#الضياع
بقلم فردوس عبد اللطيف
الجزء الثامن. حقيقيه
من ولدت بنتي صارت الدنيا بيهه طعم اكو احد اعيش لاجله كنت فرحانه بيهه كلما اباوع عليهه انسى كل همومي واكول هم تكبرين وتاخذيلي حقي شكد كان عندي وقت فراغ لكن بوجود رقيه امتلئت حياتي ودنيتي وكل يوم اول ما اكعد الصبح اباوع عليهه فرحانه بيهه واكلمهه صحيح ماتفهم شي بس هي الوحيده الي تريحني وتزيل همي حاولو نايمه اكعدهه اسبحها بالبدايه ماكنت اعرف لكن ابو حمد خلاني اسبوع يم اهلي وامي ونسوان اخوتي علموني وصرت شاطره كنت استمتع بمداراتهه
جيراني تغريد جتي تزورني بعد ما رجعت من اهلي
تغريد مساء الخير وصال الحمد لله عالسلامه حبيبتي
وصال تسلمين حبيبتي تفضلي
تغريد يمه فدوه للبنوتات ربي يحفظها ويوفقها
وصال تسلمين اني اشكرج على موقفج جيتي وياي للمشفى وتعبتج
تغريد شدعوه عاد احنا جيران واني من زمان كنت حابه أتعرف عليج
وصال. أتشرف بمعرفتج انت وين تشتغلين
تغريد. ها اني اشتغل بمركز تجميل نسائي
وصال صدك. وين
تغريد. بالكراده
وصال بالتوفيق. ليش مكلفه نفسج وجايبه هديه
تغريد. وهسه شجاببه هاي لرقيه الحلوه اكولج ابو حمد مو كبير بالعمر عليج
وصال. حبيبتي قصتي قصه طويله اذا احجيلج تدوخين
تغريد. احنا شعدنه كاعدين احجيلي خو ما يجي زوجج
وصال لا اليوم مايجي. ابقي يمي
خلال هالفتره الي تعرفت على تغريد ووجود بنتي غيرو حياتي بعد حتى سامي ميهمني يجي يبقى يم نسوانه اهم شي عندي بالدنيا رقيه لان بهالفتره بدأ سامي يتغير علي صار يجيني مره بالأسبوع بس يوم الخميس والجمعه ومن السبت ما اشوفه يكظيهه يم نسوانه
وصال حجي انت تعوفني اسبوع وحدي مرات احتاج شغله منك ومرات تلفونك مغلق
سامي. وصال لا تنقين بكلبي اني صاحب شغل وبنتج بس تبجي هناك ارتاح بغرفتي هدوء بعدين اي شي تحتاجي اتصلي بي واني اخلي حمد يجيبلج إياه اي شي
وصال. صار حجي اكولك رقيه صارلهه يومين ماترضع مثل اول وإسهال على طول
هاي كل الاطفال مابيهه شي
وصال عفيه حجي خلي نوديهه للطبيب
سامي اووو خلي أكوم اروح صار بيهه طبيب كل ما تعطس نوديهه طبيب شطلعت هاي مو جهالي كلهم تربو ماشافو الطبيب بس بنتج حا اروح
وصال هسه ليش تعصب لاتروح ابقى يمنه خاف تتخربط بالليل
سامي يمج حمد اني طالع
وصال. الله وياك
بعد ما طلع الحجي بكم ساعه رقيه تخربطت بالزايد ارتفعت حرارتهه ومن أرضعهه تتقئ وجهه صار اصفر يا ربي إسهال وقئ وين اروح واني لوحدي خابرت على حمد يرن وماكو جواب ساءت حالتهه وآلساعه 12 بالليل ياربي شسوي يمه بنتي هي روحي من الدنيا يابعد كلبي بي ولا بيج
نزلت ركض على حمد ودكيت عليهم الباب كانو نايمين طلعلي حمد. بقلم فردوس عبد اللطيف ها وصال اشبيج خير يفرك بعيونه
وصال. الحكني حمد رقيه متخربطه وديني للمشفى
حمد روحي جهزيهه خلي نوديهه للمشفى
البنيه انشمرت من ارتفاع الحراره عيونهه حولت وايديهه تيبست فتره وراها رجعت تنفست بقيت الطم ياربي كون الحك عليها علما وصلنه للمشفى والطبيب يفحصها البنيه سلمت امرها لله بس اني واكفه يم الطبيب شفته غطاها بالبطانيه كتله شنو دكتور
الطبيب. البقيه بحياتكم البنيه صاير بيهه جفاف والظاهر كلبهه ما متحمل لان عدهه فتحه بالقلب من الولاده
وصال. انت ماتفتهم طبيب وخابص نفسك بنتي مابيهه شي
التفتت على حمد شفته يبجي حمد بنتي مابيهه شي شلتهه بايدي وكتله يالى امشي نروح لغير مستشفى هذولي ميفتهمون حاول حمد ياخذهه من ايدي وهو يبجي مدري يبجي علي مدري على بنتي لان اني بذيج اللحظه من الصدمه ما استوعب اي كلام المهم أنقذ بنتي وهي اصلا جامده بين ايدي حاول يهديني حمد لكن اني ما اريد اصدك عوفهه بايدي
حمد انطينياها اوديهه
وين نوديهه حمد هذا يكول ماتت اختك ماتت
حمد وصال هذا امر رب العالمين سلمي امرج الى الله
وصال. شنو قصدك. يعني اجي بنتي شايلتهه وارجع للبيت وحدي بهاللحظه نشفت دمعتي اريد ابجي اصرخ ماكو فاتحه عيوني وما ابجي ياريت اكدر ابجي أبرد كلبي
اخذهه من ايدي كعدت عالارض اختفى حمد مدري وين راح اخذ بنتي وروحي وياه بس اني أنشل جسمي رجلي ماتشيلني
كنت اباوع واكول هسه يرجع ويكلي الطبيب غلطان ورجع نفسها لكن بعد تقريبا ساعه واني في حاله من الذهول اجه حمد وحده وبيده ورقه هذا الي بقالي من حبيبه كلبي كلي يالى امشي باوعت عليه بدون ما احجي ولا كلمه جرجرت نفسي وتجيت عالحايط ورجلي اسحل بيهه سحل فتحلي باب السياره
صعدت وايدي رافعتهن يتخيلي بنتي بحظني ما اعرف اشلون وصلنه للبيت لان فكري متجمد والي كبالي ما اشوفه
لحد ما وصلنه للبيت فتح الباب حمد وكلي نزلي انتبهت صح لازم انزل وين اروح للبيت واشوف سرير بنتي وملابسها مو قبل كم ساعه كانت منوره البيت شنو يعني
حمد ...وصال تعالي لبيتنا الليله نامي يم البنات لا تبقين لوحدج نزلت رحت لبيتهم فرشولي بالأرض يم البنات واخذو مفتاح البيت وراحت زوجه حمد شالت أغراض بنتي ملابسها سريرهه كلشي يخصها مبقولي شي نمت ذيج الليله واحلامي كولهه كوابيس وكلسع اصحى واسمع رقيه تبجي وزوجه حمد دكولي وين رايحه اكولهه رقيه تبجي صوتها ترس أذني
ادور عالصوت ماكو
بقيت على هالحال كم يوم حتى من رجعت لبيتي اسمع صوتها تبجي وأدور عليهه ماكو لحد ما انقهر علي سامي
وكال حا ادزج يم اهلج ابقي أسبوعين لحد ما تهدأ اعصابج
يوم الثاني دزني مع السائق لبيت اهلي من دخلت وشفت امي طفرت دمعتي وطلعت كل القهر وبجيت لحد ما برد كلبي
ترقبو الجزء الاخير غدا ان شاء الله
بقلمي فردوس عبد اللطيف
