤاس كراده عرصات دور بهالمناطق
هاني. ماشي حا اشوفلك كم دلال واجيك
صهيب. يوم اني بعت السياره
ام صهيب. ليش يمه مو معيشتك ومعيشتنه منين نصرف بعد
صهيب. يمه لا تدوخين بعتها وراح افتح مشروع جديد
ام صهيب. خير ان شاء الله ربي يوفقك
صهيب. اي يمه ادعيلي. ( بس لو تدرين شنو المشروع)
وصال. صهيب اريد تشتريلي ملابس للمدرسه
صهيب. امشي ولج بعد ماكو مدرسه
وصال ليش نزلت دموعي وبقيت ابجي. مو اني شاطره ليش تبطلني من المدرسه
ام صهيب. ولج يمه اني تعبانه واريدج يمي
صهيب كتلج ماكو دوام هذا امر بدون نقاش
طلع من البيت صهيب وراح لبيته
ام صهيب. ولج يابنتي تدرين الجناين شسون بي حتى كلاص الماي يذلوني عليه لسانهن طويل يتحسفون يمسحون كاشيه وبعدين تلكيهن محركين رياجيلهم اخوتج يعني لا تعبين نفسج هاي كعدي بالبيت وسكتي
وصال بقيت ابجي وأحسد الي يرحون للمدرسه رحت على بيت صديقتي حياة بقيت احجيلهه وابجي وهي تصبرني
اجه ليث. اشبيج وصال
وصال اخوي بطلني من المدرسه
ليث. صدك ليش بطلج
وصال. ما اعرف ليش
ليث. شتسوين امرج بيدهم مابيدج شي لاتنقهرين
حياة. شتسوين هذا اخوج صهيب ظالم مسوي نفسه الجبير بس بالأوامر لكن من تحتاجين مايقوم بواجبج اشو ملابس مايشتريلج طبيب من تتمرضين مايوديج
وصال. رجعت لبيتنه ودمعتي بعيني نمت من القهر
للحكايه بقيه بقلم فردوس عبد اللطيف f
