إنجيل مُحَمّدْ

واجبات مُقدسة

احضنيني ..
زي عيل العيال غلبوه ..
و سابوه ..
بيبكي لوحده ع الناصية ..
احضنيني ..
زي حضن يوسف لابوه ..
بعد كل السنين ..
و انتي عارفة..
" السنين قاسية "...
و اسنديني..
و قوليلي :
اوعى تميل ..

صدقيني ...
لو قولت (لو) او (إذا) ...
او قولتلك قربي ..
او قولتلك تهربي ..
آمني بيا و لو معيش معجزة ..
آمني بيا و لو ما كنتش نبي ..
الحقيني ..
و قوليلي :
ان كدبي قليل ..

واسيني ...
في كل مرة اعددلك خسارتي ..
و يطل حزني من عنيا ..
واضح .. جَلي..
و اسمعيني ..
لو ألف مرة شرحت فيها صداقتي..
و علاقتي ..
الغير عادية ب (علي) ..
و امنعيني ايأس ..
و قوليلي :
مش مستحيل ...

استحمليني ...
زي الاحتمال العظيم للام ..
و حنانها ع الطفل الرضيع ..
استحمليني ..
لو كنت مش بهتم ..
مع اني - والله - بدونك بتكسر و بضيع ..
و جامليني ..
جامليني..
و قوليلي :
اني جميل ..