#الضياع
بقلم فردوس عبد اللطيف
الجزء التاسع
بقيت يم اهلي وجودي يم ناس احبهم شويه خفف علي الوحشه وعد وامي ميعوفوني لوحدي لازم وحده وياي بالبدايه كنت بس بالغرفه ما اطلع منهه حتى من يجون اخواني ما اريد اشوفهم اكولهم كوليلهم نايمه بقيت مده اسبوع على هالحال لحد ما لحت علي وعد نطلع نتمشى بالبستان نشتم الهوى
كتلهه اي والله اختنكت من البيت طلعنه نتمشى وكفت يم الشجره الي كنا نلتقي بيهه اني وليث بقيت ابجي كعدت بالأرض واني كاعده ومدنكه عالارض شفت رجلين واحد واكف رفعت راسي ....ليث
ليث. اشلونج وصال سمعت باخبارج ترى اني متابع اخبارج مو عبالج نسيتج
وصال. بقيت صافنه على كلامه وضحكت شتابع اخباري واذا تتابع اخباري شنو قصدك ....اني هسه كلبي مجروح أعز مخلوق بالدنيا عندي راحت برمش العين
كعد بالأرض وعد كالت راح اجيبلج ماي راحت للبيت بقيت وحدي وياه بس مشاعري احسهه ميته اتجاهه سكتت بقى يحجي عن الصبر ولازم تنسين وهسه يجيلج طفل ثاني ويعوضج ومن هالكلام
وصال. انت شخبارك جاي تنجح بالمدرسه
ليث. اي ماشي كوه ننجح تعرفين الدراسه صارت الاعتماد عالخصوصي يعني نشتري النجاح بفلوس
بقينا نسولف تقريبا ساعتين حجيتله عالى صار بي بقى يتعذر لان ظرفه ما سمحله يخطبني
اني هم كتله كلشي قسمه ونصيب
رجعت للبيت شويه نفسيتي مرتاحه حسيت اكو احد سمعني ومتعاطف وياي بقيت اتغير بمرور الايام لحد ما اتصل بي سامي وكالي دزيتلج السائق تعالي بعد كافي دلال اني هم ردت ارجع لبيتي ....
رجعت للبيت وجتني صديقتي تغريد البقيه بحياتج وصال شخبارج
وصال الحمد لله انت اشلونج
تغريد لج وصال المركز الي اشتغل بي حا يفتح فرع بزيونه ومحتاجين موظفات واني حااروح بي شدكولين تجين تشتغلين وياي هناك يخلص الوقت بسرعه وماتحسين بي
وصال. هو اني شعرف
تغريد. حبي المركز هو للمساج اني كذبت عليج كتلج تجميل بصراحه هو مساج وللرجال
وصال. يمه ولج غير يذبحني سامي
تغريد وهو سمسم شمدري كوليله مركز تجميل نسائي
وصال يايمه وأجذب عليه
تغريد وشدعوه خايفه على مشاعره اذا هو اخذج غصب وانت بعمر اطفاله ويعوفج شهر كامل وانت بعز شبابج هم اصغر من الشباب كوله عمرج 16سنه
وصال. خليني أرتبها واكوله
تغريد ماشي حبي اروح مع السلامه انتظر منج خبر
وصال ماشي حبي
من طلعت تغريد بقيت افكر بالموضوع الي كلمتني بي اشو على منو خايفه اهلي اخوتي الي باعوني للشايب علمود الشرب والقمار لو علمود سامي الي اشتراني بفلوسه ومخليني بسجن لا هو مطلكني ولا هو معاملتي كزوجه وإلهه حقوق خلي افكر بمصلحتي وبنفسي قبل ما اتخبل
من اجه سامي
وصال. حجي اني راح اتخبل بالبيت طكت روحي وانت ما متفرغلي وجيرانه تغريد تشتغل بمركز تجميل نسائي وكالت محتاجين موظفه خلى اروح اشتغل وياها عفيه
سامي شنو شغل واشلون ترحين وتجين
حجي عدهم دوام صباحي ناجر خط اني وتغريد نروح ونرجع عفيه حجي
سامي. زين اذا بس نسوان ميخالف واني اشوفلج سايق يوديكم ويجيبكم
وصال الدوام من 8 الصبح لحد ال 2ظهر يعني شفت صباحي
سامي ماشي موافق كافي لغوه
وصال. شكرا حجي
وصال خابرت تغريد
الو ولج توتو وافق وافق اشتغل وياج
تغريد مو كتلج رجلج يحب الفلوس خوش حظري نفسج باجر من وقت
وصال. يوم الثاني كعدت من وقت وتحضرت واجه السائق يؤدينه ورحت لمركز المساج صحيح الراتب قليل لكن نحصل إكراميات صرت اشتغل وعندي وارد اهم شي هو الاستقلال المادي حسيت بالقوه من بعد ماكنت تحت رحمه اخوتي وزوجي
بالبدايه كان صعب على أتقبل الوضعيه لكن بمرور الايام تعودت
طبعا مراجعين أشكال وألوان من كل الطبقات خلال هالفتره تعرفت على شخص حسيته مهتم بي صار يجي تقريبا مره بالأسبوع ويطلبني بالاسم أبدى اعجابه بي اسمه منتصر
يعمل مسؤل بأحد الدوائر الامنيه عرض علي خدماته
وانطاني رقم تلفونه واخذ رقمي وظل يتصل بي طبعا اني من ارجع من شغلي أكون وحدي بالبيت وسامي يجيني بالشهر مره تغير علي صار معظم وقته يقضي مع نسوانه وعائلته اني صفيت وحيده مقيده بأغلال من حديد لا ترحمني ولا تخليني اعيش مثل باقي الناس
بعد فتره بدأ منتصر يطلب مني اطلع وياه او يريد يجي لبيتي
رفضت هذه العلاقه وقطعتهه أسباب كثيره تمنعني من الاستمرار بيها صحيح بالبدايه حسيت اني تعلقت بي لكن ما اكدر استمر معاه لذلك انتهت العلاقه ورجعت للوحده مع ذكرياتي والخوف من المستقبل
سامي اذا اتاخر ربع ساعه عن موعد رجعتي رأسا يتصل بي ويصيح علي ويهددني ان يبطلني من شغلي
بهالفتره امي تمرضت توسلت بسامي اروح اشوفهه
رحت لاهلي خميس وجمعه ومن سمع ليث اجه لبيت اهلي غمزلي وكلي طلعي بالبستان عندي كلام معاج
طلعت وراه ها ليث شتريد
ليث. وصال. انطيني رقمج واخذي رقمي
وصال. اشبيك ليث
ليث. وصال اني بعدني احبج وأريد نرجع علاقتنا كما كانت بالسابق اني اعرف زوجج هاملج وملتهي بالنسوان وانت وحيده خلي نتراسل ونرجع اشواقنا وحبنا
وصال. ليث اني الان متزوجه وما اريد ارجعلك
ليث. كذابه عيونج كولهه لهفه وشوق انت بعدج تحبيني
وصال انطيني مجال افكر
رجعت لبيتي واني في صراع بداخلي اسوي الشي الي يريحني وارجع علاقتي بليث لوابقى أقاوم رغباتي حفاظا على ما تبقى من جسد بلا روح اوصفلكم احساسي اني بصراحه تمنيت الموت ولا هذا المصير الي خلوني بي اخواني وضيعوني وضيعو مستقبلي وشبابي اني بصراحه سردت قصتي للكاتبه فردوس عبد اللطيف وأريد رايكم هل استمر بعلاقه غير شرعيه مع ليث وارجع لحبي السابق للعلم اني راغبه بهذا الشي احب اسمع رايكم افيدوني
اختكم. وصال
................................
احبابي الى هنا انتهت قصه وصال الي ضيعوهه اخوتهه في سبيل ملذاتهم وونستهم ...
اعزائي طبعا صاحبه القصه حظرتني بعد ما أبديت لها راي بان تقطع علاقتها بليث وترضى بمصيرهه احب اكولهه اني نصحتج وانت حره بمصيرج وسردت قصتج كما رويتيها لي بكل امانه (ان الدين النصيحه)حتى لو تزعلين وربي يعوضج ويوفقج ويهديج للطريق الصحيح
واحب اكول كلمه للاهل عندما تزوجون بناتكم اختارو أزواجا صالحين ولا تضيعوهن وتخلوهه تغلط او تكون هدف لضعاف النفوس
اتمنى ان عجبتكم القصه وترقبوني بقصه جديده تحياتي لكم
النهايه
الكاتبه فردوس عبد اللطيف. F
