#الضياع
بقلم فردوس عبد اللطيف
الجزء الرابع (حقيقية)
شغل التريله خير من الله بس اني تعافيت كلما احصل فلوس اكظيها شرب وقمار ومافكرت بابو حمد اشلون أسدده
صار الشرب يأثر حتى على شغلي اخذ البطل وياي بالطريق واشرب وأسوق واني سكران لحد ما فد يوم من استهتاري
كنت أسوِّق وسكران وسويت حادث وتفلشت السياره ورجلي انكسرت وسياره صالون هم تفلشت بسببي والسائق مات
لكيت نفسي بالمشفى رجلي مكسوره ومجبسه وإخوتي يمي
عصام. الحمد لله عالسلامه
صهيب. الله يسلمك اني وين شجابني هنا
عصام ...اوووو صارلك حادث واتصلو بينه من موبايلك
صهيب ....مجاي اتذكر شي
عصام ...هسه ارتاح والله كريم
صهيب ...عصومي احجيلي خو ما السياره صار بيهه شي
عصام....او. شحجيلك انت بورطة السياره الصالون صاحبهه مات واجوي اهله يردون فصل. وفلوس تصليح السياره
صهيب...يعني انهجم بيتنا
عصام....المهم سلامتك الفلوس تجي وتروح
صهيب ...عصومي منين ننطي
عصام. الله كريم هسه اخذنه منهم عطوه واطلع بالسلامه ونشوف اشلون نتصرف كله من وره الشرب صحيح انت اخوي الكبير بس كلمه الحق ماينزعل منهه
صهيب...وبالبيت خو مايعرفون
عصام. شيعرفون عالفصل
صهيب. اي
عصام اي حجيت لاحمد بس امي ماتعرف تعبانه
سامي ...ها صهيب الحمد لله عالسلامه ماتجوز من سوالفك
صهيب. حبيبي ابو حمد شوفلي جاره خلصني من هالمصيبه اهل الولد يردون كومه فلوس
سامي..... هسه انت اطلع والله كريم
صهيب كملت علاج وطلعت للبيت رجلي مجبسه لازم اكعد بالبيت هالفتره ولازم أتصرف
بعت السياره التريله وأجوي عشيره السائق الميت ورادو مني فصل مبلغ كبير وبالتواسيل نزلولي سديتهم وأخذت بعد فلوس من سامي والأرباح تتراكم علي لان جاي أتأخر بالتسديد
لحد ما صار المبلغ100 مئه مليون دينار اني بقيت لا شغل لا مصرف بس ادبر فلوس الشرب
وصال ....بهاي المرحله اخوي صهيب كان اعصاب كلما يجي للبيت يتحجج حتى يضربني واشلون ضرب بقساوه واني ما عندي ذنب او صوج
مثلا يشوفني واكفه بالباب
ها ولج ليش واكفه بالباب
وصال. جاي اغسل الطارمة
لزم الصونده وحيل ضرب قوي
اكلتهه كتله بدون ذنب مره اجه وين وصال كتله هياتني بالسطح انشر الهدوم
صهيب ولج شريهن جوه ولزمني هم كتل بدون رحمه كل هذه حجج يفرغ قهره بي لحد ما خلاني اكره نفسي واكرهه وأكره اخواني كلهم
بس ليث الانسان الوحيد الي اشوف وياه لحظات سعاده تعيشني بعالم ثاني لان كان المتنفس الوحيد
صهيب بعد ما دفعت الفلوس لأهل السائق بقيت لاعندي شغل اشتغل واسدد سامي والفلوس كل ماتمر عليهه مده تزيد وين انطي وجهي
بعد مرور شهرين اجه سامي
سامي. ها صهيب شوكت تسدد
صهيب. مثل مجاي تشوف ابو حمد لا شغل ولا سياره وانت صديق عزيز
سامي. جاملتك وخليت وقت للصداقه حبيبي هاي فلوس واني اريد حقي انطيني موعد
صهيب. الله كريم
سامي طبعا الله كريم بس اني اريد موعد
صهيب. ابو حمد حتى اذا نبيع بيوتنه والبستان ماتجيب فلوسك مثل مجاي تشوف البستان ارض قاحله ومابيهه زرع
والبيوت تعبانه بس لامتنه منين اجيبلك
سامي. حبيبي هاي مشكلتك مو مشكلتي
صهيب. زين اصبر علي
سامي شصبر لحد يمته جاي اكولك انطيني موعد
عمي لخاطر الزاد والملح بينا راح انطيك شهر ورآه لا تلومني
صهيب بقيت بهالفتره دايخ والدنيا ضاكت علي ومحد ينطي بهالوكت لا فادتني العلاقات ولا صداقات جيبك وبس
كلمت اخواني مابيدهم شي حالهم امر من حالي والايام تركض خلص الشهر واني وظعي اتعب من الاول
وين انطي وجهي عيني عالدرب اليوم موعد ابو حمد
سامي ابو حمد رجل عمره بالخمسين يحب النساء متزوج من خمس نساء مطلق ثلاثه وعنده اثنان يعمل بالربا يسلف مبالغ ماليه مقابل أرباح من كان يتردد على صهيب انتبه على اخته وصال عمرهه 15سنه بما انه يطلبهم وماعدهم يسددونه عجبه يجدد شبابه مع تلك القاصر يمكن تعيد له شبابه وحيويته عنده اولاد كبار وبنات وزوجتين بذمته والى مطلقهن ثلاثه
سامي. ها صهيب جئتك عالموعد وين فلوسي
صهيب. ها ابو ابو حمد والله ما دبرت اصبر علينه
سامي لحد يمته اصبر حبيبي هذه فلوس والفلوس تجيب فلوس ....يعني ماعدكم تسددون
اني عندي اقتراح انطيني اختك وصال واني أتنازل عن كل المبلغ لان اعرف ماعندك تسددني واذا اذبك بالسجن هم مراح اقبض شي ماعندك شي يفيدني غير اختك وصال
صهيب بس وصال يتيمه وعمرها 15 سنه واشلون اقنعهه
خلي اشوف اخوتي امي شيكولون
سامي. عندك مهله يومين أجيلك يوم الخميس يا الفلوس او وصال وهذا اخر كلام عندي
صهيب من راح سامي انكفخت على راسي دخت صحيح اني اذيت ناس وشجعت بنات كثير عالمشي بطريق الغلط لكن هذه اختي اشلون انطيهه لواحد عمره بالخمسين وهي عمرهه 15 سنه اشلون اقنع امي اخوتي
اني بورطه بس هو هم خوش حل ابو حمد زنكين وممكن نستفاد منه من ياخذ اختي وهم اخلص من الدين وهسه اذا بقت شراح تتزوج شاب فكر يموتهه جوع خلي تاخذ ابو حمد احسن الهه بس اشلون راح اقنع اهلي
صهيب. عصام واحمد سمعوني ابو حمد هددني يريد فلوسه واحنا ماعدنه ننطي واقترح علي يا الفلوس يا يتزوج وصال اختنه
عصام. هذا شكد حقير ونسونجي وين شافهه
صهيب شافهه مره اجه ومنتبه عليهه
احمد يعني ما لكى غير حل
صهيب انتو لازم تساعدوني نقنع امي وتوكفون وياي ترى سامي ما بكلبه رحمه ياذيني
عصام صهيب وين وصلتنه بسوالفك
صهيب. هسه عود حاننطي الدكتوره اشو حا يكون مهرها كل الدين الي بذمتنه
عصام بعد انت أخونه الكبير والي تشوفه صح سوي
صهيب يالى نروح على امي ووصال
وصال. دخلو اخواني على امي وكلموهه رحت اسوي شاي
جبت الشاي اخوي صهيب كلي كعدي وصال عدنه كلام وياج
كعدت واني خايفه عبالي احد شايفني ويه ليث وكايللهم
صهيب يوم الخميس راح يجولج خطابه حضري نفسج
وصال منو
صهيب سامي ابو حمد شايفته
وصال لا ماشايفته ولا اعرفه
صهيب. مو مهم هو شايفج ورايدج
وصال انت دكول ابو حمد يعني متزوج
صهيب. اي متزوج وعنده اولاد كبار معليج بيهم
وصال باوعت لامي دموعه تنزل وما فرحانه بس ماتكدر تحجي واني سكتت اخاف احجي اي كلمه
للحكايه بقيه بقلم فردوس عبد اللطيف f
