إنجيل مُحَمّدْ

محمود

نقطة و من اول العداد ..
احسب خسايرك.. عند أول ريست
اللحظة دي..دايما كده بتتعاد ..
معرفش ليه بالذات.. ف اللحظة ديا يئست ..
الموت صديق مخلص.. بيوفي كل معاد ..
و الغلطة ديا مسؤلية مين ..
الغلطة دي غلطة م الإعداد ؟ ..
ولا دي غلطة م السينارست؟ ..
****
المشهد الاول ما كنش ضروري اقابلك فيه ..
ما كنش ضروري ان إحنا نكلم بعض فيه م الاصل ..
لو كنت بس اعرف.. بعد لقانا هيكون ايه ..
بنسبة 100 ف المية .. مكنتش يومها جيت الفصل...
****
(1 )..
كنا عيال..
انا و انت..
وكنا اخوات..
انا و انت..
كانلي يجي..
100 صاحب..
ما فاضل منهم..
إلا انت..
خناق..
و غباء..
و ذل..
و قهر..
و " هات سلفة لآخر الشهر "..
ضربني الموت ف نص الضهر..
ف وقت ما خد روحك انت..
-بتبعد
_ "دنيا بلاعة "
- دي طبعا اي شماعة..
ما كنت معايا من ساعة ..
قولي الموت خدك امتي ...
******
ما تعبتش غير وقت اما سألت ..
حبيتك ؟ ..اكتر ما تخيلت ..
*****
(2 )
محمود يا صاحبي.. سبت هنا صوتك..
و الدنيا مش دنيا .. بعد أما جه موتك..
لو في حاجات خلتك.. تطلع بنفسك فوق..
ابدأ بكل هدوء..
اكتب لنا شروطك ..

محمود يا صاحبي.. يا معني كلمة سوا ..
في برة ريحة موت.. موجودة جوة الهوا ..
كنت الدراع اليمين.. قبل الدراع الشمال..
غبت اليمين اتقطع... أما الشمال.. اتلوى..

محمود يا صاحبي.. يا حتة م الجدعنة ..
محموديا صاحبي... لأ.. محمود  يا انا..
يرضيك يا صاحبي.. ابقي هنا لوحدي..
و أن كنت هفضل قولي..فاضلي كام سنة؟..

محمود يا صاحبي... الغيبة غيبة محزنة..
و الشوق لوحده ف غربتك .. قادر بأنه يهزنا..
الدنيا ذل... و الموتة ذل..
و من أمتي شئ كان عزنا؟ ...

************
نص روحي اللي اتسرق..
سهران بيكتب م القلق..
لو كنت مش جي ف منام..
هثبت حضورك ف الورق ....

***************
(3)
الاولة : لقطة..
التانية : غلطة..
التالتة : ورطة...

الاولة : لقطة بتجمعنا..
التانية : غلطة ف المعنى..
التالتة : ورطة بتمنعنا...

الاولة : لقطة.. بتجمعنا.. للقا مع بعض..
التانية غلطة.. ف المعنى.. و ف افتراض الفرض..
التالتة : ورطة.. بتمنعنا .. نفضل ف نفس الأرض..

الاولة : لقطة.. بتجمعنا.. للقا مع بعض .. خيط ف خيوط..
التانية : غلطة.. ف المعنى.. و ف افتراض الفرض.. و المخطوط..
التالتة : ورطة.. بتمنعنا .. نفضل ف نفس الأرض.. و انت تموت..
الاولة : موعود
التانية : الوعود..
التالتة : ما تعود...

الاولة : محمود..
التانية: محمود...
التالتة : محمود..