إنجيل مُحَمّدْ

إستغلال الحنين

كُنا بنسمع سوا كل ألاغاني ..
و تغنيلي..
أقولها : " غني تاني " ..
كنت بزهق و بهرب.. فا تقولي : " إرجع عشاني " ..
كنا بنكون كل حاجة لبعض من غير هدف او غرض ..

كنا بنتباعد .. بس نفضل سوا..
كنا بنخمِس في كل جرعة هوا ..
كات بتاخد قبل مني الدوا ..
و كنت بعيا قبلها فالمرض ..

نادتلي :
" فينك ؟ .. رُحت فين ؟ " ..
قولتلها :
هنا ، موجود ...
محبوسة روحي ف قالب طين ..
مانعني اعبر اي حدود ...
الساعة عدت سنين ..
م الموعد الموعود ..
طفيت نيران الآنين..
ببرد و برود البارود ..
و بجرعة النيكوتين..
و ببن عب معبود ..
ملعون يا طبع السنين ..
ملعون يا وتر العود ..
ملعون استغلال الحنين..
لجمال عنيكي السود..

المشكلة ما كانتش مين كان ضد و مين مع ..
المشكلة كانت أساسا فيا و ف كتر شَكي..
أفكاري زي سلك السماعة .. متكلكعة ..
و مهما اديكي كات حلوة هتعجزي تفكي..
تراك الموسيقى التصويرية لعمري غنيته..
و رقصني ، زي افعى هندية مرمية ف اي رصيف ..
اسألي هشام نزيه عن مزيكا تيتو ..
و اسألي هاني شنودة عن مازيكت الحريف ..
خسران مكسب جنيته ..
و ميزاني فيه تطفيف..
مهدود كل حلم بنيته ..
علشان أساسه ضعيف ..
حلمي القديم - انا سبته ..
و حلمي الحالي - سبرتو ..
بخاف على صوتي من سيرته ..
و بخاف اشوفك ..
فا بدعي ابقى كفيف ...

جميلة زي جمال النوبة وسط الغيطان ..
و رابطة كلامي في المزارع سنبلة و عناقيد ..
دافية زي احلامي بحضن و ضمة الأوطان ..
و عنيدة ، ما اعرفش غيرك تقدر تصقف بايد..
مفيش طرق توصل ما بينا الآن ..
مفيش ميزة فيا إلا اني بعيد ...
لا امان للقلب لو قلقان ..
لا طريق للاستقامة في وحشة التحويد..
جيتي على بالي الليلة و انا زهقان ..
و سبتيني و انا زهقان ..
و وحيد ...

الليلة دي ما تخصش غيري و غيرك ..
هكتب كلامي منين ؟ .. ماهو كله من خيرك ..
السما دي لو سمايا .. متعمرة بطيرك ..
و الخطوة تسبق خطايا .. تتبع خطوط سيرك ..

بنات سابت و سبتني .. عشانك لسه على بالي..
بهلوان و حبالي ملتني .. يوم وقعت ، وقعت ف حبالي ..
الرياح و المطرة نحتتني .. شكلت صورتك على جبالي ..
ضعف عضلة قلبي نحرتني .. قلبي بقى مشلول و بقى بالي ..

الليلة دي مش شتا ..
و لو اني حاسس برد ..
و مفيش طيور ف السما ..
و مفيش بشر ع الأرض ...

لما كانت اي واحدة تمر قدام عيني ...
ما كنتش بشوف دايما الا وجهك ..
زي احتمال مؤكد لحظة ما ترمي النرد..

عايزك المرادي و المرادي بس تسامحيني ..
البنت دي بالذات كان فيها من شبهك ..
عشان كنت دون ما أحس ..
ندهت ليها : يا ورد ..